माउंट एव्हरेस्टाच्या बेस कॅम्पांत विक्रम करपी संवसारांतलो सगळ्यांत ल्हान भुरगो
भांगरभूंय | प्रतिनिधी
स्कॉटलंड, खबरां संस्था ः स्कॉटलंडांत रावपी 2 वर्सांचो कार्टर डलास माउंट एव्हरेस्टाच्या बेस कॅम्पांत पावपी सगळ्यांत ल्हान भुरगो थारलो. मिरर युकेच्या म्हणण्या प्रमाण हो विक्रम हाचे पयलीं झेक प्रजासत्ताकांतल्या चार वर्सां पिरायेच्या भुरग्याच्या नांवार आशिल्लो. कार्टरान आवय जेड आनी बापूय रॉस हांच्या फाटीर बसून माउंट एव्हरेस्ट बेस कॅम्पांतलो प्रवास पुराय केलो.
मुळ स्कॉटलंडांतले रॉस आनी जेड आपल्या पुता वांगडा आशियाच्या वर्सभर भोंवडेर आसात. 25 ऑक्टोबराक नेपाळांतल्या दर्याथरा सावन 17,598 फूट उंचायेचेर आशिल्ल्या दक्षिणे कडल्या बिंदूचेर चडून हे तिगूय बेस कॅम्पांत पावले.
कार्टर आमचे परस चड उमेदी आशिल्लो…
तिगूय ऑक्टोबर 2023 वर्सा दोंगर चडपाचे आशिल्ले. ताचेर उलयतना रॉसान म्हणलें – कार्टर आमचे परस चड उत्सुक दिसतालो. जेड आनी म्हाका उंचायेचेर स्वास घेवपाक मात्सो त्रास जातालो पूण कार्टर बरो आशिल्लो. बेस कॅम्पाच्या आदीं दोन गांवच्या दोतोरांची नेमणूक जाली. तांणी आमची रगत तपासणी केली. कार्टर आमचे परस भलायकेन बरो आशिल्लो.
नेपाळ पावतकच 24 वरां भितर चडपाक सुरवात…
रॉसान म्हणलें- आमी ट्रेकिंगाक एक फूड जॅकेट आनी दोन स्लीपिंग बॅग घेतिल्लीं. काठमांडू पावतकच २४ वरां भितर आमी चडपाक सुरवात केली. आमी पयलींच तयार आशिल्ले. डीप ब्रीदिंग घेवपाचें आमी नेमान सराव करताले. आमी घरांत बर्फाच्या उदकांत न्हाताले. बेस कॅम्पांत कसलोच त्रास जावचो न्हय म्हणून कार्टराकय ह्या उदकांत न्हाणयल्लें.
पयलीं भारतांत आयले….
स्कॉटलंड सोडले उपरांत रॉस, जेड आनी कार्टर पयलीं भारतांत आयले. उपरांत श्रीलंका आनी मालदीव गेले. थंय सावन ते परत भारतांत आयलो आनी उपरांत नेपाळाक गेले. चडले उपरांत हें कुटुंब मलेशियाक गेलें. हांगा एका लग्न सुवाळ्याक हाजीर रावले आनी उपरांत कार्टराचो वाडदीस मनोवपाक सिंगापूराक गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
