मांडवी न्हंयेचो अभ्यास करूनच कॅसीनोंक परवानगी दिवची

भांगरभूंय | प्रतिनिधी

प्रोग्रेसीव्ह फ्रंट ऑफ गोंयची बंदर कप्तान खात्याक मागणी

पणजीः सरकारान सगल्यांत पयली मांडवी न्हंयेचो उदका विश्लेशण अहवाल तशेंच राष्ट्रीय हरीत लवादान घालून दिल्ले मार्गदर्शक तत्वा प्रमाण मांडवी न्हंयेची सोंसपाचे तांकीचो अभ्यास करपी अहवाल उजवाडाक हाडचो.
जो मेरेन हो अहवाल भौशीक जायना तो मेरेन खंयचेच कॅसिनो चलपाक दिवचे न्हय आनी जो नवो व्हड कॅसिनो येता ताची परवानगी रद्द करची, अशी मागणी प्रोग्रेसिव्ह फ्रंट ऑफ गोंयचे ह्रदयनाथ शिरोडकार हांणी केल्या.
प्रोग्रेसिव्ह फ्रंट ऑफ गोंयचे वांगडी ह्रदयनाथ शिरोडकार आनी महेश म्हांब्रे हांणी मांडवी न्हंयेंत कॅसीनो आड निवेदन बंदर कप्तान खात्याक सादर केलें. निवेदन भेटयले उपरांत शिरोडकार उलयताले.
मांडवी न्हंयेचो कसलोच अभ्यास कर नासतना सरकार कॅसिनो वाडयता. दुसरें कॅसिनोंच्या जाग्यार नवो कॅसिनो हाडटात अशें सरकार सांगता. मात ते सुवातेर ११६ मीटर लांबायेचो आनी ५-६ मजली इमारती इतलो व्हड कॅसिनो येतलो. हो कॅसिनो आयल्यार पणजे सावन बेती दिसपाची ना आनी पुला वेल्यान पणजे दिसची ना. परंपरीक पणजे काबार जावपाक लागलां, अशें शिरोडकार हांणी म्हणलें.
पणजेच्यान सगल्यो गजाली भायर सरपाक लागल्या. पणजे सावन दिवाणी आनी जिल्लो सत्र न्यायालय मेरशे व्हेलें, उच्च न्यायालय पर्वरे व्हेला, लेखा संचालनालय पर्वरे व्हेलां, प्रदुशण नियंत्रण म्हामंडळ पिळर्णां व्हेलां. जिल्लोधिकारी उप जिल्लोधिकारी सोडून चडशीं सरकारी कार्यालयां पणजे भायर गेल्यांत. पणजी ही गोंयची राजधानी उरनासतना, सरकार पणजेक देशाची कॅसिनो राजधानी करपाक सोदता, असो आरोप शिरोडकार हांणी केलो.
सरकारान न्हंयेची सोसपाच्या तांकीचो अभ्यास करून ताचो अहवाल उजवाडाक हाडचो तशेंच उदक विश्‍लेशण अहवाल आसा तो भौशीक करचो, नुस्तेंमारी खात्यान एक परिपत्रक काडून पणजी पालिका वाठार नुस्तेंमार वाठार म्हण जाहीर केला. हे विशींचो अहवाल नुस्तेंमारी खात्यांत जारी करचो. जे मेरेन हे अहवाल येनात सद्या अस्तिवांत आशिल्ल्या कॅसिनोंत ज्यो गजाली चलतात त्यो सगल्यो बंद करच्यो.
जे लिसेन्साचें नुतनीकरण २०२७ मेरेन केलां तें रद्द करचें आनी ११६ मिटरचो नवो कॅसिनो येता ताका दिल्ली परवानगी रद्द करची, अशी मागणी शिरोडकार हांणी केली.