माक्नां घेवपा खातीर देड हजार शेतकारांक सरकारी अनुदान

भांगरभूंय | प्रतिनिधी

सरकारा कडल्यान अंदूं 1.31 कोटींचें अनुदान

भांगरभूंय । समीप नार्वेंकार

पणजी : शेतकी वेवसायाक तंत्रगिन्याची जोड दिवपा खातीर 2024-25 त देड हजार परस चड शेतकारांनी सरकारी अनुदानाचेर ट्रॅक्टर, हार्वेस्टर सारिक्कीलीं माक्नां विकत घेतल्यात. हे खातीर सरकारान ह्या एका वर्सा भितर चार कोटी मेरेनचें अनुदान शेतकारांक दिलां. पोरूंचे तुळेंत लाव घेवपी शेतकारां मदीं अंदूं उणाव दिसून आयला.

शेतकी खातें शेतांत लागपी गरजेच्या माक्नांचेर अनुदान दिवपाची खाशेली येवजण चालीक लायता. शेतकी मळार तंत्रगिन्यानांक उर्बा दिवपाचे येवजणे खाला गोंयच्या शेतकारांक वीड कटर, पावर टीलर, ट्रॅक्टर, हारवेस्टर विकत घेवपाक अनुदान मेळटा. दर माक्ना फाटल्यान उण्यांत उणें 50 टक्के जाल्यार चडांत चड 90 टक्के अनुदान मेळटा. एसटी समुदाया खातीर आनी वीड कटरां खातीर 90 टक्के अनुदान मेळटा. हे खातीर एसटी समुदायान माक्नाचेर फक्त 10 टक्के पयशे मोडपाक जाय, उरिल्ले सरकार दिता. जाल्यार हेर सामान्य वर्गा खातीर 50 टक्के अनुदान आसा. हे खातीर शेतकारान अर्दे पयशे फारीक करचे आनी उरिल्ले अर्दे पयशे सरकार दितलें.

2024-25 त 1600 शेतकारां मेरेन हे येवजणेचो लाव पावोवपाची मोख शेतकी खात्यान दवरिल्ली. पुण तातूंतले 95 टक्के म्हणल्यार 1532 शेतकारांनी हे येवजणेचो लाव घेतला. हे येवजणे खातीर केंद्र सरकारान 3.05 कोटी आनी राज्य सरकारान 1.37 कोटी मेळून 4.42 कोटी निधी मंजूर केल्लो. तातूंतले 4.11 कोटी इतलो निधी शेतकारांक अनुदान म्हूण दिला. ह्या अनुदाना भितर केंद्र सरकाराचो वांटो 2.96 कोटी (96.91) टक्के आनी राज्य सरकाराचो 1.15 कोटी (83.39) टक्के इतलो वांटो आसा.

2023-24 चे तुळेंत 2024-25 त निधी मंजूर करपांत आनी अनुदान दिवपांत वाड दिसून आयल्या. पूण हे येवजणेचो लाव घेवपी शेतकारांचो मात उणाव दिसून आयला.

2023-24 त 2145 शेतकारांनी हे येवजणेचो लाव घेतिल्लो, 2024-25 त शेतकारांचो आंकडो 613 मेरेन देंवला. जाल्यार 2023-24 त केंद्र आनी राज्य सरकार मेळून 3 कोटींचो निधी हे येवजणे खातीर मंजूर करून 1.31 कोटी मेरेनचें अनुदान दिल्लें. ह्या निधीची 2024-25 कडेन तुळा केल्यार मंजूर केल्ल्या निधींत 1.42 कोटी आनी अनुदानांत 2.80 कोटींची वाड नोंद जाल्या.

फाटले तीन वर्सात हे येवजणेचो लाव घेवपी शेतकाऱ्यांच्या आंकड्यांत सेगीत उणाव दिसून आयला. 2021-22 त 3038 शेतकारांनी, 2022-23 त 2886 शेतकारांनी, 2023-24 त 2145 शेतकारांनी आनी 2024-25 त 1532 शेतकारांनी हे येवजणेचो लाव घेवन माक्नां विकतीं घेतल्यांत. फाटल्या पांच वर्सांत 12,368 शेतकारांनी हे येवजणेच्या अनुदानाचो लाव घेवन सरकारान 18.27 कोटींचें अनुदान दिलां.