भांगरभूंय | प्रतिनिधी
पेडणें ः जुनसवाडो – मांद्रेंच्या मेरी उर्फ मारिया फर्नांडीस हिचेर गाडी घालून तिची हत्या करपाच्या आरोपा खाला धरिल्ल्या दीपन राजू बत्रा (दिल्ली) ह्या दुबाविताक 14 दिसांची न्यायालयीन बंदखण दिल्या.
21 फेब्रुवारीक रातीं उसरां 11 वरांचेर ही घडणूक घडिल्ली. फर्नांडिस जुनसवाडो आपल्या घरां लागसार नाल्लाचो वेवसाय करताली. मजगतीं फाटल्या कांय दिसां सावन मूळ दिल्लींतले एक कुटुंब हांगा रावता. तांतूतले कांय वांगडी रातच्या वेळार पासय मारपाक थंय येतालें. तांचे वांगडा तांचो सुणो आसतालो. ते वेळार तांचो सुणो आनी फर्नांडिस हांच्या दोन सुण्यां मदीं खूबदां झगडीं जातालीं. पूण फर्नांडिसान त्या कुटुंबाक तांच्या सुण्याचेर नियंत्रण दवरपाक सांगलें. मजगतीं कांय गैरसमज जाल्ल्यान तांचे आनी फर्नांडिस मदीं वाद जालो. कांय वेळ वाद घालून तें कुटुंब गाडयेंत बसले आनी थंयच्यान वेगान वतना तांणी कदेलाचेर बशिल्ल्या फर्नांडीसाक धपको दिलो. सुमार धा मीटर मेरेन तिका ओडून व्हेली. हांतूत गाडयेच्या टायरा पोंदा चिड्डून तिका मरण आयलें. हे घडणुके उपरांत गाडयेचो ड्रायव्हर स्वता मांद्र्यां पुलीस स्टेशनांत गेलो. मांद्र्यां पुलिसांनी गुन्यांव नोंद करुन ताका अटक केल्ली. उपरांत सुरवेक पांच दीस पुलीस कोठी दिल्ली उपरांत आतां ताका न्यायालयांत हजर केल्लो आनी 14 दिसांची न्यायालयीन बंदखण दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
