भांगरभूंय | प्रतिनिधी
संवसारीक पांवड्यार मेळिल्लें येदें व्हडलें असलें हें येस सोंपेपणान मेळना. हाचे फाटल्यान शारिरिक, मानसीक, आर्थिक आनीं दुर्दैवान घडये राजकीय अडचणी लेगीत सोसच्यो, भोगच्यो पडटात…
आयसीसी महिलांची क्रिकेट संवसारीक करंड सर्तींत भारतीय बायलो क्रिकेटर्स आनीं भारतीय महिलांचे क्रिकेटीन तोखणाय करपा सारको खेळ केलो. पंगडान क्रिकेट मोग्यांक अजापांत उडोवपा सारको खेळ करून सावथ आफ्रिका पंगडाचेर इतिहासिक जैत मेळोवन फकत भारतच न्ही, तर संवसाराचें लक्ष आपणा कडेन ओडून घेतलां, हातूंत इल्लोय दुबाव ना.
इतलेंच न्ही तर हाचे इतलीच अजापाची गजाल म्हळ्यार, आज मेरेन दादल्यांच्याच क्रिकेट खेळांत क्रिकेट मोग्यांचे उपस्थितीन स्टेडियम भरतालो. महिलांच्या ह्या क्रिकेटीच्या संवसारीक सर्तींत भारतीय पंगडाची उमेद वाडोवपाक आनी खेळाचो आनंद घेवंक स्टेडियमाचेर क्रिकेट मोग्यांनी केल्ले अनपेक्षित गर्देक लेगीत तोखेवची पडटली.
भारताची राष्ट्रपती आनीं प्रधानमंत्र्यांनी जैतिवंत पंगडाक निमंत्रण दिवन तांची केल्ली अपुरबाय, तोखणाय आनी सगळ्या थरांतल्यान पंगडाक मेळिल्ली शाबासकी पळयतकच भारतीय महिलांच्या क्रिकेटीक फुडाराक भांगराळे दीस येतले हातूंत इल्लोय दुबाव ना.
पूण एक मात खरें, संवसारीक पांवड्यार मेळिल्लें येदें व्हडलें असलें हें येस सोंपेपणान मेळना. हाचे फाटल्यान शारिरिक, मानसीक, आर्थिक आनीं दुर्दैवान घडये राजकीय अडचणी लेगीत सोसच्यो, भोगच्यो पडटात आनीं पडल्यो आंसूं येता. तेन्नाच हें येदें व्हडलें येस पदरांत पडलां आसतलें. म्हणून ह्या येसाक व्हड म्हत्व आसा.
आमच्या भारत देशांत म्हाका दिसता मनरिजवणेचें मुखेल साधन म्हणून सिनेमा ह्या माध्यमाक चड पसंती आशिल्ली आनी ती आजय आसा.
कांय वर्सां फाटीं पांच दिसांचे क्रिकेट खेळ ज्या मैदानार खेळयतात, त्या मैदानार चडशे थळावे क्रिकेट मोगी पळोवंक गर्दी करताले. हेर शारां गांवांतले आमच्या सारके क्रिकेट मोगी रेडिओ लावन भोंवतणी बसून पांच दिसांच्या खेळाची कमेंटरी आयकुपांत समाधान मानताले. दुसरो पर्यायच नाशिल्लो.
मजेशीर गजाल म्हळ्यार, दिसभराचो खेळ कसो जालो, हें खबर आसून लेगीत, दुसरे दीस खबरांपत्र हातांत पडले बरोबर पयल्या पानावयली मुखेल वा सनसनाटी खबर वाचनासतना, निट्ट फाटलें राष्ट्रीय आंतरराष्ट्रीय खेळांमळाच्या बातम्यांचे पान पळोवन क्रिकेट मोगी खबर आशिल्लीच म्हायती रुचीन वाचताले !
जशें आमकां तेन्ना एसएससी परिक्षा निकाल खबर असुन लेगीत आमी आमचो नंबर खबरांपत्रांत सोदून पळयतालेच !
रेडिओ उपरांत कृष्णधवल टीव्ही आयली. क्रिकेट मोगी टीव्हीचेर क्रिकेट मॅच प्रत्यक्ष पळोवंक लागले. पूण तेन्नाच्या कमजोर प्रक्षेपणाक लागून आमचो चडसो वेळ घरावयलो ॲन्टेना घुंवडावन स्थीर करून चित्र नितळ करपाचो परत परत प्रयत्न करपांत वतालो. पूण निमाणे मेरेन लेगीत त्या चिरमुल्यांचे गर्देंत आमकां खेळां मळावयलो बॉल दिश्टी पडनाशिल्लो !
उपरांत रंगीत टीव्ही आयलो. प्रक्षेपण नितळ आनी चकचकीत दिसूं लागलें. आजतर तंत्रगिन्यानान इतली तोखणायेची प्रगती केल्या की एच डी स्मार्ट टीव्हीचेर रातच्या लायटीच्या उजवाडांत खेळटल्या खेळगड्यांच्या हाता पांयांची ल्हंव लेगीत स्पश्ट दिश्टी पडटा !
