भांगरभूंय | प्रतिनिधी
आयच्या काळांतले तरणाटे पिळगेन हें फिल्म पळोवन समाजांत आयजूय चलपी धोंगीपणाचो थाव घेवप आनी ‘करसन मुलजी’न पेटयल्ले क्रांती ज्योतीचो मान राखप तितलेंच गरजेचें.
देव आनी धर्म ह्यो समाजांतल्यो सगळ्यांत व्यापक संकल्पना. तातूंत हिंदू, क्रिस्तांव, मुस्लीम, शीख, बौद्ध आदी कितलेशेच धर्म येतात आनी ह्या धर्मांक धरून त्या- त्या निश्चित धर्मांनी मानिल्ली देव संकल्पनां येता. निमाणें धर्म म्हणल्यार कर्तव्य हें पुराणांत मांडिल्ले आसा. तें कर्तव्य समाजाक, कुटूंबाक, नात्यांक आनी आपल्या कर्मांक धरून येता. पूण जेन्ना ह्या पवित्र धर्माच्या सत्रे खाला अपवित्र कर्तुपां करप जाता तेन्ना समाजांत ताचेर आवाज काडपी एक ‘करसन मुलजी’ जाय पडटाच!
‘करसन मुलजी’ हे एक भारतीय क्रांतीकारी, पत्रकार आनी लेखक. तांचेर आदारीत नेटफ्लिक्स ह्या ओटीटी प्लॅटफॉर्माचेर वायआरएफ निर्मित, हिंदींत ‘महाराज’ हे नवे फिल्म 21 जूनाक प्रदर्शीत जालें. दिग्दर्शन सिद्धार्थ पी मल्होत्रा हांणी केलां. स्नेहा देसाय, विपूल मेहता आनी कौसर मुनीर हांणी ह्या फिल्माचे लेखन केला.
कथानक जरी 1842- 1862 काळां मजगतींतलें आसले तरिय 21 व्या शेकड्यांत लेगीत त्या काळाची झलक दिसले बगर रावना. धर्माच्या नांवान देवा कडेन पावपाचो पूल आमी म्हूण सांगपी धोंगी आयजूय ह्या समाजांत उक्तेपणान वावुरतना दिसतात. ह्या फिल्मांतल्यान एक गजाल निश्चितूच समजता ती म्हणल्यार ‘देवाक पुजप आनी स्वताक देव समजुपी मनशांक पुजप’ हातूंत व्हडलो फरक आसा.
आमी 21 वो शेंकडो जरी आधुनीक काळ म्हणलो, तरीय ह्या आधुनीक काळांत जगपी कांय मनशांची वृत्ती पोरणीच उरल्या. ताका लागून घडये शिकिल्ल्या श्रद्धाळूंक लागून धर्माच्या नांवान पयसो करपी लोकांचें फांवता. हें खंबीरपणान ‘महाराज’ ह्या फिल्मांत मांडलां. तशेंच देवाच्या नांवान, देवाचोच उपदेश म्हणून भावार्थ्यांक फटोवपी ‘महाराज’ कशें अस्तुरेक उपभोगाचे साधन म्हणून पळयतात हें निडरपणान ह्या फिल्मांत मांडलां.
‘देवाची प्रखर साधना करप्यांची प्रार्थना देवा कडेन सहज पावता, ताचे खातीर खंयच्याच मनीस रूपी पुलाचो आदार गरजेचो ना’ हो करसन ह्या पात्राचो संवाद वास्तवीक सत्य मांडून वता. मुखेलपणान देवा खातीरची ‘श्रध्दा’ आनी देवाच्या नांवान वा स्वताक देव मानून स्वताची करून घेतिल्ली ‘सेवा’ हांचे मदीं एक स्पश्ट सरळ वळ दवरून आनी खंयच्याच धर्माची धार्मीक भावनांक दुखयनासतना ह्या फिल्माचें कथानक सुरळीत फुडें वता.
आयच्या काळांतले तरणाटे पिळगेन हें फिल्म पळोवन समाजांत आयजूय चलपी धोंगीपणाचो थाव घेवप आनी ‘करसन मुलजी’न पेटयल्ले क्रांती ज्योतीचो मान राखप तितलेंच गरजेचें. तांची लडाय ही धर्माआड नासून धर्माच्या नांवा खाला आपलें शासन चलोवपी लोकांचो विरोध करपी ही लडाय आसा हें ‘महाराज’ फिल्म पळयल्या उपरांत समजता.
हें फिल्म असल्या ‘महाराजांच्या’ वायट कर्तुपांचेर आनी तांच्या म्हेळे वृत्तीचेर बडी मारता. आमच्या समाजांत आयजूय अंधभक्त म्हूण जगपी लोकांचे हे फिल्म दोळे उगडटले, अशी एक आस घेवन येता. आमी काल्पनीक विशय घेवन येवपी हिंदी फिल्मांक जितलें आशेन रावतात तितलेंच वा ताच्याकूय चड आस घेवन वास्तविक आनी सत्य घेवन येवपी हिंदी फिल्मांक आपणावप खूब गरजेचें. तरणाट्यांनी तरी!
देविता ईश्वर खुळे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
