भांगरभूंय | प्रतिनिधी
भांगरभूंय । प्रतिनिधी
काणकोणः मागदाळ गालजीबाग हांगच्या हुंवार प्रवण वाठारांतल्या खाजन जमनींत मातयेचो भराव घालून न्हंयेचे देगेर बेकायदेशीर बांदकाम केला. बांदकाम केल्ल्याक थळाव्या पंचायतीच्या तलाठ्यान काम बंद करपाक सांगल्लें आसतनाय ते सुरूच आशिल्ल्यान काणकोणचो मामलेदार जितेंद्र बुगडे, सर्कल इन्स्पेक्टर रोहिदास गांवकार आनी तलाठी श्रीपाद पागी हाणी सर्वेयर नरेंद्र अग्रासनी हाच्या वांगडा बांदकाम सुवातेक भेट दिली. उपरांत फ्लाईंग स्कॅडाक हाडून हें बांदकाम बंद केले. बांदकाम करपा खातीर व्हडा प्रमाणांत कांदळीच्या झाडांची कत्तल केल्या.
2009 वर्सा काणकोणांत अकस्मात हुंवार येवन दोग जाणांक आपलो जीव वोगडावचो पडिल्लो. गालजीबाग वाठार हुंवार प्रवण आशिल्ल्यान थंय कसलेच तरेचें काम करपा पयली वेगवेगळ्या सरकारी खात्यांची परवाने घेवचे पडटात. मात थळावी पंचायत, राना खांतें तसेंच सीआरझेड प्राधिकरणाक काळखांद दवरून जमनीन मातयेचो भराव घालपाचें काम संबंदितांनी केले. हाका लागून पावसाच्या दिसांनी उदक वचपाची वाट बंद जावंन हुंवार येवपाची शक्यताय आशिल्ल्यान मामेलदार बुगडे हांणी काम बेगोबेग बंद करपाचो आदेश संबंदितांक दिलो.
खाजन जमीन पुरोवपा खातीर कोणा कडल्यान परवानगी घेवंक ना. ही सुवात सकल वाठारांत आशिल्ल्यान थंय भराव घातल्यार वयल्या वाठारांतल्या घरांक आनी मालमत्तेक धोको उप्रासपाक शकता. तलाठ्यान आठ दिसां आदीं काम बंद करपाक सांगल्लें. तरीय जमीन धनयनात तें बंद केलें ना अशें मामलेदार बुगडे हांणी पत्रकारांक सांगलें. बेकायदेशीरपणान दोंगोर फोडप, मात काडप, कांदळीचीं झाडां मारून उडोवप, खाजन जमीन पुरोवपाची कामा गालजीबाग वाठारांत सुरूच आसतात. थळावें पंचायत मंडळ कारवाय करपाक अनमतना ताका लागून बेकायदेशीर कामां करतल्यांक जल मेळटा अशें डायगो डिसिल्वा ह्या थळाव्यान सांगलें.
मामलेदाराच्या पंगडान फावडीं आनी कामा खातीर वापरल्ल्यो कायली जप्त केल्यात. खाजन जमनींत बांदकाम करपाक कृशी खात्यान परवानगी दिल्या काय किदें, अशें सहाय्यक कृशी संचालक नागेश कोमरपंत हांका विचारलें तेन्ना अस्तिमघाट येवजणे खाला आपल्या शेतांत उदक रिगचें न्हय म्हणून एक येवजण आसा आनी स्टेबिलायझेशन करपा खातीर कांय अटींक पाळो दिवन संबंदीत खात्याची परवानगी घेवची हे अटीचेर 31 मार्च 2024 मेरेन मुजत आशिल्ली परवानगी दिल्ली. मात आतां ताची मुजत सोपल्या अशे कोमरपंत हांणी सांगलें.
पैंगीणची सरपंच सविता तवडकार हांका विचारलें तेन्ना ह्या कामाक कसलीच परवानगी दिली अशी म्हायती तांणी दिली. कांदळीच्या झाडांची कत्तल केल्ल्या प्रकरणांत राना खात्यान संबंदितांचेर गुन्यांव नोंद केला अशें राना अधिकारी अनंत वेळीप हाणे सांगलें. जमीन पुरोवपाच्या कामाची पळोवणी करून वरिश्ठांक अहवाल धाडला असें मामलेदार बुगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
