भांगरभूंय | प्रतिनिधी
जम्मू कश्मीर संघप्रदेश आनी हरयाणा राज्य विधानसभा वेंचणुकांचे निकाल लाग मेरेन महाराष्ट्र राज्य विधानसभे खातीर वेंचणूक जाहीर जावंक शकता. महाराष्ट्र जिखपा खातीर केंद्रांतल्या भाजप सरकारान फाटल्या एक दोन म्हन्यांत आमच्या शेजारच्या राज्याचेर पुरायपणान लक्ष केंद्रीत केलां. लोकसभा वेंचणुकेंत आयिल्ल्या अपेसाची भरपाय करपा खातीर मुखेलपणान हें सगलें चल्लां. लोकसभा वेंचणुके वेळार केल्ल्यो चुकी सुदारून उबाठा-शरद पवार आनी राहूल गांधी हांच्या राजकी पक्षांच्या महाविकास आघाडीक धडो शिकोवपा खातीर भाजप-शिवसेना आनी राष्ट्रवादी काँग्रेस हांच्या महायुती सरकारान यत्न सुरू केल्ल्याचें दिसून येता. फाटल्या देड म्हयन्याच्या काळांत महाराष्ट्रांत फ्रंटफुटार वचून आक्रमक अशे राजकारण करपी महायुती सरकाराचे खूबशी उदरगत करीत महाविकास आघाडीक बॅकफुटार वचपाक भाग पाडिल्लें आसतनाच कोंकणांतल्या मालवणां अशी एक घडणूक घडली की महाविकास आघाडीच्या फुडार्यांच्या हातांत आयतीच शिवाजी महाराजांची ‘तरसाद’ सांपडली. आतां तेच घडणुकेंतल्यान आयतेंच हाताक लागिल्लें ‘शस्त्र’ वापरिनासतना ताचे वेल्यान राजकारण करिनाशिल्ले राजकी पक्ष आमचे कडेन सांपडप कठिणूच. ताका लागून मालवणच्या राजकोट किल्ल्यार फक्त स सात म्हयने पयलींच उबारिल्लो छत्रपती शिवाजी महाराजांचो पुतळो कोसळून पडपाचे घडणुके कडेन आमचे खातीर हें वरदानूच आशिल्ल्याचो समज महाविकास आघाडीच्या फुडार्यांनी करून घेतला, आनी ताचेर सुरू जाल्लें राजकारण विधानसभा वेंचणूक जाय मेरेन तरी सोंपपाची चिन्नां दिसून येनात.
महाराष्ट्रांत फाटल्या दोनेक म्हयन्यांत मुख्यमंत्री एकनाथ शिंदे, उपमुख्यमंत्री देवेंद्र फडणवीस आनी अजीत पवार बी हांणी सगल्याच आघाड्यांचेर महाविकास आघाडीतल्या पक्षांक, लोकहिताचे अशे खूबशे ठोस निर्णय घेवन जर्जर केल्लें आसतना राजकोट किल्ल्यार कोसळिल्ल्या छत्रपतींच्या पुतळ्याची ‘तरसाद’ तितली काडून घेवन विरोधकांनी सरकारा आड लडपा खातीर ताचे शस्त्र केल्लें दिसून येता. बॅकफुटार गेल्ल्या महाविकास आघाडीच्या शरद पवार, उद्धव ठाकरे बी फुडाऱ्यांच्या हातांत हीच ‘तरसाद’ दिसता आनी राज्य विधानसभा वेंचणुकेंत आपल्याक अनुकूल असो निकाल लागचो हे खातीर ही धारेची तरसाद वापरून ताचो राजकी लाव घेवपाची कसलीच संद सोडपाची ना असोच निश्चेव महाविकास आघाडीन केल्लो दिसून येता. पयर मुंबयंत महाविकास आघाडीच्या फुडाऱ्यांनी जे उमेदीन शिंदे सरकाराचेर ‘जुता मारो’ आंदोलन केलें ताचे वेल्यान ताची कोणाकूय प्रचिती येवची. महाराष्ट्राचेंच न्हय जाल्यार देशांतल्या लोकांचें आराध्य दैवत आशिल्ल्या छत्रपती शिवाजी महाराजांचो पुतळो कोसळपाची घडणूक दुर्दैवी आसा हें मान्य करून लेगीत विरोधक मात प्रधानमंत्री नरेंद्र मोदी आनी तांच्या भारतीय जनता पक्षाक धडो शिकोवपा खातीर हातांत चलून आयिल्ली एक राजकी संद म्हूण ताचे कडेन पळयतात, हेंच हाचे वेल्यान अधोरेखीत जाता. शिवाजी महाराजांचो पुतळो कोसळप ही आपले खातीर एक बरी संद आसा हाचो साक्षात्कार समेस्त विरोधकांक जाला आनी जाल्ले घडणुके विशीं सादें दुख्ख उक्तावचें अशेंय कोणाक दिसून आयलें ना. राजकारणाचो खालाविल्लो पांवडो हे घडणुके वेल्यान स्पश्टपणान दिसून येता.
