भांगरभूंय | प्रतिनिधी
पेडणें: मांद्रें मतदारसंघांतल्यो जायत्यो जमनी, दर्यादेग वाठारांतल्यो जमनी, दोंगर, रानां बिगर गोंयकार, दिल्लीच्या नागरिकांनी, उद्देजकांनी, वेवसायिकांनी विकत घेवन ते सुवातेर व्हडा प्रमाणांत बेकायदेशीर डोंगर कापणी, जमीन रूपांतर करपाची प्रक्रिया सुरू जाल्या. हे जमनींत मेगा प्रकल्प उबारपाचें काम झुजां पांवड्यार सुरू जालें आनी ह्या प्रकल्पांक थळाव्यो पंचायती परवानेय दित सुटल्यात. हाचेर आमदार जीत आरोलकार हांणी सांगलें, ह्या मेगा प्रकल्पांक, व्हिलांक आपलो सुरवाते सावनूच विरोध आसा. फाटल्या वर्सा आमी नागरिकां वांगडा रस्त्यार येवन जमीन रूपांतरीत कायद्या खातीर आंदोलन केल्लें. ताचो उगडास करून दीत आपलो आयजूय अशे तरेच्या प्रकल्पांक आनी व्हिलांक विरोध आशिल्ल्याचें आमदारान सांगलें.
दर्यादेग वाठारांत वा दोंगर, रानांचेर व्हड प्रकल्प, इमारती फार्म हावजच्या नांवा खाला बंगले, व्हिला उबारपाचें काम चालू आसा. त्या बांधकामांक टीसीपी विभाग परवाने दितना पयलीं त्या वाठारांत वचपी रस्ते रुंद आसात काय ना? वा रस्त्यांची स्थिती कितें आसा? हाची पळोवणी कित्याक करिनात? तांकां रोखडेच परवाने कित्याक दितात? असो प्रस्न पत्रकारांनी आमदार जीत आरोलकार हांकां विचारलो तेन्ना तांणी आपलो अशा प्रकल्पांक खर विरोध आसा. ताका लागून आपूण जेन्ना ह्या मतदारसंघांतल्यान आमदार म्हणून निवडून आयलों, तेन्ना नागरिकांक व्हडा प्रमाणांत उदकाची समस्या सतायताली. वीज समस्या जाणवताली. विजेची समस्या आपणें सोडोवपाचो यत्न केलो. मात उदकाची समस्या आजूनय सुटूंक ना. ह्या मतदारसंघांत जे व्हड प्रकल्प येतले, त्या वाठारांत उदकाची वेवस्था ते वेवसायीक कशे करतले? हाका लागून टीसीपीन अशे तरेच्या प्रकल्पांक परवाने दिवचे न्हय. हांवें टीसीपी विभाग पेडणें, उपजिल्लोधिकारी पेडणें, गटविकास कार्यालयाच्या अधिकार्यांक पत्र बरयलां. ताची कार्यवाही जावची, अशी मागणी ह्या वेळार आरोलकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
