भांगरभूंय | प्रतिनिधी
म्हापशें : मांद्रें वाठारांतल्या म्हारिंगण देवळा लागसार जाल्ल्या स्वयं अपघातांत शुभानंद गडेकार (४६, शिरगाळ, धारगळ) ह्या पुलीस कॉन्स्टेबलाक मरण आयलें. ड्युटेक वतना गडेकार हांकां अपघात जालो. ते शिवोले दर्यादेग पुलीस स्टेशनांत सेवा दिताले. आज ‘सागर कवच मोहीम’ आशिल्ल्यान गडेकार दुचाकी वेल्यान आश्वें-मांद्रें दर्यादेगेर ड्युटीचेर जातना हो अपघात घडलो.
दुचाकी वयलें नियंत्रण सुटिल्ल्यान घडणुके सुवातेर आशिल्ले दुचाकी दुरुस्ती करपी गॅरेजींत ताची दुचाकी घुसली आनी तो जखमी जालो. उपरांत ताका तुयें हॉस्पिटलांत व्हेलो. थंय दोतोरांनी ताका मरण आयिल्ल्याचें सांगलें.
मांद्रें पुलिसांनी पंचनामो केला. फुडलो तपास पुलीस करतात. ह्या अपघातांत वांगडी कर्मचारी वगडायिल्ल्यान पुलिसांनी दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
