भांगरभूंय | प्रतिनिधी
सरकारी शाळा वा कॉलेज म्हण्टकच आमी नाक मुड्डिटात, पूण सरकारी नोकरेक मात आमी तशें करीनात? कांय राज्यांनी सरकारी शाळा, कॉलेजींतूच प्रवेश घेवपाची पद्दत अजुनूय आसा. मडगांव शारांत जायत्यो शिक्षणिक संस्था आसात, पूण त्यो खाजगी. एकसुऱ्या सरकारी कॉलेजीची म्हायती सगळ्यांक आसाच अशें ना. एक तडफदार फुडारपण कितें करूं शकता, हें मडगांवचे कॉलेजी कडेन पळोवन कळटा. बड्डें- मडगांवां 2010 सालांत सुरु केल्ले हे कॉलेजीन विद्यार्थ्यां खातीर खास कुशळटायेचो अभ्यासक्रम आसा. पदवी, पदव्युत्तर पदवीचे खास अभ्यासक्रम हे कॉलेजीचें खाशेलेंपण म्हणपाक जाय. मुख्यमंत्री डाॅ. प्रमोद सावंत तशेंच संचालक प्रसाद लोलयेंकार, भूषण सावयकार हांचे दूरदृश्टीक लागून हें कॉलेज नांवारूपाक आयलां. अर्थात प्राचार्य एफ एम नडाफ हांची धडपड लेगीत महत्वाची, हें आमी जाणून घेवपाक जाय.
आयटीआय कडेन आदल्या तेंपार जशे पळयताले तेच पद्दतीन व्होकेशनल विद्यार्थ्यांक पळयताले. तांकां बारावे उपरांत वाणिज्य फाट्याच्या विद्यार्थ्या वांगडा बसचें पडटालें हें मतीन दवरून हे कॉलेजीन वेवस्था केली आसतली. कारण कितेंय आसूं, आतां खंयच्याय फाट्याचे विद्यार्थी हे कॉलेजांतल्या कोर्साक प्रवेश घेंव शकतात. बीएस्,सी डेटा विज्ञान, एमएस्,सी जिओ इन्फॉर्मेटिक, बीकॉम, इंडस्ट्री बीकॉम, अकावंट्स आनी फायनान्स हे अभ्यासक्रम विद्यार्थ्यांक नोकरेच्या नजरेन महत्वाचे आसात. आनी गरजेचे लेगीत. सरकारमान्य आशिल्ल्यान तुमका भिरांत नासतना हातून प्रवेश घेवपाक जाता. खेरीज सरकारी आशिल्ल्या कारणान फी लेगीत परवडपा सारकी आसा. ज्या विद्यार्थ्याक संगणकाची आवड आसा, ताणें डेटा विज्ञान विशय जरूर घेवचो. सद्याच्या काळांतलो तो महत्वाचो कोर्स. ताचें शिक्षण दिवपाक काय लोकप्रीय संस्थां वांगडा तांणी कबलातूय केल्या.
बीकॉमा सारको अभ्यासक्रम जरी पारंपरिक दिसलो तरी ह्या फाट्यान खूब कितें करपाची तांक आसा. खास करून हिशेबाचे नजरेन. डेटा सायन्स ह्या फाट्याक भरपूर मागणी आसा. नेटाक लागून ह्या फांट्यांक चड महत्व आयलां. तुमी जेन्ना यु ट्यूब, खंयच्याय संकेतथळाचेर पळयतात, ताच्या उपरांत आमकां तें कांय अडचण पडनासताना फुडले खेपेक दिसता. हें सगळें डेटा सायन्सा खातीर जाता. म्हायती एकठांय करप हें ताचें मुखेल काम. अर्थात हें सगळें तुमकां तो अभ्यासक्रम शिकतकूच कळटलें. एक्स रे, सिटी स्कॅन, एमआरआय हे खातीर तर डेटा सायन्स जायच. डेटा एनलिस्ट, सिनियर इन्फॉर्मेशन एनेलीस्ट, युटिलिटी हॉस्पिटल्स सारख्या सुवातींनी तुमकां नोकरी मेळुं शकता. ह्या कॉलेजीचे प्राचार्य नडाफ विद्यार्थ्यांक ह्या कोर्साची म्हायती दिवपाचें काम वेळांत वेळ काडून करतात. त्यांचेर दोन कडल्यो जबाबदारी आसून लेगीत हो वावर ते करतात. म्हणून तर हें कॉलेज ह्या शारान सर्त आसुनूय लोकप्रीय जालां.
दुसरो कोर्स आसा तो भुगोलाक लागीं आशिल्लो. ह्या संवसारांतले म्हायतीचें संकलन, संघटन सारक्यो गजाली ह्या कोर्सांतल्यान जावपाक शकतात. हाचे मजतीन तुमी एखाद्या शाराचो नक्सो तयार करूं शकतात. हो अभ्यासक्रम तुमकां सगळ्या गजालीं खातीर उपेगाचो आसा. खाशेली गजाल म्हळ्यार हे कोर्स आनीक खंयचाच कॉलेजींनी मेळनात. म्हणूनच तर ते म्हत्वाचे आसात, खेरीज ताची म्हायती सगळ्यांक आसपाक जाय अशें प्राचार्य नडाफ हांचें मत. विंगड विंगड कार्यावळींतल्यान ते विद्यार्थ्यां मदीं जागृताय करतात. विद्यार्थ्यांनी ह्या कोर्सांचो लाव घेवचो, अशें तांचें म्हण्णें आसा. सरकारी कॉलेजांनी अशे कोर्स आसप हे विद्यार्थ्यांचे नजरेन खास करून मडगांवच्या विद्यार्थ्यां खातीर तर खूब मोलादीक गजाल. मुख्यमंत्री डाॅ. प्रमोद सावंत, भूषण सावयकार प्राचार्य एम नडाफ, प्रसाद लोलयेंकार हांणी फुडली गरज वळखून हें सुरू केलां, हें म्हत्वाचें. इण्डस्ट्री इंटिग्रेटशन हो विशय तसो सगळ्यांक नवो. ह्या नव्या विशयांक लागून हे काॅलेजींत प्रवेश घेवप गरजेचें आसा.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
