भांगरभूंय | प्रतिनिधी
भांगरभूंय । प्रतिनिधी
पेडणेंः मांद्रें पंचायत वाठारांतल्या पाट्याचें बाग मधलामाज हांगा न्हंयच्या पात्रा कुशीक सध्या एक बांदकाम चल्लां. ते विशीं जायत्यो कागाळी केल्यो तरी संबंदीत यंत्रणेचें ताचे कडेन आडनदर चलल्ल्यान लोक तिडक उक्तायतात.
हे बांदकाम सीआरझेड नेमाचें उल्लंघन करून चल्लां. ताका लागून पावसाळ्यांत न्हंयचें उदक व्हांवन वचपाक आडमेळे येतले आनी उदक न्हंयचे देगेर आशिल्ल्या लोकांच्या घरांत वचपाची भिरांत आसा. एका पुलाक लागून हें बांदकाम चल्लां तरी बांदकाम खातें ते विशीं कांयच करना.
संबंदीत बांदकाम भरती रेशेंत येता. विशेश म्हणल्यार बांदकाम करपाक बंदी आशिल्ल्या विभागांत तें चल्लां. कागाळी करून लेगीत जीसीझेटएमएस, जिल्होधिकारी आनी हेर संबंदीत सरकारी यंत्रणा ह्या बांदकामाचेर कसलीच कारवाय करपाक फुडें येनात अशें स्वराज हे एनओजीचे कार्यकारी अध्यक्ष जगन्नाथ पार्सेकार हाणे सांगलें. जीसीझेडएमएची वांगडी सचीव डॉ गीता नागवेकार हिणे नेमाचो भंग केल्ले खातीर प्रकाश नेनवानी, किशन प्रभुदास नेनवाणी आनी हेरांक कारणां दाखयात नोटीस धाडल्या ताका लागून बांदकामाचेर कारवाय जातली असो विस्वास पार्सेकार हाणे उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
