भांगरभूंय | प्रतिनिधी
मडगांव : माजोड्डें- उतोड्डें- कलाटाची विशेश ग्रामसभा सरपंच अँथिया लिन परेरा हांचे अध्यक्षते खाला आयज जाली. ह्या वेळार उरिल्ल्या उदरगतीच्या कामांचेर चर्चा करपाची मागणी नागरिकांनी लावन धरली. विशेश ग्रामसभा आशिल्ल्यान अर्थसंकल्पाचेरूच चर्चा जातली अशें सरपंचांनी सांगतांच चडश्या नागरिकांनी ग्रामसभा अर्दवटूच सोडली. उपरांत उरिल्ल्या ग्रामस्थांचे हाजेरींत अंदूंचो अर्थसंकल्प संमत केलो.
ग्रामसभेचे सुरवातेकूच कांय नागरिकांनी ग्रामसभेंत गांवच्या हेर समस्यांचेर कित्याक चर्चा जायना? असो आक्षेप घेतलो. लोकांचे प्रस्न मांडपाक आनी ताचेर उपाय काडपाक नेमान ग्रामसभा घेवपाची गरज आसता. मात पंचायत वांगडी एकतर्फी निर्णय घेता, असो आरोप नागरिकांनी केलो. ह्यान पयलींच्यो चार ग्रामसभा रद्द जाल्ल्यान ग्रामस्थां मदीं तिडक वाडल्या.
हाचेर सरपंच परेरा हांणी नागरिकांक समजावपाचो यत्न केलो. ही विशेष ग्रामसभा फकत अर्थसंकल्प मंजूर करपा खातीर आपयल्या. फाटल्या चार म्हयन्यां पसून कोयर संकलनाचे पयशे दिवचे उरल्यात आनी हेर खर्च बंद जाल्यात. हाका लागून लोकांचे सुविधे खातीरूच हो अर्थसंकल्प संमत करप गरजेचें आशिल्ल्याचें तांणी स्पश्ट केलें. ऍड. राधाराव ग्रॅसियस आनी नेली रॉड्रिग्ज हांचे सारकिल्ल्या कांय नागरिकांनीय सरपंचांचे भुमिकेक फाटबळ दिवन हेर विशय फुडले ग्रामसभेंत चर्चेक घेवपाची सुचवणी केली.
मात, सरपंचांनी आपली भुमिका कायम दवरतांच सचिवांनी अर्थसंकल्पाचें वाचन सुरू केलें. हाका लागून बेजारूच चडशे नागरीक सभाघरांतल्यान भायर गेले. उपरांत हजर राविल्ल्या कांय लोकांनी विचारिल्ल्या दुबावांचेर जापो दिले उपरांत सरपंच अँथिया लिन परेरा हांणी २०२५-२६ चो अर्थसंकल्प मंजूर जाल्ल्याचें जाहीर केलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
