भांगरभूंय | प्रतिनिधी
पेडणें: मांद्रें पुलिसांनी मोरजे धाड घालून चार लाख ७२ हजार रुपयांचो गांजो जप्त केलो. ह्या प्रकरणांत मोहितदिन तालिमगार (हावेरी कर्नाटक, ३७) हाका पुलिसांनी अटक केली. तांचे कडल्यान सुमार पावणे पांच किलो घुंवळे वखदां जप्त केली.
मांद्रें पुलीस निरीक्षक गिरेन्द्र नायक हांणी दिल्ले म्हायती प्रमाण २५ जानेवारीक रातीं मोरजी खिंड वाठारांत घुंवळे वखदांची विक्री जातली अशी म्हायती मेळिल्ली. हे म्हायतीच्या आदारार उपनिरीक्षक अभिशेक चोडणकार हांच्या नेतृत्वा खाला पंगडान रातीं णव ते साडे धा वरां मजगतीं सापळो रचलो, खिंड गार्डन एका पार्कींग वाठारांत दुबावीतपणान हालचाली करपी मोहिद्दीनाची तपासणी केली तेन्ना ताचे कडेन पाचव्या रंगाचो चार किल ७२२ ग्रॅम वजनाचो पदार्थ सांपडलो. पुलिसांनी तो जप्त करून दुबाविताक ताब्यांत घेतलो. हीं घुंवळे वखदां नेमकीं खंयच्यान आयलीं? आनी दर्यादेग वाठारांत तो तीं कोणाक दिवपाचो आशिल्लो? हाचो तपास आतां पुलीस करतात. हें प्रकरण आंतरराज्य टोळये कडेन जुळिल्लें आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
