महाराष्ट्र विधानसभा वेंचणूक : भाजपा वतीन जाहीरनामो जारी
भांगरभूंय | प्रतिनिधी
मुंबय, खबरां संस्था: महाराष्ट्र विधानसभेची वेंचणुके खातीर भाजपान आपलो जाहीरनामो उजवाडायला. हातूंत ‘लाडक्या भयणीं’क १५०० रुपयां बदला २१०० रुपया दितले अशें जाहीर केलां. केंद्रीय गृहमंत्री अमित शाह, उपमुख्यमंत्री देवेंद्र फडणवीस, खासदार पीयूष गोयल आनी चंद्रशेखर बावनकुळे हे ह्या वेळार हाजीर आशिल्ले.
भाजपाच्या घोशणापत्रांत खंयच्यो घोशणा?
- सगळ्या घरांची राखण करपा खातीर राज्यांत गरजेच्या वस्तूंचें दर थीर दवरतले.
- येवपी काळांत २५ लाख रोजगार निर्मिती (भाजपा घोशणापत्र) आनी म्हयन्याक १० लाख विद्यार्थ्यांक रु.१० हजार शिश्यवृत्ती दितले.
-‘लाडक्या भयणीं’क दर म्हयन्याक रु. २१०० रुपया दितले आनी येवजणे खाला बायलां मदीं अर्थीक साक्षरताय निर्माण करपा खातीर प्रशिक्षण दितले. बायलांचे सुरक्षे खातीर २५००० बायलांक पुलीस दळांत प्रवेश दितले.
-शेतकारांक रीण माफी आनी शेतकरी सन्मान येवजणेंतल्यान वर्साक रु. १२,००० वेल्यान रु. १५,०००, तशेंच एमएसपी कडेन उलोवन २० टक्क्यां मेरेन भावांतर येवजण राबयतले.
-दरेका गरिबाक जेवण आनी आलाशिरो दितले.
-जाण्टे पिरायेच्या पेन्शनधारकांक म्हयन्याक रु. १५०० वेल्यान रु. २१०० दितले. जाका लागून पुराय महाराष्ट्रांत ज्येश्ठ नागरिकांक चड अर्थीक सुरक्षा मेळटली.
जाहिरनाम्यांतले खाशेले मुद्दे
- राज्यांच्या गांवगिर्या वाठारांतल्या ४५ हजार गांवांनी रस्ते बांदतले.
- आंगणवाडी आनी आशा सेवकांची अर्थीक सुरक्षीतताय सुनिश्चीत करपा खातीर म्हयन्याक १५ हजार पगार आनी विमो संरक्षण.
- वीज बिलां ३० टक्क्यांनी उणीं करून सौर आनी अक्षय उर्जेचेर भर दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
