भांगरभूंय | प्रतिनिधी
भिरांकूळ अपघातांत तिसरें गंभीर जखमी, ड्रायव्हरांक अटक
भांगरभूंय । प्रतिनिधी
पेडणें: मांद्रें पंचायती लागसार भिरांकूळ अपघात जालो. ह्या अपघातांत मांद्रेंची सानिका सुभाष खरबे (19) आनी प्रियंका संदेश खरबे (29) हांकां सुवातेचेरूच मरण आयलें. जाल्यार तिसरी चली गंभीर जखमी जाली.
मेळिल्ले म्हायती प्रमाण सानिका सुभाष खरबे, प्रियांका संदेश खरबे आनी सिद्दी शेटकार हीं तिगांय स्कुटरी (जीए 11 सी 2029) वयल्यान मांद्रें नुस्तें मार्केटांत नुस्तें हाडपाक वतालीं. नुस्तें मार्केटाच्या सुमार 200 मिटर आयल्यान मांद्रेंच्यान हरमलां रिक्षा वताली. जाल्यार मुखा वयल्यान ट्रक (केए डी 4822) मांद्रेंच्यान आगरवाडो शिवोले वतालो. रिक्षेन अचकीत ब्रेक मारिल्ल्यान रिक्षाचे फाटले वटेन स्कुटरीचो धपको बसलो आनी दुचाकी सयत तिगूय चलयो रस्त्याचेर पडटना ट्रकाक आपटल्यो. तातूंत सानिका खरबे आनी प्रियांका खरबे हांकां सुवातेचेरूच मरण आयलें. जाल्यार दुचाकी चलोवपी चली गंभीर जखमी जाली. तिका उपचारा खातीर बांबोळे हॉस्पिटलांत दाखल केल्या.
अपघात जाले उपरांत ट्रक तसोच आगरवाड्या मेरेन गेलो. उपरांत कांय जाणांनी तो आडायलो. एकाच अपघातांत एकाच घरांतल्या दोगींक मरण आयिल्ल्यान आस्कावडा वाठारांत दुख्खाचें वातावरण निर्माण जालें.
सात दिसांचो गणपती पावयले उपरांत नुस्तें खांवचे ह्या उद्देशान प्रियांका, सानिका आनी सिद्धी दुचाकी घेवन नुस्तें मार्केटांत वतालीं. पूण वाटेर हो अपघात जालो. सानिका ही आयटीआय करताली जाल्यार गंभीर जखमी जाल्ली सिद्धी ही उच्च माध्यमीक विद्यालयांत शिकताली.
प्रियांका खरबे ही गृहिणी. तिका दोन भुरगीं आसात. प्रियांकां हिची नणंद सानिका जाल्यार गंभीर जखमी जाल्ली सिद्धी ही प्रियांकाची सख्खी भयण. अपघाताक कारण थारिल्लो ट्रक चालक आनी रिक्षा चालक हांकां मांद्रें पुलिसांनी ताब्यांत घेतल्यात.
मांद्रें पंचायत वाठारांतले खूबशे रस्ते धोकादायक जाल्यात. फोंडकुलांनी रस्त्यांची चाळण जाल्या. आतां मेरेन खूबशे अपघात जाल्यात. पूण हो अपघात खुबूच भिरांकूळ आसा. एकाच घरांतलीं अशीं मनशां वचपाची ही पयलीच घडणूक आसा. अपघात जाले उपरांत मांद्रे पुलीस निरिक्षक शरीफ जॅकीश हांणी ताकतिकेन घडणुकेचे सुवातेर वचून अपघाताचो पंचनामो केलो. रिक्षा चालक आनी ट्रक चालक हांकां ताब्यांत घेवन तांचे कडल्यान अदीक चवकशी, तपास करपाचें काम पुलीस निरिक्षक शरीफ करता, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
