भांगरभूंय | प्रतिनिधी
नव्या वर्साच्या येवकाराची तयारी; पुलीस गस्ती खातीर सज्ज
भांगरभूंय । प्रतिनिधी
पेडणें: पेडणें म्हालांतल्या मोरजी, आश्वें, मांद्रें, हरमल, केरी, तेरेखोल ह्यो दर्यादेगो नातला निमतान आनी नव्या वर्साक येवकार दिवचे खातीर सज्ज जाल्यात. नातलांचे आदले सांजेर पर्यटकांचे सुरक्षे संबंदांत कसलेंच घाळपण करचे नात, अशें मुख्यमंत्री डॉ. प्रमोद सावंत हांणी म्हणलां. ते प्रमाण पेडणेंचे पुलीस निरिक्षक दत्ताराम रावत हांच्या फुडारपणा खाला दर्यादेग वाठारांत पुलीस अदीं मदीं गस्त घालतात. पुलीस निरिक्षक दत्ताराम रावत हांणी लोकांक उलो करतना सांगलें, दर्यादेग वाठारांत एकाद्याक कसलीय दुबावीत वस्तू वा दुबावीत मनीस दिसलो जाल्यार ताकतिकेन पुलिशे कडेन संपर्क करचो. कायदो कोणेच हातांत घेवचो न्हय. एकाद्या वेळार टॅक्सीकार लेगीत पर्यटकांक त्रास दिता अशें दिसल्यार ताचीय कागाळ पुलीस स्टेशानाचेर करची. दर्यादेग वाठारांत जंय पर्यटक सुसेग घेता, थंय भिकारी वा हेर विक्रेत्यांनी तांकां त्रास दिलो जाल्यार तांचेर पुलिसांनी कारवाय करची. तशेंच सांजेच्या 6 ते रातच्या 10 वरां मेरेन गस्त घालपाची सुचोवणी रावत हांणी पुलिसांक केली.
पर्यटकांक मानवल्या शांतताय
अस्तमत्या वर्साक आदेवश आनी नव्या वर्साक उर्बेभरीत येवकार दिवचे आदीं नातलांक सुरवात जाता. नातलांचे आदले सांजेर दर्यादेगांचेर व्हड प्रमाणांत देशी आनी विदेशी पर्यटक येतात. दर्यादेग पर्यटनाचो आनंद घेतात. सध्या दर्यादेग वाठारांनी व्हड प्रमाणांत पर्यटक आयिल्ल्याचें चित्र दिसता. रातच्या 10 वरां उपरांत सगळें तरेचें संगीत वाडोवपाक मनाय केल्ल्यान दर्यादेगांचेर शांतताय आसता. ताका लागून कांय पर्यटक समाधानान दर्यादेगांचेर भोंवतना दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
