भांगरभूंय | प्रतिनिधी
हिंदू धर्माभितर महाशिवरात्र ही एक मुखेल परब. महाशिवरात म्हळ्यार शिवाची म्हान रात. ही परब माघ म्हयन्यांतल्या चतुर्दशी दीसा येता. शिवरात तर दर म्हयन्याक येता पूण ह्या माघ म्हयन्यातल्या शिवरातीक खाशेलें म्हत्व आसा. ह्या रातीच्यो खुपश्यो काणयो आसात. एक काणी अशी कि ह्याच शुभ म्हुर्तार महादेव आनी पार्वतीचे लग्न जाल्लें अशें म्हणटात. इतलो हो शुभ तशेच पावन म्हूर्त. आनी एक काणी अशी की हेच रातीं रातीं महादेवान तांडव केल्लें. तो खूप तिडकल्लो. तेन्ना ताका शांत करपाचें काम लोकांनी पूजा अर्चना करून केल्लें तोच हो दीस.
महाशिवरात्रीक लोक शिवलिंगाचो अभिषेक करतात. शिवलिंगाचो अभिषेक म्हळ्यार महादेवाचो अभिषेक केल्ल्या बशेन जाता. दुद, तूप, धंय, शेण, गोमूत्र घालून शिवलिंगाचो अभिषेक करतात. तशेच बेलाची पानां आनी फुलां घालून शिवलिंगाची पूजा करतात. महादेवाक भोळा शंकर म्हणतात तसोच तो केन्ना केन्ना उग्र रूप धारण करता तेन्ना हो बेल ताका थंडाय दिता. बेल घाले बगर महादेवाची पूजा पुराय जावंक शकना. कांय कडेन जलाभिषेकूय करतात. उदक हें शीतळ, निर्मळ तशेच थंड आसता. देखून हाचो अभिषेक केल्यारूय महादेव शांत आनी थंड उरता अशे मानप आसा.
महाशिवरातीच्या निमतान महादेवाच्या देवळांनी दीसभर दुदाभिषेक चालूच आसता. कांय देवळांनी शिवरात्रीच्या शुभ म्हुर्तार सत्यनारायणाची पूजा, नाटकां, अभंगाच्यो कार्यावळी, पावणी, समराधना चालू आसतात. ह्या दीसा कांय जाण उपासुय धरतात. उपास केल्यार बरें फळ मेळटलें अशी आस्त धरून भाविक देवाची आराधना करतात.
दर महाशिवरात्रीक देवळांनी लोकांची उपाट गर्दी भरिल्ली आमकां दिसून येता. एक नदर महादेवाचेर पडची म्हूण कितलोसोच वेळ लोक रांकेत उबे राविल्ले दिसतात. महादेव प्रसन्न जाल्यार सगळें वायट नश्ट जावन बरें घडटलें अशी आस्त घेवन लोक महादेवाच्या पांयालागीं येतात. ॐ नमः शिवाय हर हर महादेव..
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
