भांगरभूंय | प्रतिनिधी
रीण फारीक करपाक आयलें अपेस
पणजी : पणजेंतलें एक फामाद हॉटेल आनी दायज थळ आशिल्लें हॉटेल मांडवी राज्यातली एक बँक ताब्यांत घेवपाची आसा. रीण फारीक करपाक अपेस आयिल्ल्यान घाण दवरिल्ल्या हॉटेल मांडवीची मालमत्ता ताब्यात घेवपा विशींची नोटीस बँकेन जारी केल्या. हाका लागून इतिहासीक अशें मांडवी हॉटेल बँकेच्या ताब्यांत वचपाचें आतां लागीं लागीं निश्चीत जालां.
पुर्तुगेज तेंपा वेले मांडवी हॉटेल वादविवादाक लागून फाटलीं तीन वर्सां बंद आसा. पणजेंत रस्त्या कुशीक आनी मोक्याच्या थळाचेर आशिल्ल्या ह्या हॉटेलात प्रधानमंत्र्यां सयत व्हड राजकी फुडारी, देशविदेशातले वेपारी, कलाकारांनी राबितो केला. 2010 मेरेन हेर नामनेची हॉटेलां नासतना राज्य तशेंच राष्ट्रीय पांवड्या वेल्यो बसका, परिशदो तशेंच हेर कार्यावळी ह्याच हॉटेलांत जाताल्यो. बस स्टॉप, पुलीस मुख्यालय, पोरणें सचिवालय तशेच हेर कार्यालयां लागीं आशिल्ल्यान हेर हॉटेलां परस हें हॉटेल सोयीचे थारतालें. वयल्या माळ्या वेल्या परिशदघरांतल्यान मांडवी न्हंयचें दर्शन जातालें. हाका लागून देशविदेशांतल्या मानेस्तांक ह्या हॉटेलाचें खाशेलें आकर्शण आसतालें.
हें हॉटेल सध्या बंद आसा. हॉटेलाच्या धनयांनी हॉटेलाची मालमत्ता घाण दवरून गोवा अर्बन बँकेंतल्यान रीण काडिल्लें. हें रीण फारीक करूंक नाशिल्ल्यान बँकेन हॉटेलाची मालमत्ता ताब्यांत घेवपाची नोटीस जारी केल्या. रीण घेतिल्ल्या धनयांनी नोटिसेक जाप दिले उपरांत फुडली कारवाय जातली. जिल्होधिकाऱ्याक बँक ताब्यांत घेवपा विशीं अर्ज करतली. जिल्होधिकाऱ्याचो आदेश आनी ताचे देखरेखी खाला मालमत्ता ताब्यात घेवपाचे सोपस्कार जातलें, अशी म्हायती बँकेच्या अधिकाऱ्यान दिली. 3 कोटी परस चड रिणाची थकबाकी फारीक जावंक नाशिल्ल्या कारणान घाण दवरिल्ली मालमत्ता ताब्यांत घेवपाची प्रक्रिया बँकेन सुरू केल्या.
गुजरात लॉज लेगीत जातलें बंद
खूबशीं वर्सा 18 जून रस्त्या कुशीक आशिल्लें गुजरात लॉज हॉटेल लेगीत आतां बंद जातलें. हें लॉज चलोवपी धनयाक जागो खाली करपाचो आदेश जमनीच्या धनयान दिला. ह्या हॉटेलांत च्या सयत कचोरी, सामोसा, गाजर हलवो, भेळ पुरी हे खाद्य पदार्थ मेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
