भांगरभूंय | प्रतिनिधी
विक्री वाडटलीच, बेकायदो येरादारीय वाडपाची शक्यताय
भांगरभूंय । प्रतिनिधी
पणजी : महसूल वाडी खातीर महाराष्ट्र सरकारान सोऱ्याचे दर वाडयल्यात. ताचो व्हड फायदो गोंयाक जातलो. पूण ह्या निर्णयाक लागून गोंयांतल्यान महाराष्ट्रांत जावपी सोऱ्याची बेकायदो येरादारी लेगीत वाडटली.
महाराष्ट्र मंत्रीमंडळान हालींच जाल्ले बसकेंत सोऱ्या वयल्या शुल्कांत व्हड प्रमाणार वाड करपाचो निर्णय घेतला. ताका लागून बियर आनी वायन सोडून हेर सगळे तरेचो सोरो खूब म्हारग जातलो. महाराष्ट्र सरकारान भारतीय बनावटीच्या विदेशी सोऱ्याच्या 260 रुपया दरेक बल्क लिटरा मेरेन निर्मिती मुल्य घोशीत केल्ल्या सोऱ्या वयल्या उत्पादन शुल्काचो दर निर्मिती मुल्याच्या तीन पटी वयल्यान साडेचार पट केला. देशी सोऱ्या वयल्या उत्पादन शुल्काचो दर दरेक प्रूफ लिटर 180 वयल्यान 205 रुपया केला. देशी सोरो दरेक बाटली 80 रुपया केल्या. तशेंच सीलबंद विदेशी सोरो विक्री खातीर हॉटेल, रेस्टँरंण्टांक मंजुरी केल्या. ते खातीर अतिरिक्त शुल्क लेगीत घेवपाचो निर्णय महाराष्ट्र सरकारान घेतला. मजगतीं, महाराष्ट्राचे तुळेंत गोंयांत सगळेच तरेचो सोरो सामको सवाय आसा. ताका लागून महाराष्ट्रांतल्यान गोंयांत येवपी पर्यटक फुडल्या काळांत गोंयांतल्यान व्हड प्रमाणांत सोरो खरेदी करतले. ताचो फायदो गोंयचे सरकारी तिजोरेक जातलो. पूण दुसरे वटेन गोंयांतल्यान महाराष्ट्रांत चोरये पद्दतीन जावपी सोऱ्याचे येरादारींत वाड जातली. महाराष्ट्रांतले खूबशे जाण गोंयांतल्यान सोरो विकत घेवन तो महाराष्ट्रांत सवाय दरांत विकतात. फाटल्या कांय वर्सांत अशा प्रकारांनी वाड जाल्या. पत्रादेवी तपासणी नाको तशेंच महाराष्ट्रांतल्या हेर वाठारांतल्या पुलिसांनी अश्या प्रकरणांत खूबश्यो कारवायो केल्ल्याचें दिसून आयलां.
महाराष्ट्र सरकारान सोऱ्याचें मोल वाडयिल्ल्याचो फायदो निश्चीत गोंयाक मेळटलो. ताका लागून गोंयच्या सोऱ्याचे विक्रेंत वाड जातलीच, पूण गोंयांतल्यान महाराष्ट्रांत जावपी सोऱ्याची बेकायदो येरादारी आडावप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
