भांगरभूंय | प्रतिनिधी
मडगांवः शारीकरणाक लागून चवथीक माटोळीक मेळनात त्यो गजाली गांवगिऱ्या वाठारांनी मेळपी वस्तू माटोळी बाजारांत एकेच सुवातेर मेळटात. हाका लागून गांवगिऱ्या वाठारांक रोजगार मेळटा आनी नागरीकांक कसलोच त्रास करिनासतना माटये खातीर गरजेची सामुग्री मेळटा अशें मंत्री सुभाष फळदेसाय हांणी सांगलें.
स्वयंपूर्ण गोंय खाला मडगांवां ‘स्वयंपूर्ण माटोळी’ बाजार आयोजीत जाता. ताचें उक्तावण समाज कल्याण मंत्री सुभाष फळदेसाय हांणी केलें. ह्या संदर्भांत माटयेचे सामानाक लागपी शंबरां परस चड साहित्य माटयेच्या बाजारांत एकेच सुवातेर उपलब्ध आसा आनी तातूंत सुमार 50 बायलांच्या बचत गटांनी वांटो घेतला अशें मंत्री फळदेसाय हांणी सांगलें. हाचे भायर गांवगिऱ्या वाठारांनी रानटी फळां मेळटात जीं आतां उणीं जायत आसात. हाचे भायर चवथी खातीर घरगुती फराळ विक्री खातीर दवरतात. हाका लागून गांवगिऱ्या वाठारांच्या अर्थवेवस्थेक योगदान मेळटलें. स. मनोहर पर्रीकार मुख्यमंत्री आसतना 2014 वर्सा सावन माटोळी बाजार सुरू जाल्लो. नेत्रावळी हांगा अटल गांव उदरगत समितीची नेमणूक जाली. माटोळी बाजाराची संकल्पना तांणी सुरू केली. देखूनच चवथीच्या निमतान गांवगिऱ्या लोकांक अर्थीक मजत मेळोवन दिवपा खातीर राज्यभर माटोळी बाजाराची संकल्पना चालीक लायतात अशें मंत्री फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
