भांगरभूंय | प्रतिनिधी
मुंबय, खबरां संस्था ः महाराष्ट्र विधानसभा वेंचणुकेंत 7,994 उमेदवारांचे अर्ज वैध थारल्यात. फाटल्या वेंचणुकांनी फकत तीन ते चार पक्ष मळार आशिल्ले. पूण अंदूं जायते पक्ष आनी तांचीं चिन्नां आशिल्ल्यान मतदार गोंदळ्ळ्यात. आतां राजकी पक्षांनी वेंचणुकेच्या मळार समान नांवांचे जायते उमेदवार उबे केल्यात. देखून एकाच मतदारसंघांत एकाच नांवाचे तीन-तीन, चार-चार उमेदवार आसतले. देखून मतां फूटपाची शक्यताय आसा. आनी ताचो परिणाम निकालाचेर जातलो. अशें जावचें म्हूण कांय राजकी पक्षांनी मुद्दाम ते उबे केल्यात. म्हणल्यार तांकां भितरल्यान गुपीतपणान तेंको दिला.
चार रोहीत पाटील, दोन संजय पाटील
सांगली जिल्ह्यांतल्या तासगांव- कवठेमहांकाळ मतदारसंघांत राष्ट्रवादी काँग्रेस (शरद पवार) हांणी रोहीत पाटील हांकां उमेदवारी दिल्या. तांचे आड अजीत पवार राष्ट्रवादीन संजय काका पाटील हांकां उमेदवारी दिल्या. ह्या मतदारसंघांत रोहित पाटील नांवाच्या तिगांनी अपक्ष म्हूण अर्ज भरला, जाल्यार एका अपक्षाचे नांव संजय पाटील आसा. देखून मतदानाच्या वेळार वट्ट चार रोहित पाटील आनी दोन संजय पाटील उमेदवार आसतले.
तीन अश्विनी कदम
पुण्यांतल्या पर्वती मतदारसंघांत भाजपाच्या माधुरी मिसाळ हांचे आड राष्ट्रवादी काँग्रेसीच्यो (शरद पवार) अश्विनी कदम वेंचणूक लढयता. अश्विनी कदम नांवाच्या दोन बायलांनी ह्या मतदारसंघांत अर्ज भरला. देखून अश्विनी कदम नांवांचे तीन उमेदवार आसतले.
इस्लामपूरांतय एका नांवाचे जायते उमेदवार
मुक्ताईनगर मतदारसंघांत शिवसेनेचे (शिंदे गट) चंद्रकांत पाटील हांचे आड राष्ट्रवादी काँग्रेसीची (शरद पवार) उमेदवार रोहिणी खडसे हांचे मदीं लढत जातली. हांगां रोहिणी गोकुळ खडसे आनी रोहिणी पंडित खडसे नांवाच्यो दोन अपक्ष बायलो आसात. हाचे वांगडाच चंद्रकांत पाटील नांवाच्या दोन अपक्ष उमेदवारांनी अर्ज भरला.
इस्लामपूर मतदारसंघांत राष्ट्रवादी शरद पवार गटाचे जयंत पाटील हांचे आड अजीत पवार राष्ट्रवादीचे निशिकांत पाटील हांचे मदीं लढो जातलो. ह्या मतदारसंघांत जयंत राजाराम पाटील आनी जयंत रामचंद्र पाटील ह्या दोगांनी अपक्ष म्हूण अर्ज भरला, जाल्यार राष्ट्रवादी काँग्रेसीचे (अजित पवार) निशिकांत पाटील हांचे सारकिल्ले नांव आशिल्ले निशिकांत प्रल्हाद पाटील आनी निशिकांत दिलीप पाटील हांणी अपक्ष उमेदवारी दाखल केल्या.
तीन हर्षवर्धन पाटील आनी दोन दत्तात्रेय भरणे
इंदापूर मतदारसंघांतल्या राष्ट्रवादीच्या अजित पवार गटाचे दत्ता भरणे हांचे आड राष्ट्रवादीच्या शरद पवार गटाचे हर्षवर्धन पाटील उबे रावल्यात. हांगां हर्षवर्धन पाटील नांवाचे दोन आनी दत्तात्रेय भरणे नांवाच्या एकल्यान उमेदवारांनी अर्ज भरला. इंदापूरांत वट्ट तीन हर्षवर्धन पाटील आनी दोन दत्तात्रेय भरणे उबे रावल्यात.
चार महेश शिंदे आनी दोन शशिकांत शिंदे
कोरेगांवांत शिंदे गटाचे महेश शिंदे आनी शरद पवार गटाचे शशिकांत शिंदे हांचे मदीं लढो जातलो. ह्या मतदारसंघांत महेश शिंदे नांवाच्या तीग जाणांनी अपक्ष उमेदवारी अर्ज भरला, जाल्यार शशिकांत शिंदेन अपक्ष म्हूण अर्ज दाखल जाला. कोरेगांव मतदारसंघांत चार महेश शिंदे आनी दोन शशिकांत शिंदे आसात.
तीन रोहित पवार, तीन राम शिंदे
कर्जत-जामखेड मतदारसंघांत शरद पवार गटाचे रोहित पवार हांचे आड भाजपाचे राम शिंदे हांचे मदीं लढो जातलो. ह्या मतदारसंघांत दोन रोहित पवार आनी दोन राम शिंदे हांणी अपक्ष म्हूण अर्ज दाखल केल्यात. देखून तीन रोहित पवार आनी तीन राम शिंदे उमेदवार आसतले.
जाणकारांच्या मतान कांय राजकी पक्षांनी तयार केल्लीं ही एक रणनिती. आतां कोण जिखतात, कोण मतां फोडटात, ताचे कडेन मतदारांचें लक्ष आसा. २० नोव्हेंबराक मतदान आनी २३ नोव्हेंबराक निकाल लागतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
