भांगरभूंय | प्रतिनिधी
एकनाथ शिंदे आनी आमदारांनी शिवसेना फोडली. तिचें नांव आनी चिन्नूय मेळयलें. उद्धव ठाकरे हांकां एकले उडयले. काल अजित पवार (दादा) आनी आमदारांनी राष्ट्रवादी काँग्रेस उबी फोडली. तिच्या नांव आनी चिन्नाचेर तांणी दावो केला. शरद पवार हांकां एकसुरे उडयल्यात. इतिहासाची पुनरावृत्ती घडल्या. पोरूं पावसांत शिवसेनेचें अर्दें अर्द व्हांवन गेल्लें, आतां राष्ट्रवादीचें. फुडल्या दोन दिसांनी आनीक कितली पालसणां पडटात, तीं पळोवपाचीं. पूण, भारतीय राजकी मळा वयलो हो हळशिकावणो प्रकार म्हणचो पडटलो. लोकशायेची ही विटंबणा. विचारसरणी, तत्वांच्यो कोणूय कितल्यो गजाली सांगूं, तीं आयज उरूंक नात, हें साबार पक्षांच्या कडव्या लोकांनी मान्य करचेंच पडटलें. तरीय कांय तत्वनिश्ठ आपल्या पक्षांची हातूंत मात पसून चूक ना, अशें सांगपाक लागल्यात. थोडे आदलो राजकी इतिहास उस्तून काडूंक लागल्यात.
भाकरी परतूवची पडटली, अशें कांय दिसां पयलीं शरद पवार हांणी म्हणिल्लें. अजित पवाराच्या बंडान ती भाकरी करपुवचे पयलीं दुसऱ्याचे बशेंत पडली, तवो मात करपलो अशें राजकी निरीक्षकांक दिसता. हाचे आदीं भाजपाचे मुख्यमंत्री देवेंद्र फडणवीस हांचे वांगडा उपमुख्यमंत्री म्हूण सोपूत घेतकच अजितदादान घुमजाव केल्लें. मागीर ठाकरे सरकार झुटयेर आयिल्लें. फाटल्या कांय दिसांनी राष्ट्रवादींत खूब हालचाली जाताल्यो. शरद पवार प्रधानमंत्री नरेंद्र मोदी हांकां मेळिल्ले. ताचेर तर्क- वितर्क जाल्ले. तांकां राष्ट्रपती जावपाची इत्सा आसली म्हूण ते गेल्ले. ते भाजपाक तेंको दिवपाक सोदताले. अजितदादा मंत्री जावपाक सोदताले. पूण, काका शरद पवार हांणी आडमेळीं हाडलीं. मागीर अध्यक्षपद सोडपाचें जाहीर केलें. तो निर्णय फाटीं घेतलो. उपरांत चली सुप्रिया सुळे आनी प्रफुल्ल पटेलाक (जे आयज अजितदादा वांगडा आसात.) कार्यकारी अध्यक्ष केले, अशें लोक उलयताले… वारसाची घोशणा जाली तेन्नाच मानापमानाची नांदी सुरू जाली. अणभव, कर्तृत्वान ज्येश्ठ आशिल्ल्या अजितदादाक कुशीक दवरलो…. आनी सत्तेचे न्हंयेंत उडकी मारपाची तयारी केल्ल्या, एकदां उडकीय मारिल्ल्या अजितदादान काकाक धोको दिलो. आतां तांणी पक्षाचेरुय दावो केला. वेंचणूक येता म्हणसर राजकी चक्रां घुवून फडणवीस मुख्यमंत्री आनी शिंदे गट कुशीक, दिसूं येता.
हे राजकी नाट्य अजून कांय जाणांक शरद पवारांचे डावपेच दिसतात. पूण, हें मानापमान नाट्य आसुये. शरद पवार हांणी 45 वर्सां पयलीं उखलिल्लें, तशेंच पावल आयज तांच्याच पुतणयान उखल्लां. काका मला वाचवा, हें पेशवाईंतलें प्रसिद्ध वाक्य, तें आतां उरफाटें जावं येता. कारण, शिंदेंक जशी शिवसेना मेळ्ळी, तशी राष्ट्रवादी काँग्रेस अजितदादाक मेळपाक शकता. अजितदादाक पक्षाचे कार्यकारी अध्यक्षपद दिवं येतालें. पूण, ते पक्षा सयत भाजपाक तेंको दित ही भिरांत दिशिल्ल्यान तांकां कुशीक दवरले काय चलयेच्या मोगान शरद पवार हांणी पुतणयाक कुशीक केलो, तें कळना. बाळासाहेब ठाकरे हांणी पक्षाची सगलीं सुत्रां उद्धव ठाकरे हांकां दिल्लीं. राज ठाकरेन मागीर भायर सरून मनसे स्थापन केल्लो. तशेंच कांयशें आतांय जालां. कर्तृत्ववान पुतान बायलेच्या सांगण्या वयल्यान घर सोडून बिराड करचें, तसलो हो प्रकार! आतां ही बायल कोण आनी खरेंच ती हाचे फाटल्यान आसा काय ना, हें सोदप कशें? हालींच दादा समर्थक छगन भुजबळ हांणी पवार चाणक्य आसले, तरी आमीय प्रतिचाणक्य आसात, अशें एका इंग्लीश चॅनलाक सांगिल्लें.
राज्याचे उदरगती खातीर हो निर्णय घेतला, अशें अजितदादान म्हणलां. एकनाथ शिंदे आनी देशांतल्या साबार लोकप्रतिनिधींनी सरकार पक्षांक तेंको दिला वा तातूंत विलीन जाल्यात. आमी फक्त आनी फक्त आनी फक्त….. लोककल्याणा खातीर सरकार पक्षांक लागीं केला, अशें तांणी म्हणलां. हातूंत फुडाऱ्यांकूच दोश दिवंक मेळचो ना. कारण पक्ष बदलिल्ले फावट ते वेंचून आयल्यात. म्हणजे मतदारूय तितलेच दोशी. आमचें गोंय हाचें जिवें उदाहरण! सगल्याच फुडाऱ्यांचेर केशी, आरोप, भानगडी आसतात. देखून तपास यंत्रणां पसून स्वताक, स्वताच्या करियराक सुगूर दवरपाक सत्ता आसा, त्या- त्या पक्षांत ते वतात, अशेंय म्हणू येता. एका काळार हे उजवे, ते दावे, हे राष्ट्रविरोधी, ते देशप्रेमी, ते निर्धमी, सर्वधर्म समभाव वादी, हे हिंदुत्वनिश्ठ अशे फुडारी, वावुरप्यांक, मतदारांकूय पाचारताले. तशी तांची वळख आशिल्ली. मात, हालींच्या कांय वर्सांनी ती पुसून गेल्या. रकयत त्या रंगा सारकें उदक रुप घेता, तशे सगले जाल्यात. सुवार्थ होच परमेश्वर जाला. देशा खातीर हें सामकें धोक्याचें!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
