भांगरभूंय | प्रतिनिधी
कुटुंब, भुरग्यांचें शिक्षण आनी संस्कार, भलायकी, कायदे, समाजीक प्रश्न, संस्कृती आनी परंपरा अशा वेगवेगळ्या विशयांचेर अशा मेळाव्यांनी चर्चा जाता.
आजचो समाज बेगीन बदलता. बदलत्या काळा वांगडा जायत्यो संद उपलब्ध आसल्यो, तरी त्याच वेळार समाजा मुखार जायतीं आव्हानांय उबीं आसात. तांकां फुडो करतना बायलांची भूमिका सामकी म्हत्वाची थारता. घराची जापसालदारकी सांबाळटनाच समाजाच्या जडणघडणींत बायलांचो व्हड वांटो आसता. अशा परिस्थितींत बायलांक जागरूक, संघटित आनी सक्षम करपा खातीर महिला मेळावे ही काळाची गरज जाल्या.
साखळे आयोजित केल्लो महिला मेळावो हाचें एक बरें उदाहरण थारलें. ह्या मेळाव्याक लागून बायलां मदीं विचारांची देवाणघेवाण जाली, समाजांतल्या वेगवेगळ्या प्रश्नांचेर चर्चा जाली आनी बायलांच्या संघटनशक्तीचें प्रभावी दर्शन घडलें. हो मेळावो समाजजागृतीचो एक म्हत्वाचो टप्पो थारलो.
महिला मेळावे म्हणल्यार बायलां खातीर एकठांय येवपाचें, संवाद साधपाचें आनी मार्गदर्शन मेळोवपाची माची. हे मेळावे फकत भाषणां पुरते मर्यादित नासून, तातूंतल्यान बायलांक आपले जिणें कडेन संबंदीत अशा जायत्या म्हत्वाच्या विशयांची म्हायती मेळटा. कुटुंब, भुरग्यांचें शिक्षण आनी संस्कार, भलायकी, कायदे, समाजीक प्रश्न, संस्कृती आनी परंपरा अशा वेगवेगळ्या विशयांचेर अशा मेळाव्यांनी चर्चा जाता. गांवगिऱ्या वाठारांतल्या जायत्या बायलांक योग्य म्हायती आनी मार्गदर्शन सहजपणान मेळना. अशा वेळार महिला मेळावे तांकां मार्गदर्शक थारतात. सांखळेच्या मेळाव्यांतूय बायलांक समाजांतल्यो घडणुको, कुटुंबांतल्यो जापसालदारक्यो आनी स्वतःची भूमिका हाचे विशीं मार्गदर्शन मेळ्ळें.
बायलांचे मेळावे कित्याक गरजेचे आसात, हाचो विचार केलो जाल्यार जायते मुद्दे मुखार येतात. सगल्यांत पयलीं, हे मेळावे बायलां मदीं जागरूकता निर्माण करतात. आयज समाजांत जायत्यो समस्या आसात. बदलतें सामाजीक वातावरण, कुटुंबवेवस्थेचेर येवपी ताण, भुरग्यांचेर जावपी वायट परिणाम, वायट प्रवृत्ती, व्यसनाधीनता अशा जायत्या प्रस्नांचेर बायलांनी सादूर रावप गरजेचें आसा. बायलांच्या मेळाव्यांतल्यान ह्या विशयांचेर चर्चा जावन तांकां योग्य दिका मेळटा.
दुसरें म्हत्वाचें कारण म्हणल्यार बायलां मदीं आत्मविस्वास वाडोवप. जायत्यो बायलो विचार मांडपाक भियेतात वा कांचवेतात. पूण अशा मेळाव्यांक लागून तांकां उलोवपाची संद मेळटा. बायलांच्या मेळाव्यांचो आनीक एक म्हत्वाचो फायदो म्हणल्यार संघटणशक्तीची जाणविकाय. एकटी बायल जायते फावटीं हतबल जाता, पूण जेन्ना जायत्यो बायलो एकठांय येतात तेन्ना तातूंतल्यान एक मोठी ताकद उभी रावता. वेगळ्या गांवांतल्या, वेगळ्या पिरायेच्या आनी वेगळ्या फाटभुंयेच्या बायलो जेन्ना एकठांय येतात, तेन्ना अणभवांची देवाणघेवाण जाता. एकमेकींच्यो अडचणी समजतात आनी त्यो सोडोवपा खातीर सामूहिक विचार जाता.
