भांगरभूंय | प्रतिनिधी
उद्देजकतायेचे वातावरण तयार करपाक मुख्यमंत्री स्वयं रोजगार येवजण
पणजी : राज्यांत विद्यार्थ्यांक उद्देजकतेचें प्रशिक्षण दिवन नवनिर्मिती आनी उद्देजतायेचें वातावरण तयार करपाक सरकारान मुख्यमंत्री स्वयं रोजगार येवजणेक मान्यताय दिल्या. हे येवजणेचें उक्तावण फाल्यां, बुधवारा मुख्यमंत्री डॉ. प्रमोद सावंत हांचे हस्तुकीं जातलें. सुरवातेक महाविद्यालयीन प्राध्यापकांक आनी सरकारी अधिकार्यांक उद्देजकतायेचे धडे दितले. ईडीसी वरवीं हे येवजणेची कार्यवाही करतले. २०३० मेरेन स्टार्ट अप आनी उद्देगां खातीर पुश्टीक वातावरण, सुविधा उबारपाचे नदरेन आसा.
ईडीसीचे वेवस्थापकीय संचालक भालचंद्र आंगले हांणी ही म्हायती दिली. आयटीआय, पॉलीटेक्नीक आनी हेर महाविद्यालयांतल्या प्राध्यापकांक उद्देजकताये विशीं प्रशिक्षण दितलें. हांगा प्रशीक्षण घेतिल्ले प्राध्यापक आपापल्या महाविद्यालयांत विद्यार्थ्यांक प्रशिक्षण दितले. उद्देग खात्यान येवजण राबयल्या, कार्यवाही ईडीसी वरवी जातली. एंट्रेप्रेनरशीप डेवेलोपमेंट इन्स्टीट्यूट ऑफ इंडिया (ईडीआयआय) वरवीं प्रशिक्षण दितले. प्राचार्यांकडल्यान प्रशिक्षणा खातीर प्राध्यापकांचीं नांवां मागयतले. नांवां आयले उपरांत विवीध कुडक्यांनी प्रशिक्षण कार्यावळ आयोजीत करतले. ईडीआयआयच्या अहमदाबादच्या कॅम्पसांत सुरवातेक मार्गदर्शन दितले.
सुरवातेक ५० प्राध्यापकांक येवजणेची म्हायती आनी हेतू सांगतले. उपरांत ईडीआयआय अहमदाबाद हांगा स दिसांचें प्रशिक्षण शिबीर जातलें. वर्साक ३०० जाणांक हें प्रशिक्षण दितले. स्टार्ट अप्स आनी इन्कुबेशन सेंटराची म्हायती दितले. उपरांत ६ म्हयने ते १ वर्सा मेरेन अदींमदीं कार्यशाळा तशेंच प्रशिक्षण शिबीरां जातलीं. निमाण्या टप्प्यांत पांच दिसांचें अत्याधुनीक प्रशिक्षण शिबीर जातलें. विद्यालय, महाविद्यालय, रवींद्र भवन आनी हेर भोवशीक सुवातांचेर उद्देजकते विशीं जागृताय करपी कार्यावळी जातल्यो.
शिक्षण खाते, तांत्रीक शिक्षण संचालनालय, उच्च शिक्षण संचालनालय, कुशळटाय उदरगत संचालनालयाच्या सहकार्यान प्रशिक्षण शिबिरां जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
