भांगरभूंय | प्रतिनिधी
वाट आडावन प्रकल्पाचें काम सुरूः थळावे लोक चाळावल्यात
भांगरभूंय । प्रतिनिधी
पेडणें: मांद्रेंच्या आस्कावाड्या वयले मसुंडे कडेन वचपी वाट आडावन उदरगत प्रकल्पा खातीर काम सुरू केल्ल्यान थळावे लोक चाळावल्यात. ह्या प्रकरणांत थळाव्या लोकांनी उत्तर गोंय जिल्होधिकाऱ्या सयत साबार सरकारी कार्यालयां आनी पंचायती कडेन निवेदन सादर केलां.
पेडणें म्हालांत मसुंडीचो प्रस्न खर जाला. खूबशा गांवांनी ह्या प्रस्ना वयल्यान वाद जातात. रस्तो, पांयवाटो आडावपाचे प्रकार चल्ल्यात. आस्कावाड्यार लेगीत असोच प्रकार घडला.
आस्कावाड्या वयले मसुंडे कडेन वचपी वाट ना करून थंय उदरगत प्रकल्पाचें काम सुरू केलां. ते खातीर कसलोच कायदेशीर परवानो घेवंक ना. जेसीबी मशिना वरवीं जमीन सपाट करपाचें काम सुरू केलां. ताका लागून झाडांय मारल्यात, हे खातीर लोक बेजार जाल्यात. थळावे परशुराम वासुदेव नायक, वासुदेव परशुराम नायक आनी मनोहर वासुदेव नायक हांचे कडेन थळाव्या लोकांनी मसुंडेची वाट सोडून काम करपाची विनवणी केली. पूण तांची ही विनवणी तांणी भायर मारल्या.
हेच वाटेन थळावे लोक ब्राह्मण देव, राष्ट्रोळी देव, पीर ह्या श्रद्धास्थानांचेर वतात. परंपरे प्रमाण तिती विधी करतात. वाट ना जाल्ल्यान लोकांनी थंय कशे वच्चे, असो प्रस्न थळाव्या लोकांनी उपस्थीत केला. आमच्या न्याय्य आनी हक्काचे मागणे खातीर कसलोय लडो दिवपाक तयार आशिल्ल्याचें थळाव्या लोकांनी म्हणलां.
थळाव्या लोकांनी वयल्या तिनूय मनशां आड पंचायतींत कागाळ केली. सचिवान काम सुरू आशिल्ल्या वाठाराक भेट दिवन कामाची पळोवणी केली आनी फुडली सुचोवणे मेरेन काम करचें न्हय अशी विनवणी केली. पूण ती लेगीत त्या मनशांनी भायर मारली. मजगतीं, थळावी पंच वांगडी तशेंच उपसरपंच तारा बाबुसो हडफडकार हांणी ह्या प्रकाराची गंभीर दखल घेतल्या. तांणी सगळ्या संबंदीत सरकारी अधिकाऱ्यां कडेन कारवाय करपाची मागणी करून लोकांचे फुडारांतले समस्ये कडेन लक्ष ओडलां.
थळाव्या लोकांचें साबार अधिकाऱ्यांक निवेदन
मसुंडेची वाट आडयिल्ले खातीर थळाव्या लोकांनी उपजिल्होधिकारी, नगर नियोजन खातें, पंचायत संचालक, रान खातें, पुलीस म्हासंचालक, कृशी खातें, प्रदुशण नियंत्रण मंडळ तशेंच उपजिल्होधिकारी पेडणें, गटविकास अधिकारी, उपनगर नियोजक, रान अधिकारी, मांद्रें सरपंच, सचीव हांचे कडेन कागाळ करून तें काम ताकतिकेन बंद करचें. तशेंच योग्य ती कारवाय करची, अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
