महिला अत्याचारा आड एकवट गरजेचो

भांगरभूंय | प्रतिनिधी

अमीत पालेकारः दोशींचेर कारवाय करून न्याय दिवपाची मागणी

भांगरभूंय । प्रतिनिधी

मडगांवः कोलकातांतल्या महिला दोतोराचेर जाल्ल्या अत्याचाराचो निशेध करता आनी दोशींचेर कारवाय करून तिका न्याय दिवचो, अशी मागणी करता. आतां भाजपा कडल्यान लेगीत ह्या विशयाचेर न्याय मागतात. हे आदीं अश्यो घडणुको घडिल्ल्यो, तेन्ना भाजप आनी महिला मोर्चा रस्त्याचेर देंवूंक नाशिल्लो. पूण तां राजकारणा फुडें वचून बायलां वयल्या अत्याचारांचेर उलोवपाची आनी न्यायाची मागणी करपाची सध्या गरज आसा, अशें आम आदमी पक्षाचे गोंय संयोजक अमीत पालेकार हांणी सांगलें.

बाणावले आमदार व्हेन्झी व्हिएगश हांच्या कार्यालया कडेन एकठांय येवन आम आदमी पक्षा कडल्यान कोलकाताच्या महिला दोतोराचेर जाल्ल्या अत्याचाराचो निशेध केलो.

पालेकार हांणी सांगलें, बाणावलेचें मोहल्ला क्लिनीक अत्याचाराचो निशेध करचे खातीर बंद दवरलां. बायलां वयल्या अत्याचाराच्यो घडणुको सध्या वाडत आसात. ह्यो घडणुको घडच्यो न्हय हे खातीर पालकांनी लेगीत भुरग्यांचेर बरे संस्कार करपाची गरज आसा. कितें बरें तें तांणी भुरग्यांक सांगीत रावचें. कोलकातांतले पिडीते सयत देशभरांतल्या अत्याचार जाल्ल्या बायलां खातीर एकठांय येवन न्याय मागपाचो हो वेळ आसा. भाजपा वरिश्ठ फुडाऱ्यां कडल्यान अजून लेगीत हाचेर प्रतिक्रिया येवंक नात. गोंयांतल्या भाजपाच्या फुडाऱ्यांनी आनी महिला मोर्चा कडल्यान आंदोलन करून निशेध नोंद केला. ते प्रमाण पिडीतेक न्याय मेळपाची गरज आसा. आमदार व्हेन्झी व्हिएगश हांणी सांगलें, गोंयांतल्या महिला अत्याचाराचेर विधानसभेंत आवाज काडिल्लो. आतां आप वतीन आघाडेंतल्या घटकांक विस्वासांत घेवन 40 सूय मतदारसंघांनी महिला सुरक्षितताय संवाद करतले आनी महिला सुरक्षितताये खातीर उपाय येवजण कशी आंखपाक मेळटली हाचो नियाळ घेतले.

अपूर्ण तपास सीबीआय कडेन दिवचेः पालेकार

हे आदीं देशांत अश्यो घडणुको घडल्यात. मणिपूरांत लेगीत बायलांची धींड काडल्या. त्या वेळार लेगीत भाजपाच्या महिला मोर्चान मुखार येवन न्यायाची मागणी करपाची गरज आशिल्ली, पूण तशें जावंक ना. रातच्या वेळार काम करपी बायलांक सुरक्षेची भावना येवची हे खातीर गरजेचे उपाय येवजण्यो करपाची गरज आसा. गोंयांतल्या सिद्धी नायक प्रकरणा वरीं जे बायलां वयल्या अत्याचाराचे तपास अपूर्ण आसात, ते सीबीआय कडेन दिवचे, अशें अमीत पालेकार हांणी सांगलें.