भांगरभूंय | प्रतिनिधी
अंधेरनगरी चौपट राजा, गाडवूय गेलें आनी ब्रह्मचर्यूय गेलें, अश्यो म्हणी याद जावपाचें कारण म्हणल्यार गोंयची सध्याची परिस्थिती. सरकार सांगता, आमी नोकऱ्यो विकपाक काडूंक नात. जो कोण नोकरे खातीर पयशे मागता, ताची पुलिशेंत कागाळ करात. आमी कारवाय करतात. हे सगलें बरें आसा, पूण मागीर लोक नोकरे खातीर कोणाक पयशे दितात आनी ते घेवपी कोण हाची सरकारान खोलायेन चवकशी करपाक नाका?
गोंयांत पयलींच रोजगार कमी. खाजगी उद्देगांत गोंयकारांक 80 टक्के रोजगार दिवचो, अशें कितलेंय म्हणलें तरी कंपनींक जाय आशिल्ले ते – ते तरेचें कुशळ मनीसबळ आमचे कडेन आसा काय, हाचोय विचार जावपाक जाय. सरकारी नोकरी म्हणल्यार सगल्यांत सुरक्षीत, असो विचार गोंयकारां मदीं रुजला. ताका कारणूय तशेंच आसा. एकदां साम, दाम, दंड, भेद निती वापरून नोकरी मेळयली काय, सगलो हुस्को सोंपता. कारण सरकारी नोकरेंत तुमी स्वताच्या कामाची तांक, कुशळटाय वाडयली कितें वा ना वाडयली कितें, तुमचो पगार, सुटयो आनी बडटी चालूच उरता. म्हणून तर लोक सरकारी नोकरी मेळोवपाक सांगता तितले पयशे दिवपाक तयार आसतात. तशेंच दिल्ले पयशे सरकारी अधिकारी जातकच वेगवेगळे पद्दतीन वाशील करपाकूय मेळटात. भ्रश्टाचाराची सांखळूच तयार जाता.
गोंयांत येवन गब्बर जावपी वरिश्ठ अधिकारी, आमदार, मंत्री हांची बेनामी संपत्ती कशी वाडटा तर? नोकऱ्यांच्या बाजारांत अशी लुट चालू आसतना तपास यंत्रणेक ती कशी दिसना? हो भ्रश्टाचार खरेंच सोंपोवपाचो आसल्यार खर उपाय घेवचे पडटले. ते खातीर सरकाराची तयारी आसा काय होच खरो प्रस्न.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