प्रधानमंत्री नरेंद्र मोदी हांणी हे घडणुके खातीर शिवरायांच्या चरणा कडेन सामकी मातें तेंकोवन माफी मागली. मुख्यमंत्री एकनाथ शिंदे, देवेंद्र फडणवीस, अजीत पवार बी हांणी महायुती सरकारांतल्या फुडाऱ्यांनीय ताची जापसालदारकी घेवन लोकांची माफी मागली. पूण विरोधकांक ताचें कांयच पडून गेल्लें दिसून येना. उरफाटें माफी मागपाचें नाटक तितलें केल्ल्याचें हें फुडारी उरफाटें उलयतात. हाचोच सादो आनी स्पश्ट अर्थ असो की हातांत आयिल्लें हें ‘शस्त्र’ आमी वापरतलेच अशी ते ताकिदूच दिवंक लागल्यात. सत्ता हस्तगत करपा खातीर खंयच्याय गजालींचें राजकारण करप हातूंत आतां कोणांक नाविन्य उरिल्लें ना. महाराष्ट्रांतल्या विरोधी फुडाऱ्यां कडल्यानूय तेंच जायत आसलें जाल्यार ताचें कोणाक अजाप दिसपा सारकें कारण ना. राजकोटचे घडणुकेन शिवभक्तांक जाल्ल्यो वेदना समजुपा सारक्योच आसात. अश्यो घडणुको खंयचेंच परिस्थितींत स्विकारार्ह नात हेंवूय मान्य आसा. पूण हे घडणुके फाटलीं कारणां सोदून काडपा बदला, हाका जापसालदार कोण, दोशी कोण हाचेर चर्चा करपा बदला राजकी सुवार्था खातीर ‘तरसाद’ उबारतात हें पळोवन प्रत्यक्ष शिवरायांक कितें दिसता आसतलें हाचो विचारूय कोणें केल्लो दिसून येना. राज्यांतल्या महायुतीच्या सरकाराक हाचे वेल्यान चडांत चड बदनाम कशें करूं येतलें आनी आपली राजकी पोळी कशी भाजतली हेंच तर पळयतात. अर्थांतच लोकांच्या दरबारांत ही नौटंकी आतां कितले मेरेन चलतली हाची जाप वर्स सोंपता म्हणसर लागपी निकालांतल्यान मेळटली.
महाराष्ट्रांत लोकसभा वेंचणुके उपरांत पयलींच आक्रमक जावन फ्रंटफुटार खेळपी महायुती सरकारा खातीर राजकोट किल्ल्या वयली घडणूक कांय प्रमाणांत बॅकफुटार व्हरपी आसली तरी राज्यांतल्या महिला कल्याणा खातीर हालींच शिंदे सरकारान उबारिल्लीं कांय पावलां तांचे कडेन निश्चीतपणान फायदेशीर थारुये. मध्य प्रदेशांतल्या लोकप्रीय ‘लाडली बेहना’ येवजणेचे धर्तेचेर जाहीर केल्ली आनी अंमलबजावणीय केल्ली ‘लाडकी बहीण’ तशेंच ‘लाडका भाऊ’ येवजण्यांक लागून महायुती सरकाराची प्रतिमा बरीच उंचावल्या. तातूंतच सरकारी कर्मचाऱ्यां खातीर केंद्रांतल्या सरकारान जाहीर केल्ल्या नव्या एकवटीत निवृत्ती वेतन येवजणेक लागून कर्मचाऱ्यांची सरकारा वेली निरशेवणी पयस जावपाक खूबशा प्रमाणांत मजतूच जातली. शेतकारांक 24 वरां वीज फुकट दिवपाचें जाहीर करून शिंदे सरकारान शेतकार भावांक आपले अशे केल्यात. हाचे बगर खूबश्या विकास येवजण्यांचो शुभारंभ महाराष्ट्रांत फाटल्या तीन चार म्हयन्यांत जाला. हाका लागून विरोधकांची दांतखिळी बसप सभाविकूच आसा. पूण मालवणांतले घडणुकेंतल्यान हाताक लागिल्ली छत्रपती शिवाजी महाराजांची ‘तरसाद’ हीच तांचे खातीर आतां आधार जाल्ली दिसून येता. हे घडणुकेचें राजकी भांडवल करपाची एकूय संद सोडपाची ना अशेंच महाविकास आघाडेतल्या फुडार्यांच्या एकूण देहबोलींतल्यान दिसून येता. संविधान बचाव, आरक्षण आनी अल्पसंख्याक समाज संकश्टांत आशिल्ल्याचो समज करून दिवपाचो यत्न ह्या सगल्यांचो विरोधकांक लोकसभा वेंचणुकेंत निश्चितूच फायदो जाला. विधानसभा वेंचणुकेंतूय तेंच शस्त्र चलतलें अशी आशा काँग्रेस आनी हेर विरोधी पक्षांनी बाळगूंक येवची ना. महाराष्ट्रांत आतां विरोधकांची भिस्त सद्या तरी शिवाजी महाराजांच्या कोसळिल्ल्या पुतळ्याचेर चड आशिल्ल्याचें चित्र दिसून येता.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
