भांगरभूंय | प्रतिनिधी
रीना गावडेः सावयवेऱ्यां महिला ग्रामसभेक बायलांचो उपाट प्रतिसाद
भांगरभूंय । प्रतिनिधी
सावयवेरें: बायलांचे विशय मांडपाक महिला ग्रामसभा ही बायलां खातीरची एक माची आसा. महिला ग्रामसभेक बरो प्रतिसाद दिल्ले खातीर बायलांक परबीं, अशें समाज वावुरपी रीना गोविंद गावडे हांणी सांगलें.
वेरें- वाघुर्मे पंचायतीची महिला ग्रामसभा पंचायत वाचपघराच्या सभाघरांत आयतारा खेळीमेळींत जाली. पयलेच खेपे आयोजीत केल्ले हे महिला ग्रामसभेक बायलांचो बरो प्रतिसाद मेळ्ळो. हे सभेंत सुमार 50 बायलांनी वांटो घेतलो. ह्या वेळार रीना गावडे मुखेल सोयरी म्हूण उलयताली.
ह्या वेळार माचयेर आदली सरपंच अनिषा गावडे, वेरें- वागुर्मेची सरपंच शोभा पेरणी, उपसरपंच बाबू गावडे, सचीव भूषण तावडे, पंच स्वाती पालकार, रोहन तारी, नवनाथ वेलकासकार, अक्षय नायक हाजीर आशिल्ले.
बायलांनी तांचे हक्क आनी सरकारी येवजण्यो समजून घेवप गरजेचें आसा. दरेके बायले मदीं कसले ना कसले गूण आसतात. बायलांनी आंगांत आशिल्ले कलेचो वापर करून ताचो फायदो करून घेवपाक जाय. पूण चडश्यो बायलो ताचो फायदो घेनात, अशी खंत रीना गावडे हांणी उक्तायली. बायलांच्यो ज्यो समस्या आसात, त्यो थळाल्या आमदाराच्या आदारान सोडोवपाचो आपूण यत्न करतली, अशी हमी गावडे हांणी दिली.
अनिशा गावडे हांणी सांगलें, पंचायतीचे साबार बसकेंत बायलांची हाजेरी सामकीच उणी आसता. पूण ह्या महिलांचे विशेश सभेंत बायलांची हाजेरी दोळ्यांत भरपा सारकी आसा. बायलां खातीर आयोजीत केल्ल्या कार्यशाळांचो बायलांनी उपेग करून घेवचो आनी स्वावलंबी जीण जगपाचो यत्न करचो.
बायलां खातीर आशिल्ल्या विवीध शासकीय येवजण्यां संबंदीची आनी तांच्या हक्का विशींची पंचायत सचीव भूषण तावडे हांणी खोलायेन म्हायती दिली.
हे सभेंत बायलांनी गांवांतल्यो कांय समस्या मांडल्यो. तातूंत बशी वेळार ये नाशिल्ल्यान उप्रासपी समस्या, बसका आयोजीत करचे खातीर महिला मंडळांक ल्हानशें सभाघर उपलब्ध करून दिवप, गांवांतल्या बायलां खातीर एकादी कार्यशाळा वा प्रशिक्षण वर्ग आयोजीत करप, ह्या विशयांचेर चर्चा केली.
फुडल्या म्हयन्यांत श्री खामिणी देवस्थानाची नामनेची दिवजां जावपाचीं आसात. ते खातीर दिवजां घेवन बायलां जे वाटेंतल्यान वतात ती वाट दुरुस्त करची, असो थाराव पंच स्वाती पालकार हांणी मांडलो. सोना सावयकार हांणी सुत्रनिवेदन केलें जाल्यार शोभा पेरणी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