आज खेळांमळार हेर खेळां वांगडा बायलांचे क्रिकेटीन लेगीत खेळा मोगींचें लक्ष आपणा कडेन ओडून घेतलां. बायलांच्या क्रिकेटीक आदीं फाव तितलें म्हत्व मेळनाशिल्लें.
फाटल्या सप्तकांत बायलांचे क्रिकेटी़ंत वर्ल्ड चॅम्पियन कप जिकिल्ल्या पंगडांतले एके महिला खेळगडेन आपले मुलाखतींत उलयतना सांगिल्लें, आदीं आमकां एका खेळांत एक हजार रुपये मानधन मेळिल्लें ! पूण तांच्या संवसारीक मळावयल्या जैतान तांचें व्हडपण सिद्ध जालें. म्हत्व आनीं व्हडपण मेळ्ळें म्हणटकच आतां आनीं हाचे फुडें बायलां खेळगड्यांचें मानधन लेगीत घडये दादले खेळगड्यांच्या मानधना लागीं पावूं येता. जैता उपरांत जैतिवंत पंगडाक सव्वाशें कोटी रुपयांचो निधी दिवपाची घोशणा जाली, शिवाय तांकां जायतीं हेर इनामां, चारचाकी वाहनां, सरकारी पदांचेर नियुक्ती जाहीर जाल्या. खऱ्यांनीच महिला खेळगड्यांक वालोर दिवपा सारकीच कामगिरी आशिल्ली. दुबाव ना हें सगळें तांकां फावताच.
भारतीय पंगडा कडेन हारिल्ल्या सावथ आफ्रिका पंगडाच्या कप्तानान काडिल्लीं उतरांय म्हाका म्हत्वाचीं दिसतात. तांणी म्हळें की, भारतीय क्रिकेट मळावयले ज्येश्ट आनीं श्रेश्ट खेळगडे सुनील गावस्कर, सचीन तेंडुलकर, विराट कोहली, भारतीय खेळांमंत्री हांचे सारके आनीं पंगडाचे बरें मागपी प्रेक्षक उमेदीन उडयो मारून भारतीय पंगडाच्या खेळगड्यांक उमेद हाडपाचो प्रयत्न करताले. ही गजाल लेगीत म्हत्वाची आसा. पूण आमच्या खेळगड्यांक उमेद हाडपाचो प्रयत्न करपी कोणूच नाशिल्लो अशी खंत ताणें परगटायली.
संवसारिक आनी देशी बायलांचे क्रिकेटीक खेळांमळार पांय दवरपाक आनीं पांय रोवपाक बरोच काळ वचचो पडला. बायलांचे क्रिकेटीच्या इतिहासाचेर लक्ष मारून ती संवसारांत आनी आमच्या भारत देशांत केन्ना उदेली ताची थोडे भितर म्हायती घेवया.
1934 वर्सा बायलांचे क्रिकेटीचो संवसारीक उक्तावणाचो पयलो सामनो इंग्लंड आनीं ऑस्ट्रेलिया हांचे मजगतीं खेळयल्लो आनीं इंग्लंड जैतिवंत जाल्ले खंय. उपरांत न्यूझीलंडाचो बायलांच्या पंगडाचो आसपाव जालो. 2007 वर्सा नेदरलँड्स पंगडाचो दक्षिण आफ्रिका पंगडा वांगडा खेळ जालो.
आमच्या भारत देशाच्या महिलांचो संवसारीक क्रिकेट पंगडाचो 25 वर्सां सकयल्ल्या पंगडाचो खेळ 7 फेब्रुवारी 1975 वर्सा ऑस्ट्रेलिया पंगडा वांगडा जाल्लो. पुणें, दिल्ली आनी कलकत्ता हांगां तीन फर्स्ट क्लास खेळ खेळयल्ले. उज्वला निकम, सुधा शाह, श्रीरुपा बोस ह्यो ह्या तीन पंगडाच्यो कप्तान आशिल्ल्यो.
मुंबय शारांत 1969 वर्सा क्रिकेट क्लब ऑफ इंडियाचे वांगडी अलू बामजी हांणी अल्बीस नांवाचो बायलांचो क्रिकेट क्लब स्थापन केल्लो. 1970 वर्सा सावन बायलांचे क्रिकेटीचे सामने आमच्या देशात विंगड विंगड राज्यांत खेळयले, पूण तेन्ना बायलांची क्रिकेट संघटना नाशिल्ली. IWCC भारतीय महिलाल क्रिकेट क्लब 2005 वर्सा संवसारिक क्रिकेट मंडळ BCCI बोर्ड ऑफ क्रिकेट कांवसिल इंडियाचो वांगडी जालो.
सद्या संवसारांतल्या बायलांच्या क्रिकेटीचे बारा पंगड संवसारिक पांवड्याचेर क्रिकेट सर्तींत वांटेकार जातात. भारत देशांतल्या महिला खेळगड्यांनी संवसारीक पांवड्यार जैत मेळोवन फकत भारतीय क्रिकेटीक व्हडपण दिवंकना तर ह्या जैताचो परिणाम म्हणून आमच्या देशांतल्या गांव शारांतल्यान व्हड प्रमाणांत क्रिकेट खेळांत आपलो करीयर करपी चलयो आकर्शित जातल्यो.
रंजन महादेव नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
