भांगरभूंय | प्रतिनिधी
माकोडमाम मनांतल्या मनांत समजलो. आपणें लिपुन वचप ना. धर्मुचें म्हणणें ताका आवडलें. “हांव सरळ वतलों” मनांत म्हणलें. पूण मनांत आयलें ” राणी आनी हेर चाकर म्हाका भितर कशें घेतले? ”
बरोबर म्हणलें बावलेन, रांनांतल्या माकडाक कोण भितर घेतलो? मागीर धर्मुचो उपाय चालीक लायलो. भायर राखपी चाकरा कडेन माकोडमामान इश्टागत केली.
” केळीं, आंबे खाले पूण मागुन”
जाणांत तुमी? एक दीस धर्मुन ताका पोरसांतल्या फाटले बागेतलो पिको पणस खावपाक दिलो.
“कितें? “
“पिको?”
“तांणे घोस्तान खालो”.
“चार व्हरुंन माडामुळांत पुरली”.
“व्वा ! इतलो शाणो जालो माकोडमाम?”.
“अजाप म्हणपाचें” प्रणवान म्हणलें.
“अजाप न्हय शाणेपणान वागपाक शिकलो. तरी माथें खरपीतालो? ”
” हय, हय ” बावलेन म्हणटांच सगळी हांसलीं.
” तशें कोणाक हांसचे न्हय ” बावलेन सांगलें.
” पूण आमकां कॉमेडी दिसता.
”ताची स्टायलच वेगळी. मदींच दांत भायर काडुन खीं खीं करुंन हांसता “.
” कॉमेडी बरी आसा पूण ताका कमी समजु नाकात. ताकाय बुद्द आसा , विसर नाकात “.
बावली आनी भुरग्यांचे उलोवप … बरीच मजा आयली.
माकोडमाम आतां जेन्ना वतालो, तेन्ना वेगळो आवाज काडटालो. तांणें गळ्यात धोलकें घाल्लें. दारा भायर रावन तो धोलकें वाजयतालो. आवाजान सगळीं धांवत जनेलांतल्यान पळयताली.
“माकोडमाम, आयलो!! ” म्हणटांच शेपटी माथ्यार घेतालो.
जाणांत तुमी ताका बरी एक्टींग येता. ताका नाचप ,रडप, हांसप, लजप तकली सकल पांय वयर करुंन चलप, गोलांटी मारप , दोन पांयार चलप ” अशें करता तें पळोवंक मेळटा .
बावलेची काणी ” फट ” दिसपाची पूण तशें जालें ना. भुरगीं खरींच आनंदीत जालीं.
” माकोड…….हिरो….न्हय?”
प्रणव रेवा…………..
रेवा रश्मी, रायन हांचे कडेन उलयत रावलीं
” माकेडमाम धोलकें वाजयता? ताका कोणे शिकयलें वाजोवंक ?”
रानांत माकडाक धरुंन सर्कशींत व्हरपाक , कांय जाणांचे पंगड येताले. दोगां तिगांक तांणें धरले, तांतूत माकोडमाम सांपडलो. ताका फकत वाजोवंक शिकयिल्लें. तें जाता जाता तो पळुन आयलो. दोंगुलेच्या लागसारच ते तांकां ट्रेन करताले.
माकडाक फकत धोलुक वाजोवंक बरें येतालें. धोलकाच्या आवाजार लागसारची सुकणीं जनांवरां कान वयर करुंन आयकूंक लागलीं. हरण, सोशे, हुंदीर …..कांय सुकणीं आवाजान शेणून वतालीं. उडत येवन कोण कितें वाजयता हाचो अदमास घेवंक लागलीं. कांय माकड माकोडमामाच्या धोलाच्या तालार नाचपाक लागले.
व्वा ! व्वा ! करुंन नाचता नाचतां माकोडमामुय तांचे मदलो एक जांवन बसलो.
होळयेच्या दिसा माकोडमाम बंगल्याच्या दारांत होळी रंग आनी धोलकी हाजी मजा घेत रावलो. राणी खासा हे पळोवंक भायर आयली. बंगल्यातले चाकर हेर सगले आंगणांत पावले. माकडांक हेरांक नाचतना पळोवन सगली पोट धरुंन हांसली. माकडाची तोंडां, स्टायली, नाच म्हणल्यार ” कॉमेडीयन” चार्ली चॅप्लीन कसो दिसतालो.
निमाणे धर्मुक सगळ्या माकडांनी माथ्यार घेतलो…. वयर उबारुन घेवन खादांर बसोवन नाचपाक लागले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
