भांगरभूंय | प्रतिनिधी
जीत आरोलकार: सुवातेची पंचायत मंडळा सयत केली पळोवणी
पेडणें: मांद्रें पंचायत वाठारांतल्या जुनासवाड्यार सरकारी सुवातेंत भोवउद्देशी जॉगींग पार्क प्रकल्प उबारतले अशी म्हायती मांद्रेंचे आमदार जीत आरोलकार हांणी दिली. तांणी सरकारी अधिकाऱ्यां सयत सुवातेची पळोवणी केली तेन्ना ते पत्रकारां कडेन उलयताले.
तांणी मुखार म्हणलें, उत्तर आनी दक्षीण अशा दोन जिल्ह्यांनी अशे पार्क उबे करतले. दक्षीण गोंयांत वास्कोंत असो पार्क उबारतले. तेच पद्दतीन उत्तर गोंयांतलो एक भोवउद्देशीय असो जॉगींग पार्क मांद्रें जुनसाड्यार उबारतले. तशेंच थंय वेगळ्योवेगळ्यो सोयी सुविधा, पार्कींग वेवस्था बी आसतली.
ह्या वेळार मांद्रेंचे उपसरपंच तारा हडफडकार, पंच वांगडी रॉबर्ट फर्नांडीस, पंच वांगडी चेतना पेडणेंकार, पंच वांगडी राजेश मांजरेकार, पंच वांगडी श्रीमती फर्नांडीस, रोबोट फर्नांडीस पंच वांगडी श्रीमती आजगांवकार बी मानेस्त हाजीर आशिल्ले.
नियोजीत जॉगींग पार्क प्रकल्पा मुखार रान खात्या खाला विस्तारीत अशें फॉरेस्ट पार्क उबारतले. त्या फॉरेस्ट पार्कांत विस्तारीत जॉगींग पार्क करूंक मेळचो ना? असो प्रस्न पत्रकारांनी विचारलो तेन्ना आरोलकार हांणी सांगलें, फॉरेस्ट विभाग फक्त झाडां लावपा खातीर परवानगी दिता. ते सुवातेंत हेर बांदकामां वा हेर प्रकल्प हाडपाक सहजतायेन हरकत ना दाखलो मेळनाशिल्ल्याचें तांणी म्हणलें.
जुनासवाड्यार जे सुवातेर सरकारी जमनी व्हड प्रमाणांत आसात, थंयच हालींच वीज उपविभागीय केंद्र उबारलां, आनी आतां जॉगींग पार्क तशेंच पुलीस स्टेशनाची नवी इमारत हेच जमनींत उबारतले. ह्या प्रकल्पांक सीआरझॅड विभागा परवानगी दितलो? असो प्रस्न पत्रकारांनी केलो तेन्ना, सरकारी प्रकल्प जितले सीआरझॅडा विभागांत येतात ते पयलीं सीआरझॅड विभागाची परवानगी घेवनूच प्रकल्प उबारतात. उपवीज विभागीय इमारतीक लेगीत सीआरझॅड विभागाची परवानगी आशिल्ल्याचो दावो आमदार जीत आरोलकार हांणी केलो.
भरती रेशे सावन 200 मिटराच्या अंतराचेर कसलेंच तरेचें पक्कें बांदकाम सीआरझॅड विभागाच्या कायद्या प्रमाण करूंक येना. तरी लेगीत कांय सुवतांनी सरकारी बिगर सरकारी इमारतीचीं बांदकामां, हॉटेल, रॅस्टोरंण्ट उबीं रावतात.
उपसरपंच तारा हडफडकार हांणी ह्या वेळार उलयतना सांगलें, आमदार जीत आरोलकार हांच्या यत्नाक लागून पयलेच फावटी मांद्रें पंचायत वाठारांत भव्य जॉगींग पार्क प्रकल्प उबारतले. ते खातीर समाधान उक्तावन गांवच्या विकासा बरोबरूच ल्हान भुरग्यांक मनरिजवण आनी जेश्ठांक तांची हक्काची स्वतंत्र सुवात उपलब्ध करून दिवपा खातीर हो प्रकल्प म्हत्वाचो थारतलो अशें हडफडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
