भांगरभूंय | प्रतिनिधी
सदानंद शेट तानावडेः पणजे भाजपा कार्यालया मुखार मनयली जैताची खोस
भांगरभूंय । प्रतिनिधी
पणजीः महाराष्ट्र विधानसभा वेंचणुकेंत महायुतीक मेळिल्ल्या दोळे दिपकावपी येसाक लागून गोंया सयत देशभरांतल्या भाजपा कार्यकर्त्यां मदीं उमेद पातळ्ळ्या. मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजीत पवार हांणी केल्ल्या कामाक महाराष्ट्रांतल्या मतदारांनी जैताची पावती दिली, अशें राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणी स्पश्ट केलें. महाराष्ट्रांतल्या महायुतीच्या जैता उपरांत प्रदेश भाजपान पणजेच्या कार्यालया मुखार जैताची खोस मनयली. त्या वेळार तानावडे उलयताले.
फाटले लोकसभा वेंचणुकेंत काँग्रेस आनी हेर विरोधी पक्षांची चुकीचो प्रचार केलो. भाजपाक 400 परस अदीक सुवातो मेळ्ळ्यो जाल्यार संविधान बदलतले, असो भंय घातलो. ताका लागून भाजपाच्यो सुवातो उण्यो जाल्यो. पूण महाराष्ट्र आनी झारखंडांतल्या विधानसभा वेंचणुकेंत थंयच्या मतदारांनी विरोधकांक तांची सुवात दाखयली. झारखंडांत हे खेपे भाजपाच्यो सुवातो वाडल्यात, अशें तानावडे हांणी सांगलें. मुख्यमंत्री डॉ. प्रमोद सावंत हांचे सयत गोंयांतले कांय मंत्री, आमदारांनी महाराष्ट्रांत वचून प्रचार केलो. थंयच्या कार्यकर्त्यां मदीं उर्बा हाडली. ताचोय फायदो पक्षाक जालो. प्रधानमंत्री नरेंद्र मोदी सर्वसामान्य लोकां खातीर विवीध तरेच्यो येवजण्यो आंखून त्यो लोकां मेरेन पावयतात. ते खातीर भाजपा बगर पर्याय ना, हे देशभरांतल्या लोकांक कळ्ळां. ताका लागून फाटल्या कांय वर्सांत जाल्ल्या विवीध राज्यांतल्या वेंचणुकांनी मतदारांनी भाजपाकूच कौल दिला. प्रधानमंत्री नरेंद्र मोदी हांणी 2047 मेरेनचें विकसीत भारताचें सपन पळयलां. तें सपन प्रत्यक्षांत हाडचे खातीर देशभरांतले लोक तांच्या फाटल्यान उबे रावल्यात, अशेंय तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
