भांगरभूंय | प्रतिनिधी
कारवाय करपाचे राष्ट्रपतींचे राज्य सरकाराक निर्देश
न्या. रिबेलो हांचे ‘आनीक सोंसू नेजो’ चळवळीक येस
लोकांच्या घोशणापत्रांत मांडिल्ल्यो 10 कलमी मागण्यो
भांगरभूंय | प्रतिनिधी
पणजी : न्या. फेर्दीन रिबेलो हांच्या फुडारपणा खाला ‘आनीक सोंसू नेजो’ ह्या आंदोलनांत मांडिल्ल्या 10 कलमी मागण्यांचेर कारवाय करपाचे निर्देश राष्ट्रपती द्रौपदी मुर्मू हांणी गोंय सरकाराक दिल्या. आपल्या 10 मागण्यांची प्रत रिबेलो हांणी राष्ट्रपतींक धाडिल्ली.
‘आनीक सोंसू नेजो’ हे चळवळीच्या प्रतिनिधीन दिल्ले म्हायती प्रमाण गांवांत जावपी अनियमीत बांदकामांक लागून बदलपी भुगोलीक आनी लोकसंख्याशास्त्रीय रचनेक गोंयच्या लोकांचो विरोध ह्या आशयाचें पत्र राष्ट्रपती कार्यालयांतल्यान गोंय सरकाराक आयलां.
हे विशींचो पत्र वेव्हार राष्ट्रपती भवनांतल्या, राष्ट्रपती सचिवालयाचे अव्वर सचिवान गृह खात्या कडेन केला. उपरांत गृह खात्यान राष्ट्रपती सचिवालयांतल्यान आयिल्लें पत्र आनी न्या. रिबेलो हांणी सादर केल्ल्या निवदेनाची प्रत नगर नियोजन खात्याचे मुखेल नगर नियोजक आनी महसूल खात्याचे अव्वर सचीव हांकां धाडून हे विशीं गरजेची कारवाय करपाक सांगलां, अशें प्रतिनिधीन सांगलां.
न्या. रिबेलो हांणी आनीक सोंसू नेजो हे चळवळींत समंत केल्ल्या लोकांच्या घोशणा पत्रांत मांडिल्ल्या 10 कलमी मागण्यांची दखल घेवपाची मागणी करपी पत्र राष्ट्रपती द्रौपदी मुर्मू हांकां 12 जानेवारी 2026 ह्या दिसा बरयल्लें. ह्या पत्राची आतां राष्ट्रपती कचेरेन दखल घेतल्या.
6 जानेवारी 2026 ह्या दिसा, गोंयचो सैमीक वाठार, पर्यावरण, आनी लोकसंख्येची विस्कटणी करपी बेकायदेशीर प्रकल्पां आड एकठांय आयिल्ल्या कार्यकर्त्यांनी आनी बिगर सरकारी संघटणांनी 10 कलमी मागणी मांडिल्ली. गांवांगांवांनी जावपी खासगी वसणुकेच्या सुमारा भायर बांदकामांक लागून उदक, वीज आनी नितळ पर्यावरणा सारक्या मुळाव्या हक्कांचेर हांवळ येतली आनी गोंयकार स्वताच्याच गांवा भायरे जातले. हे विशींची मागणी आमी प्रधानमंत्री नरेंद्र मोदी हांचे कडेन केल्या. देखून गोंयच्या अस्तित्वा खातीर आनी कोंकणी भाशेचे अस्मिताये खातीर केल्ल्या संघर्शाचो उगडास करून, गोंयचें सैमीक दायज आनी लोकसंख्या सांबाळपा खातीर प्रधानमंत्र्यांक ह्या 10 कलमी मागण्यांचेर रोखडीच पावलां उबारपा खातीर उगडास करून दिवचो अशी मागणी रिबेलो हांणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
