भांगरभूंय | प्रतिनिधी
अमेरिकी नागरिकांनी ट्रम्प हांकां वेंचून दिवपाची एकदां न्हय जाल्यार दोन फावटी चूक केल्या. ताचे परिणाम संवसाराक भोगचे पडूंक लागल्यात.
माकडाच्या हातांत कोलीत अशी एक म्हण आसा. हाचो अर्थ माकड हो मुळांत सामको अस्वस्थ प्राणी. तो सेगीत कसले ना कसले तरी चाळे करीत आसता. ताका लागून हेरांक ताचो उपद्रव जायत आसता. ह्या उपद्रवाक लागून हेरांक त्रास जाता. पूण त्या माकडाक मात ताचें कांयच दिसना. उरफाटें हेरांक जायत आशिल्ले त्रास पळोवन ताका मजा येता. ताका लागून तो चड चाळे करूंक लागता. ताका हेरांनी कितलोय आडावपाचो यत्न केलो तरी तो काय थांबना. अशा माकडाच्या हातांत कोलीत म्हणल्यार जळटें लांकूड सांपडत जाल्यार तो माकड वचत थंय उजो लायत वता. उजो लागिल्ल्यान व्हड लुकसाण जायत आसा हाचें ताका कांयच पडिल्लें नासता. हेर लोक हुलपतात हें पळोवन ताका मजा दिसता. इतलेंच न्हय त्या उज्यांत हेरां सयत आपूणय हुलपून वतलों इतलें समजुपा इतली ताका बुद्धय नासता. हाका लागून त्या माकडाक कशें आडावचें असो प्रस्न लोकांक पडटा. ह्या माकडाची भुमिका सद्या अमेरिकेचे राष्ट्राध्यक्ष डोनाल्ड ट्रम्प पार पाडीत आसात. इझ्रायल आनी आखातांतल्या कांय देशां मदीं जें झूज सुरू आसा. तातूंत ट्रम्प हांणी अमेरिकेक इझ्रायलाचे वटेन देंवयलो. आखातांत इराण हो इझ्रायला आड झुजपी प्रबळ देश. इराणान अणूबॉम विकसीत केला अशी म्हायती आसा. ताका लागून फाल्यां झुजाची खरताय वाडली जाल्यार आपल्याचेर ताचो वापर जावंक शकता, ताका लागून इझ्रायलाक ताची भिरांत दिसता.
इराणाचे सर्वेसर्वा अयातुल्ला अली खामेनी हांकां जिवेशी मारले उपरांत इराण शरण येतलो अशें डोनाल्ड ट्रम्प आनी इझ्रायलाचे प्रधानमंत्री नेतान्याहू हांकां दिसतालें. पूण तशें कांय जातना दिसून येना. आतां ह्या झुजाक म्हयनो जावन गेलो. झूज सुरू आशिल्ल्यान फक्त भारताचेरूच न्हय जाल्यार संवसारांतल्या विवीध देशांनी इंधनाचो व्हड प्रमाणांत उणाव निर्माण जाला. इंधन नाशिल्ल्यान ताचो परिणाम फक्त रस्त्यारूच धांवपी गाडयांचेर न्हय जाल्यार रांदचेकुडींत लागपी गॅस लेगीत मेळप कठीण जालां. ताचें कारण इराणाचे कुशीक आशिल्ल्या होर्मुझ दर्या मार्गांतल्यान जावपी इंधनाचे येरादारीचेर इराणान बंदी घाल्या. अशे तरेन तांणी संवसारभरांतल्या विवीध देशांनी वचपी इंधनाची पुरवण बंद केल्या. भारताक ताचो चड फटको बसत आसा. कारण भारत हो इंधना खातीर चडश्या आखाती देशांचेर निंबून आसा.
