भांगरभूंय | प्रतिनिधी
मुंबय, खबरां संस्था: महाराष्ट्रांत विधानसभा वेंचणुकेंत सरासरी मतदारांचो आंकडो ६५ टक्क्यां परस चड आसा. स म्हयन्यां आदीं जाल्ले लोकसभेचे वेंचणुकेचे तुळेंत सध्याच्या मतांची टक्केवारी वाडल्या. गांवांतल्या मतदारांनी मतदान केलें. पूण मुंबय, ठाणे, पुणे, नागपूर ह्या शारांनी तितलीय उमेद उरूंक ना. नाशीक जिल्ह्या सयत राज्यांतल्या कांय केंद्रांचेर रातचें णव वरां मेरेन मतदान चालूच आशिल्लें. ताका लागून मतदानाची जिल्ल्यांतली आकडेवारी येवपाक कळाव जालो. रातच्या ११.४५ वरांचेर आयिल्ले आंकडेवारी प्रमाण राज्यांत ६५.११ टक्के मतदान जालें अशें दिसून आयलें.
मुंबय, ठाणे, पुणे आनी नागपूर ह्या चार व्हड शारांनी मतदानाचें प्रमाण वाडोवपा खातीर वेंचणूक आयोगान खाशेले यत्न केल्ले. पूण ताका चड यश मेळ्ळें ना अशें दिसून आयलें. कोल्हापूर जिल्ह्यांतल्या कागल मतदारसंघांत सगळ्यांत चड ८२ टक्के मतदान जालें. सगळ्यांत उणें ४१ टक्के मतदान कल्याण अस्तंत मतदारसंघांत जालें. मंत्रालय आनी विधानभवन सत्तेचें मुखेल केंद्र आशिल्ल्या कुलाबा मतदारसंघांत टक्केवारी वाडोवपाचे जायते यत्न जाले तरी थंय फकत ४५ टक्के मतदान जालें.
३० वर्सांतलें सगळ्यांत चड मतदान
विधानसभा वेंचणूक २०२४ खातीर सांजवेळा ६ मेरेन महाराष्ट्रांत सरासरी ६५.११ मतदान जालें. फाटल्या ३० वर्सांनी ह्या राज्यांत पयलेच खेपे इतल्या व्हड प्रमाणांत मतदान जालां. १९९५ वर्सा ७१.६९ टक्के मतदान जाल्लें. फाटल्या वर्सांनी महाराष्ट्रांत केन्नाच ६५ टक्क्यां परस चड मतदान जावंक ना. लोकसभा वेंचणुकेंत मतदानाचो आंकडो ६१.३९ टक्के आशिल्लो. जाल्यार २०१९ वर्साचे विधानसभा वेंचणुकेंत मतदानाचो आंकडो ६१.४ टक्के आशिल्लो. फाटल्या वेंचणुकेचे तुळेंत अंदूं मतदारांचो आंकडो ३.७ टक्क्यांनी वाडला. हें वाडिल्लें मतदानाचें प्रमाण वेंचणुकेच्या निकालांत म्हत्वाचो वांटो घेवंक शकता. मजगतीं, २०१९ वर्सा राज्यांत ८.८५ कोटी नोंदणीकृत मतदार आशिल्ले. फाटल्या पांच वर्सांत ९.५ टक्क्यांनी वाड जाल्या आनी आतां राज्यांत ९.६९ टक्के मतदार आसात.
मतदानाची टक्केवारी
अहमदनगर – ७१.७३ टक्के
अकोला – ६४.९८ टक्के
अमरावती – ६५.५७ टक्के
औरंगाबाद – ६८.८९ टक्के
बीड – ६७.७९ टक्के
भंडारा – ६९.४२ टक्के
बुलढाणा – ७०.३२ टक्के
चंद्रपूर – ७१.२७ टक्के
धुळे – ६४.७० टक्के
गडचिरोली – ७३.६८ टक्के
गोंदिया – ६९.५३ टक्के
हिंगोली – ७१.१० टक्के
जळगांव – ६४.४२ टक्के
जालना – ७२.३० टक्के
कोल्हापूर – ७६.२५ टक्के
लातूर – ६६.९२ टक्के
मुंबई शहर – ५२.०७ टक्के
मुंबई उपनगर – ५५.७७ टक्के
नागपूर – ६०.४९ टक्के
नांदेड – ६४.९२ टक्के
नंदुरबार – ६९.१५ टक्के
नाशिक – ६७.५७ टक्के
उस्मानाबाद – ६४.२७ टक्के
पालघर – ६५.९५ टक्के
परभणी – ७०.३८ टक्के
पुणे – ६१.०५ टक्के
रायगड – ६७.२३ टक्के
रत्नागिरी – ६४.५५ टक्के
सांगली – ७१.८९ टक्के
सातारा – ७१.७१ टक्के
सिंधुदुर्ग – ६८.४० टक्के
सोलापूर – ६७.३६ टक्के
ठाणे – ५६.०५ टक्के
वर्धा – ६८.३० टक्के
वाशिम – ६६.०१ टक्के
यवतमाळ – ६९.०२ टक्के
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