सांखळेच्या बायलांच्या मेळाव्यांतूय ही एकजूट स्पश्टपणान दिसून आयली. बायलांनी समाजांतल्या प्रस्नांचेर एकठांय चर्चा केली आनी फुडें कितें करूंक येता, हाचेर विचारमंथन केलें. अशा उपक्रमांक लागून बायलांक संघटीतपणान काम करपाची प्रेरणा मेळटा. कुटुंब हो समाजाचो मुळावो घटक आसा आनी तें घडोवपांत बायलांची भूमिका सामकी महत्त्वाची आसता. भुरग्यांचेर जावपी संस्कार, तांचे वागप हातूंत आवयची भूमिका निर्णायक आसता. देखून बायलांनी जागरूक रावप गरजेचे आसा.
महिला मेळाव्यांतल्यान बायलांक भुरग्यांचेर संस्कार, संवादाचें म्हत्व आनी कुटुंबांतलो सुसंवाद हाच्या विशीं मार्गदर्शन मेळटा. आयच्या काळांत भुरग्यांचेर वेगवेगळ्या माध्यमांचो परिणाम जाता. अशा वेळार पालकांनी, खास करून आवयांनी, चड जागरूक रावप गरजेचें आसा. बायलांक स्वताच्या हक्कांची खबर आसना. कायदे, सरकारी येवजणो आनी बायलां खातीर आशिल्ल्यो सुविधा हाच्या विशीं म्हायतीचो उणाव आसता. महिला मेळावे ही म्हायती दिवपाची एक महत्त्वाची संद आसता. वेगवेगळ्या तज्ञांच्या मार्गदर्शनाक लागून बायलांक योग्य म्हायती मेळटा.
सांखळी हांगा जाल्ल्या महिला मेळाव्यांतूय बायलांक समाजीक आनी कायदेशीर विशयांचेर मार्गदर्शन केलें. हाका लागून बायलांक आपले हक्क आनी कर्तव्यां चड बऱ्या तरेन समजलीं. अशा जागरूकतेमुळे बायलो अन्याया आड उब्यो रावपाक सक्षम जातात. महिला मेळावे हें बायलां मदीं फुडारपणाचे गूण विकसीत करपाचें एक प्रभावी माध्यम आसा. मेळाव्यांचें आयोजन, नियोजन, सहभाग आनी संवाद हाका लागून बायलां मदीं निर्णय घेवपाची क्षमता, जापसालदारकीची जाणीव आनी फुडारपणाची तयारी निर्माण जाता. जायत्या बायलां मदीं समाजा खातीर कितें तरी करपाची इत्सा अशाच उपक्रमांतल्यान जल्माक येता.
समाज परिवर्तन हें एका मनशाक शक्य नासता. ते खातीर संघटीत प्रयत्नांची गरज आसता. बायलांनी जर एकठांय येवन समाजा खातीर काम केलें, तर सकारात्मक बदल घडोवन हाडप नक्कीच शक्य आसा. महिला मेळावे बायलांक हे दिकेन प्रवृत्त करतात. आज बायलो शिक्षण, नोकरी, वेवसाय, समाजीक कार्य अशा वेगवेगळ्या क्षेत्रांनी फुडें येत आसात. तरीकूय जायतीं आव्हानां कायम आसात. ह्या आव्हानांक तोंड दिवपा खातीर बायलांनी एकठांय येवप, जागरूक जावप आनी संघटीतपणान काम करप गरजेचें आसा. बायलांचें सक्षमीकरण म्हल्यार सक्षम कुटुंब- समाज- राष्ट्र. घटमूट समाज घडोवपाचो आसत, तर बायलांक सक्षम करपाक जाय. देखूनच, समाजाच्या सर्वांगी उदरगती खातीर महिला मेळावे नेमान जावप खूब गरजेचें.
प्रमिला प्रसाद फळ देसाय
९०११८३४८४७
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