तेच बराबर इझ्रायलाक अमेरिकेचो तेंको आशिल्ल्यान आखाती देशांचेर जावपी हल्ले ते थांबोवपाक तयार नात. उरफाटें इझ्रायाचे प्रधानमंत्री नेत्यान्याहू संवसारांतल्या देशांक आपल्याक तेंको दिवन इराणाक हारोवपाचें आवाहन करीत आसात. पूण तांकां कोणूच प्रतिसाद दिनात. इराणच्या झुजांत अमेरिका आपल्या इश्ट राष्ट्रांक ओडपाचो खर यत्न करीत आसा. पूण ताका कोणूच प्रतिसाद दिना. कारण ह्या झुजांत संवसारभरांतल्या देशांची इंधनाची कोंयडी तर जाल्याच, पूण ह्या झुजाक लागून आखाती देशांतले आनी इझ्रायलांतले व्हड प्रमाणांत मनीस लुकसाण जालां. मालमत्तेचें व्हड प्रमाणांत लुकसाण जायत आसा. घरां, इमराती मातयेभरवण जायत आसात. मुळाव्यो सुविधा नश्ट जायत आसात. ताका लागून सुमारा भायर नरसंहार करपी हें झूज थांबोवचें अशें संवसारभरांतल्या खूबशा देशां सयत अमेरिकी लोकांकूय दिसता. कारण आतां संवसारभरांतले लोक अमेरिकी नागरिकांकूय दोश दिवंक लागल्यात. कारण तुमचो अध्यक्ष संवसाराचेर झूज लादून खूबशा जाणांचें जगप कठीण करीत आसा अशे आरोप समाजा माध्यमांचेर जायत आसात.
ट्रम्प आनी झूज थांबोवचें, हल्ले करचे न्हय हे खातीर अमेरिकेच्या विवीध राज्यां सयत युरोपांतल्या कांय देशांतले लोक शेनवारा रस्त्यार आयिल्ले. ‘नो किंग्ज’ निदर्शनां मदीं ते वांटेकार जाल्ले. ट्रम्प हांचे आड घोशणाबाजी केली. अमेरिकेंतल्या मिनीसोटा, न्यूयॉर्क, वॉशिंग्टन डीसी, डल्लास, फिलाडेल्फिया, लॉसएंजेलीस, सिएटल तशेंच लंडन, पॅरीस आनी रोमांत लोक व्हड संख्येन रस्त्यार देंविल्ले. संवसारभरांतल्यान ट्रम्प हांच्या झुजाच्या धोरणाक लागून लोकांची तिडक वाडत आसा.
हाचे पयलीं ट्रम्पान व्हिनिझुएलाच्या अध्यक्षांक उबारून व्हेलो. आतां इराणाचेर हल्ले सुरू केल्यात. ताचे उपरांत क्युबाचो नंबर आसा अशें ते सांगत आसात. ट्रम्प हांची ही मनमानी लोकांक आतां नाका अशी दिसूंक लागल्या. ताका लागून संवसारभरांतल्या लोकांचो ट्रम्प हांचे सयत अमेरिकेंतल्या नागरिकां आडची तिडक वाडत चल्ल्या. कारण अमेरिका ही अटलांटीक महासागराच्या पेल्यान सुरक्षीत आसा. जाल्यार दुसरे वटेन आशिल्ल्या संवसारांतल्या देशांक ह्या आखाती झुजाक लागून सुमारा भायर त्रास जायत आसात. भारतांतले सुमार एक कोटी लोक आखातांतल्या विवीध देशांनी काम करतात. ट्रम्प हांणी वाडीव आयात कराच्या माध्यमांतल्यान तशेंच भारतीय नागरिकांक भारतांत परतून धाडपाचो पवित्रो घेतिल्ल्यान भारताचे प्रधानमंत्री नरेंद्र मोदी ट्रम्प हांचे आड आक्रमक भाशेचो वापर करूंक शकनात. ट्रम्प हांणी इझ्रायलाक मजत दिवप थांबयत जाल्यार झुजाची खरताय उणी जातली. ट्रम्प हांकां आळो घालपा खातीर फक्त अमेरिका आनी युरोप न्हय जाल्यार पुराय संवसाराक रस्त्यार देंवपाची गरज आसा. कारण ह्या झुजांत जे तेलाचे सांठे उद्धवस्त जायत आसात ताका लागून अख्ख्या संवसाराक तें मारक थारपाचें आसा. अमेरिकी नागरिकांनी ट्रम्प हांकां वेंचून दिवपाची एकदां न्हय जाल्यार दोन फावटी चूक केल्या. ताचे परिणाम संवसाराक भोगचे पडूंक लागल्यात.
शिवाजी चौगुले
9867732504
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
