भांगरभूंय | प्रतिनिधी
आयज गोंयांत सरभोंवतणी पळयत जाल्यार दोंगर कापणी, कोयराचें प्रदूषण, उदकाच्यो समस्या आदीं सैमा कडेन संबंदीत आशिल्लीं संकश्टां येवन उबीं रावल्यात. अश्या वेळार….
गांवठण- प्रियोळाच्या माटोळीकार दत्ता शंभु नायक हांणी तांच्या घरां चवथीक अदूं वर्सा देव परशुराम रूपांत 315 सुमार फळांची माटोळी बांदिल्ली. वैजयंती, वायवर्ण, पाचवो चाफो, सागरगोटे, काटे इंद्रायण, चिबली सांग, शेरणी अश्या तरेकवार दुर्मीळ फळफळावळींनी तयार केल्ली माटोळी हीं शालेय विद्यार्थ्यांच्या सरभोंवतण विशींच्या अभ्यास उपक्रमाचो विशय थारली. ह्याच उपक्रमाचो एक भाग म्हूण कांय मुळाव्या तशेच माध्यमिक शाळांच्या विद्यार्थ्यांनी तांची माटोळी अणभवली.
दिवचल म्हालांतल्या साळ हांगासल्ली पुनर्वसन जाल्ली सरकारी मुळावी शाळा, आडन मडकयची सरकारी मुळावी शाळा, नगर प्रियोळांतली संस्कार शिशुवाटीका मुळावी शाळा, एस. एस. समितीची मुळावी शाळा तशेच स्वस्तिक विद्यालय प्रियोळ आदीं शाळां मदल्या भुरग्यांक माटोळीकार दत्ता नायक हांणी विशेश आवडीन माटोळींतल्या तरेकवार दुर्मिळ फळांची खाशेलपणां आनी वखदी गूण सांगले. शाळेंत विद्यार्थ्यांक पर्यावरण अभ्यास विषयांत निश्चितपणान ताचो लाब जातलो.
फाटलीं धायेक वर्सा माटोळी करून दत्ता नायक आपली कला सादर करता. तांच्या ह्याच माटोळेक राज्य पांवड्या वयल्या कला आनी संस्कृती खात्याच्या माटोळी सर्तींत पांच वर्सा जालीं पयलें तशेंच तिनेक वर्सां उमेद वाडोवपी अशें तरेची इनामांय गावल्यांत. पूण जेन्ना आपूण माटोळेक बांदिल्ल्या तरेकवार रानटी, वखदी अश्या फळांची म्हायती विद्यार्थ्यां मेरेन पावयता आनी भुरग्यां मदी सैमा विशीं जाणविकाय घडोवन हाडटा तेन्ना आपल्याक आपूण केल्ल्या वावराचें खरे तरेन सार्थक जाल्ल्याचें समाधान मेळटा अशें श्री. नायक मुद्दाम सांगतात.
जिवितांत भुरग्यांक फकत पुस्तकी गिन्यान दिवन उपकारचेंना. तांकां जर पुरायपणान गिन्यान मळार येसस्वी जावंक जाय जाल्यार पुस्तकां वांगडा संवसारांतल्या बऱ्याचशा गजालींक समजून, जाणून घेवचें पडटलें. सैम होवूय तातूंतलोच एक विशय. सैमाची वळख जाली जाल्यारूच फुडली पिळगी सैम राखूंक मुखार सरतली. सुवार्था खातीर मनीस आयज सैमाक नानपयत करून उडोवपाच्या चुकीच्या मार्गार चल्ला. अश्या वेळार तरणे पिळगे मदीं जागृतताय घडोवन हाडून तांच्या मनांत सैमा विशींच्यो संवेदना जाग्यो करपाचें काम माटोळी सारको विशय करता. देखूनूच होच फुडाराचो विचार करूनूच सैम केंन्द्रीत अश्यो चवथी सारक्यो सण, परबो मनोवपाक आमच्या जाणट्यांनी सुरवात केल्ली आसूंक जाय.
आयज गोंयांत सरभोंवतणी पळयत जाल्यार दोंगर कापणी, कोयराचें प्रदूषण, उदकाच्यो समस्या आदीं सैमा कडेन संबंदीत आशिल्लीं संकश्टां येवन उबीं रावल्यात. अश्या वेळार शालेय अभ्यासक्रम फकत गूण मेळोवपा पुरतोच आसूंक फावना तर ताका संवेदनशीलयेची जोड दिवन पर्यावरण सारकें विशय विद्यार्थ्यांक शिकोवप काळाची गरज थारता.
येयात भुरग्यांनो
गिन्यानाची माटोळी बांदूया
फुडाराच्या रूखांनो
सैम अभ्यासाची बियां रूजोवया
– गौरांग गोकुळदास नायक
8975081363
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
