भांगरभूंय | प्रतिनिधी
जेएमएम आघाडेन राखलो झारखंड
खबरां संस्था
मुंबय/ रांचीः भाजपाच्या फुडारपणा खालच्या महायुतीन महाराष्ट्र विधानसभा वेंचणुकेंत व्हड जैत मेळयलें. जाल्यार काँग्रेस, उबाठा, राष्ट्रवादीचे महाविकास आघाडेचो सामकोच धूप जालो. तेवटेन जेएमएम आघाडेन झारखंड राखलो.
‘कटंगे तो बटेंगे’ आनी ‘एक है तो सेफ है’ अश्या घोशणांनी गाजिल्ल्यो दोनूय विधानसभा वेंचणुकांचे मतमेजणेक शेनवारा सकाळीं 8 वरांचेर सुरवात जाली. सुरवात जाताच कांय वेळा भितर महाराष्ट्रांत भाजपा खातीर उत्सव मनोवपाचो वेळ आयला, अशे संकेत दिले. सत्ताधारी महायुती आघाडेन राज्यांतल्यो 288 तल्यो 228 सुवातो जिखल्यो जाल्यार काँग्रेस- शिवसेना (उद्धव बाळासाहेब ठाकरे) आनी राष्ट्रवादी काँग्रेस पक्ष (शरद पवार) हांच्या महाविकास आघाडेक फक्त 48 सुवातो मेळ्ळ्यो. अपक्ष 12 जाण वेंचून आयले. अजून मतमेजणी चलता. ताका लागून आयज सकाळ मेरेन निमणो निकाल जाहीर जातलो. महाराष्ट्रांत भोवमता खातीर 145 आमदार जाय.
झारखंडांत जेएमएमच्या फुडारपणा खालचे आघाडेक दोन तृतियांश जैत फावो जालें. 81 सुवातांचे झारखंड विधानसभेंत भाजपान 20 सुवातांचेर जैत मेळयलें, जाल्यार मुख्यमंत्री हेमंत सोरेन हांच्या जेएमएम 35, काँग्रेस 16, आरजेडी 4 आनी सीपीआय- एमएल 1 अश्यो वट्ट 56 सुवातो जिखल्यो. एनडीएक 24 सुवातो मेळ्ळ्यो. जाल्यार अपक्ष 1 वेंचून आयलो. झारखंडांत भोवमताचो आंकडो 41 आसा.
प्रधानमंत्री नरेंद्र मोदी हांणी झारखंडांतल्या जेएमएमच्या फुडारपणा खालच्या आघाडेक परबीं दिलीं आनी भाजपाक तेंको दिल्ले खातीर राज्यांतल्या लोकांचे उपकार मानले. तेचवरी मोदी हांणी महाराष्ट्रांतल्या जैताचें कवतूक केलें. फाटल्या 50 वर्सांतलें महाराष्ट्रांतलें हें सगल्यांत व्हडलें जैत, अशेंय तांणी सांगलें.
महाराष्ट्राचे मुख्यमंत्री एकनाथ शिंदे हांणी सांगलें, लोकांनी नसाय आनी सुडाचें राजकारण न्हयकारलें. कल्याण आनी विकासाचें राजकारण आपणायलें. हो इतिहासीक दीस. लोकांनी महायुतीक व्हड जैत मेळोवन दिवचे खातीर वेंचणूक हातांत घेतली.
मुख्यमंत्री शिंदे हांचो पूत खासदार श्रीकांत शिंदे हांणी सांगलें, तांच्या आघाडेच्या सांगात्यांनी लाडकी बहिण येवजणे सारक्या कल्याणकारी येवजण्यांक ह्या व्हड जैताचें स्रय वता. बाळासाहेब ठाकरे हांचो आदर्श कोण फुडें व्हरता हें ह्या जनादेशा वयल्यान दिसून येता.
दुसरे वटेन शिवसेना (उद्धव बाळासाहेब ठाकरे) पक्षाचे फुडारी संजय राऊत हांणी हें एक व्हड कारस्थान आसा, असो आरोप केला. वेंचणुकेंत पयशांचो वापर जाला हातूंत दुबाव ना. मुख्यमंत्री एकनाथ शिंदे हांचे सगळे उमेदवार कशे जिखपाक शकतात? जांच्या विस्वासघाताक लागून महाराष्ट्राक तिडक आसा ते अजीत पवार कशे जिखपाक शकतात?, अशें तांणी म्हणलें. देंवेंद्र फडणवीस हांणी म्हणलें, सगळो समाज प्रधानमंत्री नरेंद्र मोदी हांच्या फाटल्यान उबे आसात, हें आयच्या निकाला वयल्यान दिसून येता. महायुतींत भाजपाक प्राधान्य दिवपी महाराष्ट्राचो निकाल हो काँग्रेस आनी शरद पवार हांचे खातीर आत्मपरिक्षणाचो विशय आसा.
महाराष्ट्र 288
महायुती 228
महाविकास आघाडी 48
हेर 12
झारखंड 81
इंडिया 56
एनडीए 24
हेर 1
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
