भांगरभूंय | प्रतिनिधी
पेडणें: मांद्रें पंचायत वाठारांत भौशीक मसंडभूंय जावची म्हूण फाटलीं कितलींशींच वर्सां जालीं मागणी आशिल्ली. मुख्यमंत्री डॉ. प्रमोद सावंत हांच्या सहकार्यान मांद्रें पंचायत वाठारांतली २००० चौरस मीटर जमीन सरकारान पंचायतीच्या ताब्यांत दिली. थंय एक कोटी रुपया खर्च करून मसंडभूंय उबारतले. ती बांदून पुराय जाले उपरांत मांदें पंचायतीच्या ताब्यांत दितले. हे मसंडभूंयेंत फकत पंचायत वाठारांतलेच निमाणे संस्कार करपाचे काय हेर गांवांतल्या निमाण्या संस्कारांक परवानगी दिवची, हाचो पुराय अधिकार मांद्रें पंचायतीक आसतलो अशें आमदार जीत आरोलकार हांणी सांगलें.
मांद्रें पंचायत वाठारांतलो जुनसवाडो ह्या वाठारांत भौशीक मसंडभूंय उबारपाक सरकारान वट्ट २००० चौरस मीटर जमीन दिल्या. हे खातीर आमदार आरोलकारान खूब यत्न केल्ले. हे मसंडभुंयेच्या कामाचें उक्तावण करतना आमदार आरोलकार हांचे सयत मांद्रें सरपंच रॉबर्ट फर्नांडीस, थळावे पंच वांगडी चेतना पेडणेंकार, आदले उपसरपंच तशेंच पंच वांगडी तारा हडफडकार, पंच किरण सावंत, आदले सरपंच सुभाष आसोलकार, आदले जिल्लो पंचायत वांगडी श्रीधर मांजरेंकार आनी हेर नागरीक हजर आशिल्ले.
मसंडभूंय पुराय जावचे खातीर कळाव लागचो ना. ती सरकाराची प्रक्रिया आसता. तो मेरेन आपूण स्वखर्चान हे सुवातेर शेड उबारून निमाण्या संस्कारांची वेवस्था करतलों, अशेंय ह्या वेळार आरोलकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
