भांगरभूंय | प्रतिनिधी
– आदले आमदार दयानंद सोपटे हांचो आरोप पुलिसांनी अनवळखी हल्लेखोरांक अटक करचीः लोबो, आरोलकार हांची मागणीपेडणें : ‘तुकां मायकल लोबो जाय?’ अशें म्हणीत पांच अनवळखी गुंडांनी तोंडाक बुरखो बांदून आदले सरपंच महेश कोनाडकार हांचेर खुनी हल्लो करपाची घडणूक बुधवारा आस्कवाडो, मांद्रें मठा लागसार घडली. हल्ल्या उपरांत कोनाडकार हांकां रोखडेच तुयें हॉस्पिटलांत उपचारा खातीर व्हेले. थंयच्यान तांकां म्हापशें जिल्लो हॉस्पिटलांत धाडले. मजगतीं, कोनाडकार हांचेर दिसा उजवाडा हल्लो जावप ही धपको दिवपी घडणूक आसा. ह्या हल्ल्या फाटल्यान थळाव्या आमदाराचो हात आसा. अशें आदले आमदार दयानंद सोपटे हांणी सांगलें. ताका लागून मांद्रेंतले वातावरण तापलां.
मजगतीं, तुयेंच्या हॉस्पिटलांत जखमी अवस्थेंत आशिल्ले कोनाडकार हांची आमदार मायकल लोबो, मांद्रेंचे आदले आमदार दयानंद सोपटे, मांद्रेंचे सरपंच मिगेल उर्फ रोजा फर्नांडीस, आदले सरपंच अमित सावंत, आदले सरपंच प्रशांत उर्फ बाळा नायक, आदले सरपंच प्रदीप हडफडकार, बाबूसो हडफडकार, उपसरपंच तारा हडफडकार, धारगळचे आदले सरपंच भूषण उर्फ प्रदीप नायक, पंच किरण सावंत, सुदेश सावंत, जिल्लो वांगडी सतीश शेटगांवकार, देवेंद्र प्रभुदेसाय आनी हेरांनी येवन विचारपूस केली.
24 वरां भितर हल्लो करपी पांचूय जाणांक अटक करचे. कोनाडकार हांचेर हल्लो करपाक कोणें सांगलें, ताची चवकशी करची. 24 वरां भितर कारवाय जावंक ना, जाल्यार आमी मुख्यमंत्र्यांच्या बंगल्या मेरेन वचून जाप मागतले, अशें मांद्रें पंचायत मंडळान जाहीर केलां. कळंगूटचे आमदार मायकल लोबो हांणी हें प्रकरण क्रायम ब्रांच कडेन दिवचें अशी मागणी केली.
लोबो हे मांद्रेंच्या सप्तकाक आयिल्ले. तेन्ना तांचे सयत एका टी स्टॉलार च्या घेवपा खातीर महेश कोनाडकार, प्रशांत उर्फ बाळा नायक हे बशिल्ले. अदीं मदीं मायकल लोबो हे मांद्रें मतदारसंघांत वेंचणुकेक उबे रावतले अशी चर्चा चलिल्ली. ताचोच राग कोणें तरी कोनाडकार हांचेर हल्लो करीत काडला आसतलो अशी शक्यताय आसा.
लोबो हांणी जखमी कोनाडकार हांची भेट घेवन खबर घेतली. तेन्ना थळाव्या पत्रकारां कडेन उलयतना तांणी सांगलें, हो सामको निर्दयी प्रकार जावन आसा. आदीं असले प्रकार आमी केन्नाच पळोवंक नात. अश्यो घडणुको ह्या राज्यांत घडनाशिल्ल्यान जो कोण दोशी आसा तांचेर खर कारवाय करची. तशेंच हें प्रकरण क्रायम ब्रांच कडेन दिवचें, अशी मागणी हांव मुख्यमंत्री प्रमोद सावंत हांची भेट घेवन करतलों.
हें जांणी केलां तें सामकें चुकीचें आसा. पांच जाण येवन लोखणाच्या रोडान हल्लो करप योग्य न्हय. ही लोकशायेचो खून आसा असो दावो आमदार लोबो हांणी केलो.तोंडांक मास्क घालून लोखणाच्या वारावान हल्लो करपी जे कोण आसात तांकां पुलिसांनी रोखडीच अटक करची अशी मागणी लोबो हांणी केली. कोनाडकार हांची भेट घेवपा खातीर जे आमदार, सरपंच, पंच आनी हेर बरें मागपी हॉस्पिटलांत आयिल्ले तांणी दुबावितांक अटक करपाची मागणी केल्या.
मांद्र्यां गुन्यांवकारी प्रवृत्ती वाडल्या. उक्तेंपणान धमकी दिवपाचें चल्ल्यांत. जी व्यक्ती चार खेपे पंच वांगडी, दोन खेपे सरपंच जाल्या अशा कोनाडकार हांचेर दिसा उजवाडा हल्लो जावप ही धपको दिवपी घडणूक आसा. ह्या हल्ल्या फाटल्यान थळाव्या आमदाराचो हात आसा.
-दयानंद सोपटे, मांद्रेंचे आदले आमदार
—————–
मांद्र्यां घडिल्ली घडणूक हुस्क्याची आसा. हाचे फाटल्यान जे कोण आसात तांचो सोद घेवन पुलिसांनी बेगोबेग कारवाय करची. तशेंच हे प्रकरण गुन्यांव फांट्या कडेन दिवचें. राजकी हेतान अशे प्रकार घडप हुस्क्याचें आसा. हांव ह्या हल्ल्याचो निशेध करता.
मायकल लोबो, आमदार कळंगूट
महेश कोनाडकार हांचेर जाल्ल्या हल्ल्याचो आपूण निशेध करता. कोनाडकार आमच्या गटांत आसात. मायकल आनी म्हजें मदीं हालींच जी राजकी विधानां जाल्यात, ताचो कोणतरी फायदो घेतात. हल्लाे केल्ल्यांचो पुलिसांनी सोद घेवन ह्या प्रकरणाचो तपास पुराय केले खेरीत हांव ओग्गी रावचो ना.
जीत आरोलकार, मांद्रेंचे आमदार
मांद्रेंच्या पुलीस निरिक्षकांची ताकतिकेन बदली
मांद्रेंचे आदले सरपंच महेश कोनाडकार हांचेर जाल्ल्या हल्ल्या उपरांत मांद्रें पुलीस निरिक्षक शरीफ जॅकीस हांची उत्तर गोंय राखीव विभागांत ताकतिकेन बदली केल्या. ताचे सुवातेर मोपाचे निरिक्षक नारायण चिमुलकार हांचे कडेन मांद्रें पुलीस स्टेशनाचो अतिरिक्त ताबो दिला.
सोपटे, लोबो हांणी घेतली मुख्यमंत्र्यांची भेट
मांद्रेंचे आदले सरपंच आनी सध्याचे पंच महेश कोनाडकार हांचेर हल्लो करपी दुबावितांक 24 वरांत अटक करात नाजाल्यार फुडली कृती करपाची शिटकावणी आदले आमदार दयानंद सोपटे, आमदार मायकल लोबो हांचे सयत पेडणें म्हालांतल्या पंचांनी दिल्या. तांणी काल मुख्यमंत्र्यांची भेट घेतली. ते उपरांत मांद्रेचे पुलीस निरिक्षक शरीफ जॅकीस हांचे बदलीचो आदेश जारी जालो. तशेंच योग्य तपास करून कारवाय करपाचें आस्वासन मुख्यमंत्री डॉ. प्रमोद सावंत हांणी दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
