भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुक्यांतल्या मांद्रें मतदारसंघांत स्वतंत्र पुलीस स्टेशन सुरू करपाच्या मुख्यमंत्री डॉ प्रमोद सावंत हांचे घोशणेक मतदारसंघांतल्या लोकांनी येवकार दिला. पर्यटन सिझनांत मांद्रे आनी हेर दर्या देग वाठारांत जावपी गुन्यांवांचेर नियंत्रण दवोरप ह्या स्टेशनाक लागून शक्य जातलें अशें तांकां दिसता.
पेडणे तालुक्यांत 20 पंचायती आनी एक नगरपालिका आसा. पुराय तालुक्या खातीर पेडणे हे एकूय पुलीस स्टेशन आशिल्लें. मोपा विमानतळ पुलीस स्टेशन जाल्ल्यान तांचे वयली जापसालदारी मात्शी उणी जाल्ली. आतां मांद्रे हांगा पुलीस स्टेशन जाल्यार गुन्यांवकाराचेंर वचक दवोरप जातलें. मांद्रे दर्यादेग वाठारांत पर्यटन सिझनांत मसाज सेंटरां चलतात. थळाव्या पंचायतींत तांची नोंद आसना. अश्या बेकायदेशीर गजालींचेर नदर दवोरपाचें काम मांद्रे पुलीस स्टेशनात करचें पडटलें.
कायदो आनी सुवेस्था राखपा खातीर मांद्रे हांगा पुलीस स्टेशनाची गरज आशिल्ली अशें मांद्रे पंचायतीचो सरपंच अमित सावंत हाणे सांगलें. मांद्रें पुलीस स्टेशनाची लोकांची फाटल्या कांय वर्सा सावनची मागणी आशिल्ली अशें जगन्नाथ पार्सेकारान सांगलें. मोरजी, मांद्रे, हरमल, केरी- तेरेखोल व्हो वाठार पर्यटनाचे नदरेन म्हत्वाचो आसा. फाटल्या कांय वर्सांत ह्या वाठारांत जायते तरेच्या गैरवेव्हारांत वाड जाल्ली दिसता. मांद्रे पुलीस स्टेशन जाल्यार लोकांची बरी वेवस्था जातली आनी गुन्यांव उणे जावपाक शकतले अशे तांणे सांगले.
मांद्रेंचो आमदार जीत आरोलकार हाणे मांद्रे पुलीस स्टेशना खातीर यत्न चलयल्ले. तांच्या यत्नांक येस येता हें पळोवन लोक खोस उक्तायतना दिसतात. हरमल हांगा आशिल्ल्या पुलीस आवट पोस्टा कडेन वचपा खातीर सारकी वाट करची आनी थंय पुलीस आवट पोस्ट आसा हें सांगपी तकटो लावपाची थंयच्या लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
