भांगरभूंय | प्रतिनिधी
दीपक कळंगूटकार हांणी घेतली पत्रकार परिशद
पेडणें: मांद्रें मतदार संघांत जायते प्रस्न, जायत्यो समस्या आसात. हे प्रस्न विधानसभेंत मांडपा खातीर लोकप्रतिनिधी उणे पडटात. हाका लागून गोवा फॉरवर्डचे फुडारी तशेंच फातोर्डा मतदार संघाचे आमदार विजय सरदेसाय आयतारा सकाळीं धा वरांचेर जिल्लो पंचायत सभाघर, मांद्र्यां येतले. ह्या वेळार ते लोकांच्यो समस्या, प्रस्न आयकून घेतले आनी हे प्रस्न येवपी विधानसभेच्या अधिवेशनांत मांडपाचो यत्न करतले, अशी म्हायती गोवा फॉरवर्डचे उत्तर गोंयचे अध्यक्ष दीपक कळंगूटकार हांणी तुयां आपल्या घरा आयोजीत केल्ले पत्रकार परिशदेंत दिली.
ह्या वेळार तांचे वांगडा प्रशांत घोडगे, पंच अरुण पार्सेकार, निलेश कळंगूटकार आनी हेर हजर आशिल्ले.
गोवा फॉरवर्डचे फुडारी दीपक कळंगूटकार हांणी, मांद्रें मतदार संघांत जायते प्रस्न आनी समस्या आसात. मात पेडणें म्हालांतले दोनूय लोकप्रतिनिधी हे सरकाराचो भाग आशिल्ल्यान ते सरकारा आड वा म्हालांतले कसलेच प्रस्न विधानसभेंत मांडिना. असो दावो करीत लोकांनीय जायते फावटीं सरळ टिवी, दिसाळ्यांतल्यान ह्या दोनूय आमदारां विशीं विधानसभेंत लोकांचे प्रस्न मांडल्यात काय ना? हें खबर आसा. हाका लागून सध्या गोंय विधानसभेंत राज्यांतले जायते प्रस्न हजर करून सरकाराचें लक्ष ओडून घेवपी गोवा फॉरवर्डचे फुडारी तशेंच पक्षाचे एकलेच आमदार विजय सरदेसाय हे मांद्रें मतदार संघांतले पर्यायान पेडणें म्हालांतले जायते प्रस्न वधानसभेंत मांडपाचो यत्न करतले. हे खातीर नागरिकांनी भौशीक प्रस्न पयलीं हे बसकेंत मांडचे असो उलो दीपक कळंगूटकार हांणी मारलो.
थळावे आमदार प्रस्न मांडपा खातीर उणे पडटात. अशी जाप चिारिल्ल्या एका प्रस्नाक कळंगूटकार हांणी दिली. हाका लागूनच विरोधी पक्षाच्या फुडार्यांकूय ह्या मांद्रें मतदारसंघांत येवन लोकांच्यो समस्या, तांचे प्रस्न आयकून घेवपाची संद ह्याच लोकप्रतिनिधींनी दिल्ल्याचो दावो करीत मांद्रें मतदारसंघांत जायते प्रस्न, समस्या आसात. त्यो समस्या विधानसभे मेरेन पावोपाचें काम आयतारा आमदार विजय सरदेसाय बसके वेळार करतलें. ते प्रस्न नोंद करून विधानसभेंत मांडून मांद्रेंच्या पर्यायान पेडणेंच्या लोकांक न्याय दितले. असो विस्वास ह्या वेळार दीपक कळंगूटकार हांणी उक्तायलो.
मांद्रेंच्या रस्त्यांची जाल्या चाळण
मांद्रें मतदार संघांत जे मुखेल रस्ते आसात त्या रस्त्यांची स्थिती भिरांकूळ जाल्ल्यान ह्या रस्त्यांवेल्यान वाहनां चलोवप म्हळ्यार जीव धोक्यांत घालपा सारकें आसा. ते खातीर सरकारान ह्या रस्त्याची एकदां पळोवणी करून वाहनां कशी चलोवचीं? हाचें मार्गदर्शन करचें, असोय उलो तांणी मारलो.
पेडणें मोपा विमानतळ आसूं, आयुष हॉस्पिटल आसूं, ह्या दोन प्रकल्पांनी थळाव्या ज्या नागरिकांच्यो, शेतकर्यांच्यो जमनी गेल्यात, त्या शेतकारांक आजूनय न्याय मेळूंक ना. हेर टॅक्सी वेवसाय वा रोजगाराच्यो संदीय थळाव्यांक ना. आयुष हॉस्पिटलांत डॉक्टर, नर्स, क्लार्क, ऑफिसर हे सगले भायले लोक काम करतात. थळावे आसात ते सेक्युरिटी गार्ड म्हणून हाचेर सरकार केन्ना विचार करतलें? आनी थळाव्यांक रोजगाराच्यो संदी केन्ना दितले? अशे प्रस्न कळंगूटकार हांणी केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
