भांगरभूंय | प्रतिनिधी
पणजी : सरकार मांडवी न्हंयेंत एके व्हड कॅसिनो बोटीक परवानगी दितलें. मांडवींतलें प्रदुशण तशेंच थळाव्यांक सोसचे पडपी त्रासाचो विचार करतना हांगा कॅसिनोक परवानगी दिवची न्हय अशी मागणी स्थानिकांनी केली. सोमारा तांणी हे विशीं महापौर रोहित मोन्सेरात हांची भेट घेतली. पणजी महापालिकेन ह्या कॅसिनो आड थाराव घेवचो अशी मागणी नागरिकांनी केली. ह्या वेळार वाल्मिकी नायक, जॅक सुखीजा, पॅट्रिशिया पिंटो आनी हेर नागरीक हाजीर आशिल्ले.
हे विशीं वाल्मिकी नायक हांणी सांगलें, सरकार नव्या कॅसिनोक परवानगी दिना. मात पोरण्या कॅसिनोच्या परवान्याचेर व्हड बोट हाडपाची परवानगी दिता. हाका लागून आदल्यो ल्हान कॅसिनो बोटी वचून आतां थंय व्हडल्यो बोटी हाडटात. आतां मांडवींत ११२ मिटर लांब आनी २७ मीटर उंच कॅसिनो येतले. फाटलीं कितलींशींच वर्सां पणजेच्या कॅसिनोक लागून मांडवी न्हंयेंत व्हडा प्रमाणांत प्रदूशण जाता. तशेंच येरादारी कोयंडी, गुन्यांवूय वाडल्यात.
तांणी म्हणलें, सरकार एके वटेन म्हादय वाटोवया म्हणटा जाल्यार दुसरे कडेन पणजे इमारती परस उंच कॅसिनो न्हंयेंत हाडटा. सरकारान लोकांक फटोवप बंद करपाक जाय. हे विशीं आमी रोहित मोन्सेरात हांकां निवेदन दिलां. आमी फाटल्यां हे विशीं पणजेच्या आमदारांक मेळटले. तांकां आमकां मुख्यमंत्र्यांची भेट दिवपा विशींय सांगतले. तशेंच न्हंय परिवहन, जीसीझेडएमए, बंदर कप्तान आनी ह्या संबंदीत हेर सगल्या खात्यांकूय पत्र बरयतले.
१२ तारखेर महापालिका बसका
रोहित मोन्सेरात हांणी, कॅसिनोचे परवानगेचो विशय महानगरपालिकेच्या अधिकारक्षेत्रांत येना. आमचो अधिकार फकत वेपार परवानो दिवपा पुरतो मर्यादीत आसा.
हे विशीं महापालिकेचे १२ फेब्रुवारीक जावपी बसकेंत थाराव मांडले. वयक्तीक नदरेन हांव कॅसिनोंच्या आड आसां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
