भांगरभूंय | प्रतिनिधी
११ जाणांक घेतले ताब्यांत
पेडणें: हरमल, केरी आनी मोरजी ह्या दर्यादेग वाठारांनी २०२३ ते २०२५ मजगतीं ३० परदेशी नागरीक चड-वेळ राविल्ल्याचें दिसून आयलें, अशी म्हायती मुख्यमंत्री डॉ. प्रमोद सावंत हांणी आमदार जीत आरोलकार हांच्या प्रस्नाक विधानसभेंत दिल्ले लेखी जापेंतल्यान मुखार आयली.
ह्या प्रकरणांत १९ परदेशी नागरिकां आड पुलीस स्टेशनांत गुन्यांव दाखल केल्यात. जाल्यार ११ जाणांक परप्रांतीय नोंदणी कार्यालया वरवीं ताब्यांत घेतले वा गृहबंदीच्या आदेशा खाला दवरले. हातुंतलीं फकत दोन प्रकरणां २०२३-२४ मजगतीं नोंद केल्लीं, जाल्यार २०२४-२५ वर्सा हो आंकडो अचकीत २८ चेर पावलो, जाका लागून ही गजाल सामकी गंभीर जावन पडल्या.
गुन्यांव दाखल जाल्ल्या सगल्या १९ जाणांक अटक केल्या, तांकां रु. १०,००० दंड तशेंच १० दिसां पसून ३ म्हयन्यां मेरेन बंदखणीची ख्यास्त आयकयल्या. एका प्रकरणांत चार परदेशींक ख्यास्त जाल्या, तिगांक २ म्हयने २४ दीस आनी एका आरोपीक ३ म्हयने ८ दिसांची ख्यास्त आयकयिल्ली.
चडशीं प्रकरणां हरमल वाठारांत मेळ्ळीं. उपरांत मांद्रें, मोरजी आनी हेर दर्यादेग वाठारांनी. आतां मेरेन १८ परदेशी नागरिकांक तांच्या मूळ देशांत परत धाडल्यात. ११ परदेशी नागरीक आजूनय डिटेन्शन सेंटरांत वा बंदखणींत आसात. ते एफआरआरओच्या आदेशाची वाट पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
