भांगरभूंय | प्रतिनिधी
सरपंच अॅड. अमीत सावंत हांचो फुडाकार; महिला दिसा निमतान संगीत कार्यावळी
भांगरभूंय । प्रतिनिधी
पेडणें: 6 मार्चाक होळी मनयली. ते उपरांत धुळवड जाली. दोन दीस कांय वाठारांनी संगीत पार्ट्यो आयोजीत करपाक मेकळीक दिल्ली. पूण होळयेच्या तिसऱ्या दिसाय संवसारीक महिला दिसा निमतान दर्यादेग वाठारांतल्या कांय क्लब आनी रॅस्टोरंण्टांनी व्हड आवाजांत संगीत पार्ट्यो आयोजीत केल्ल्यो. होळयेच्यो पार्ट्यो म्हूण पावला पावलाचेर तकटे लायिल्ले. तातूंतल्या कांय जाणांनी दनपारां 2 ते रातच्या 10 वरां मेरेन जाल्यार कांय जाणांनी सकाळीं 8 ते दनपारां 2 वरां मेरेन परवाने घेतिल्ले. जाल्यार कांय जाणांनी परवानेच घेवंक नाशिल्ले. कांय वेवसायीक सांगलें, परवाने खंय मेळटात ते खबर नात. ते एका खंयच्या तरी अधिकाऱ्याक मेळ्ळे, तांणी सांगलें परवान्याची गरज ना. सरपंच अॅड. अमीत सावंत घडणुकेचे सुवातेचेर गेले तेन्ना तांकांय ह्योच जापो आयकूंक मेळ्ळ्यो.
आश्वें मांद्रें दर्यादेग वाठारांत एके वटेन मेळत तश्यो गाडयो पार्क केल्ल्यान येरादारेची कोयंडी जाल्यार दुसरे वटेन होळयेच्या नांवान तिसऱ्या दिसाय पार्ट्यांचें बेकायदो आयोजन केलां, अशी म्हायती मांद्रेंचे सरपंच अॅड. सावंत हांकां मेळटकच ताकतिकेन ते घडणुकेचे सुवातेचेर गेले. परवाने नात जाल्यार पार्ट्यो बंद करात अशें दोन तीन सुवातांचेर तांणी आयोजकांक विनवणी केली. तेचवरी पार्ट्यो बंद केल्यो नात जाल्यार पंचायती वतीन कारवाय करपाची शिटकावणी दिली. ते उपरांत कांय जाणांनी पार्टो बंद केल्यो. मात कांय जाणांनी पार्टो चालूच दवरिल्ल्यो.
आवाजाचें प्रदुशण करपी पार्ट्यो अजून लेगीत नेमान चलतात. ते भायर हेर बेकायदो वेव्हारूय चालू आसात. हाका लागून मांद्रें गांवाचें नांव इबाडटा. हे बेकायदो वेव्हार ताकतिकेन बंद केले नात जाल्यार तांचेर पंचायती वतीन योग्य ती चवकशी करून कारवाय करचे खातीर सरकार दरबारांत यत्न करतले, अशें अॅड. सावंत हांणी सांगलें. पेडणें म्हालांतल्या मोरजी, आश्वें- मांद्रें, हरमल, केरी ह्या दर्यादेग वाठारांत शिगम्या निमतान होळी मनोवचे खातीर आनी धुळवडीचो आनंद घेवचे खातीर देशी पर्यटकांची गर्दी वाडल्या. हाचोच फायदो घेवन कांय रॅस्टोरंण्ट वेवसायिकांनी संगीत पार्ट्यांचें आयोजन केलां. उच्च न्यायालयाच्या आदेशा प्रमाण रातच्या 10 उपरांत मेकळे सुवातेंत कसलेच तरेचें संगीत वाजोवपाक मनाय आसा. हाची अंमलबजावणी त्या त्या पुलीस स्टेशनाच्या पुलीस अधिकाऱ्यांनी करपाक जाय, पूण कांय कडेन रातच्या 10 वरां उपरांत सुरू जाल्ल्यो पार्ट्यो फांतोडे मेरेन चलतात, हाचे कडेन थळावी पंचायत, लोकप्रतिनिधी, पुलीस, उपजिल्होधिकारी आडनदर करतात, असो दावो थळाव्या लोकांनी केला.
एका क्लबाक म्हयन्याभराचे परवाने !
आश्वेंच्या आजुले ह्या क्लबा खातीर पेडणेंच्या उपजिल्होधिकाऱ्या वतीन एका म्हयन्याचे परवाने दिल्यात. हो जो प्रकार चल्ला ते विशीं सरपंच अॅड. अमीच सावंत हांणी नाराजी उक्तायली. अशे तरेचे परवाने नेमांत बसतात काय कितें ताची चवकशी करची, अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
