भांगरभूंय | प्रतिनिधी
पेडणें: मांंद्रें मतदार संघांतले खुबशे रस्ते फोंडकुलांनी भरल्यात. ह्या रस्त्यावेल्यान वाहनां चलयतना जीव धोक्यांत घालचो पडटा. ल्हान-व्हड अपघात सेगीत जायत आसात. दुचाकी वाहन चालकांक वाहनां चलयतना बरेच त्रास सोंसचे पडटात. हाका लागून ह्या रस्त्यांचें केन्ना डांबरीकरण जातलें हाची वाट हांगचे नागरीक पळयतात. हे विशीं आमदार जीत आरोलकार हांकां विचारलें तेन्ना तांणी सांगलें, मांद्रें मतदार संघांतले सगले रस्ते रूंद आनी तांचें डांबरीकरण डिसेंबराच्या निमाण्या सप्तका मेरेन जातलें. सध्या हॉट मिक्स प्लांट सुरू जाला. हाका लागून सध्या रुंदीकरण आनी फोंडकुलां पुरोवपाचें काम सुरू जालां. पुराय रस्त्याचें डांबरीकरण बेगीनूच जातलें, अशें उतर आमदार जीत आरोलकार हांणी दिलें.
मांद्रें मतदार संघांतल्या खुबश्या रस्त्यांक फोंडकुलां पडिल्ल्याचें मुखेल कारण म्हळ्यार, ह्या रस्त्या कुशीक पयलीं जमनी पोंदच्यान केबल घातिल्ले. तेन्ना रस्ते सगले खणिल्ले. उपरांत कंत्राटदारान तें सारकें पुरोवंक ना. ताचो परिणाम पावसांत ल्हान आशिल्लीं फोंडकुलां पावसांत बरींच वाडल्यांत. उपरांत उदकाचीं पायपां घालपा खातीर खणपाचें काम, तुयें आयटीआय उदकाचो प्रकल्प ते पार्से मेरेन रस्त्यांचें खणपाचें काम करून उदकाचीं पायपां घातलीं. तेंय काम वेवस्थीत करूंक ना. आतां पार्से ते चोपड्यां मेरेन उदकाचीं पायपां घालतले. आनी हे खातीर परत रस्ते खणटले. सध्या ह्या कामाचो परिणाम जनतेक भोगचो पडटा. एकमेकांक सायड दितना बरोच त्रास जाता. हे रस्ते बेगीनूच सारके करपाची गरज आसा.
मजगतीं ह्या रस्त्याचें डांबरीकरण आनी रस्ते रूंद करपाचें उक्तावण फाल्यां आमदार जीत आरोलकार हांचे हस्तुकीं जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
