भांगरभूंय | प्रतिनिधी
पणजीः मनशाक ह्या धकाधकीचे जिणेंत विरंगुळो हो जायच पडटा. हो विरंगुळो भेटोवपाचें काम दरवर्सा ‘बुदवंतोस्तव’ ही कार्यावळ मनोवन करतात. फाटलीं स वर्सां ही मनरिजवणेची कार्यावळ ह्या बुदवंत पंगडाचे वांगडी आयोजीत करतात. ह्या कार्यावळीक कांय खास आमंत्रीत आसतात आनी पंगडाच्या वांगड्यां पुरतो हो उत्सव मर्यादीत आसता.
‘बुदवंतोस्तव’ ही कार्यावळ 2019 उपरांत कोविडाचे महामारीक लागून बंद आशिल्ली. ते उपरांत 2023 वर्सा ताचें आयोजन माजोड्ड्यां जालें.
ह्या कार्यावळींत मुखेल सोयरे म्हूण उलयतना प्रा. भास्कर नायक हांणी सांगलें, हो एक बरो उपक्रम. ह्या उत्सवांत सगले बुदवंत आपले मदलो ‘टॅलंट’ हांगा दाखयतात. ‘एन्जॉय’ जातात आनी हो आनंद, ही खोशी मनांत सांठोवन घरा वतात. ‘टॅन्शन’ हें सगल्यांक आसता. हांगा जमिल्ल्या प्रत्येकाच्या मनाचेर वेगळेवेगळे तरांचे ताण आसात. ते आसपाचेच. पूण तातूंतल्यान भायर सरपाक एक रात जायना, ह्या स्ट्रेसांतल्यान भायर सरपाक हो बुदवंतोस्तव खात्रीन आदार करता. मनशाक मदीं मदीं ‘स्ट्रेस रिलिव्हर’ जाय आसता आनी हो बुदवंतोस्तव तें साध्य करता.
ह्या वेळार भो. दिनेश मणेरकार हांकां तांणी कोंकणी खातीर केल्ल्या वावराची तोखणाय म्हणून आनी संजना पब्लिकेशना वतीन साबार पुस्तकां प्रकाशीत केल्ले खातीर मानपत्र दिवन तांचो भोवमान केलो.
त्याचवेळार ह्या सुवाळ्याचे मानाचे सोयरे संजय तळवडकार, हांचे हस्तुकी तांकां एक ‘चाळण’ भेट दिली. ह्या वेळार संजय तळवडकार हांणी स्पश्ट केलें, संजना पब्लिकेशनाचो आतां वावर वाडला. खूब पुस्तकां प्रकाशीत जातात. तेन्ना तीं पुस्तकां हे चाळणींंत घालचीं आनी तातूंतल्यान चाळून जें ‘म्होंव’ येतलें, तींच पुस्तकां तुवें उजवाडावचीं. वयर उरतात तीं कडेक सारचीं. हातूंतल्यान दर्जेदार पुस्तकां येवपाक मजत जातली.
तांणी मुखार सांगलें, ही चाळण ह्या पुस्तकांचे निवड प्रक्रियेचें प्रतीक म्हणून हाचो विचार जावचो. संजना पब्लिकेशन्सा कडल्यान साहित्यीक मळार खूब वावर जावचो. ताका खूब नामना मेळची अश्यो शुभेत्सा तांणी उकतायल्यो.
ह्या बुदवंतोस्तव कार्यावळींत खासा आमंत्रीत म्हूण विश्वजीत धार हाजीर आशिल्ले. तांणीय ह्या वेळार आपले विचार उक्तायले.
ह्या वेळार आपआपल्या क्षेत्रांत निपूण आशिल्ल्या वांगड्यांक वेगळेवेगळे पुरस्कार भेटयले. तातूंत संजय तळवडकार हांकां जिणेगौरव फावो जालो. तांचे बरोबरीन अमर साखरे, सतीश मुंगरवाडी, शरणजीत साहानी, मनोज तळावलीकार, सदाशिव भेंडो, महेश आंबो, अजय करमली, पॉल चाको, शैलेश नाडकर्णी आनी निलेश नाडकर्णी हांकां पुरस्कार भेटयले.
ह्या कार्यावळींत शैलेश नाडकर्णी, विश्वास कुराडे, विठ्ठलदास भट, सोलन पेरेरा, नीलेश नाडकर्णी, शरणजीत साहानी, अमर सांबारी, आशिश करमली, परेश बेणे, रघुराज देसाय हांणी वाद्यवृदांच्या तालार आपलीं पदां सादर केलीं. जाल्यार भास्कर नायक हांणी रायगड नाटकांतलो ‘संभाजी’चो प्रवेश सादर केलो. हास्यसम्राट संजय तळवडकार हांणी कांय घडणुको सादर करून वांगड्यांक मनसोक्त हांसयलें.
ह्यावेळार बुदवंतोस्तव पंगडाचें दुसरें पुस्तक प्रसिद्ध करपाचेर भासाभास जाली आनी ‘चिकन मटण समरादनेन’ कार्यावळ सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
