माउंट एव्हरेस्ट 30 फावटीं चडून मोडलो स्वताचोच विक्रम
भांगरभूंय | प्रतिनिधी
नवी दिल्ली, खबरां संस्था ः संवसारांतलो सगळ्यांत उंचायेचो माऊंट एव्हरेस्ट पर्वताचेर एक नेपाळी नागरीक एक- दोन फावटीं न्हय तर 30 फावटीं चडला. ताचें नांव कामी शेर्पा रीता. ताणें परत एक फावट आपलोच विक्रम मोडला. कामी शेर्पा रीतान इतिहास रचून संवसारा मुखार एक व्हडली देख दवरल्या. ताची ‘एव्हरेस्ट मॅन’ म्हणून वळख निर्माण जाल्या. एव्हरेस्टाचेर 30 फावटीं चडपी तो एकलोच गिर्यारोहक.
कामी पयलेच खेपे 1994 वर्सा माउंट एव्हरेस्ट चडलो. ताचो चडपाचो प्रवास 1992 वर्सा सुरू जाल्लो. तो पयलीं चडपाचो सहाय्यक कर्मचारी म्हणून शिखर मोहिमांनी वांटो घेतालो. ताका ल्हानपणा सावन दोंगर चडपाची आवड आशिल्ली. कामी मूळ नेपाळांतलो. मजगतीं, तो संवसारांतल्या कांय आव्हानात्मक शिखरांचेरुय चडला.
कामी रीता शेर्पाचो जल्म 1970 वर्सा नेपाळांतल्या थामे वाठारांत जालो. 13 मे 1994 दिसा पिरायेच्या 24 व्या वर्सा तो पयलेच खेपे माउंट एव्हरेस्ट चडलो. 1994 ते 2024 ह्या काळांत कामी 30 फावटीं माउंट एव्हरेस्ट चडलां. हाचे आदीं तो सेव्हन समिट ट्रेक्स एव्हरेस्ट मोहीम 2023 चो भाग म्हणून 29 वे खेपे एव्हरेस्ट चडलो.
मजगतीं, आतां ताणें 30 वे खेपे एव्हरेस्ट चडून आपलोच विक्रम मोडून इतिहास निर्माण केला. हाचे आदीं तो माउंट के 2, माउंट ल्होत्से, माउंट मानस्लू आनी माउंट चो ओयू ह्या शिखरांचेरय चडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
