भांगरभूंय | प्रतिनिधी
झूज पर्व 4
कर्ण पर्वाचे दोन दीस
(मागीर तसोच आड्ड्यो मारीत भीम दुःशासनाच्या रथार चडलो. गदेच्या एकाच धपक्यान ताणें ताका रथा वयल्यान सकयल जमनीर उडयलो. … मुखार चलता…)
भीमाच्यो आड्ड्यो आयकून भोंवतणी आशिल्ले सगले जाण आपली लडाय थांबोवन भीम कितें करता तें पळयतूच रावलें. भीमाचेर सामको सांवार आयिल्लो. सकयल पडिल्या दुःशासनाचे छातयेर एक पांय दवरून तो उबो रावलो. ताणें मागीर दुःशासनाक विचारलें, ‘दु:शासना फांश्यांच्या खेळा वेळार द्रौपदीच्या केंसाक धरून तुवें तिका सभाघरांत ओडीत हाडिल्ली. ती दाव्या हातानूच न्हय?’ दुःशासन थार भियेलो. ताची गत वाघरे पडिल्ल्या सारकी जाल्ली. ताणें फकत तकली हालोवन हयकार दिलो. ते सरशी भीमान आपल्या दोनूय हातांनी दुःशासनाचो दावो हात घट्ट धरून हुमटून काडलो आनी पयस उडयलो. दुःशासन बोबो मारपाक लागलो. पूण कोणूच भीमाक आडावपाक फुडें सरलो ना. मागीर भीमान आपली गदा दुःशासनाच्या हड्ड्यार मारून ताचें हड्डें फोडलें. रगताचो व्हाळ व्हावूंक लागलो. भीमान मागीर आपले तोंड दुःशासनाच्या हड्डयाक लावन रगत चाटपाक सुरवात केली. मागीर तो उठलो आनी चंवशी वटेन ताणें आपली नदर घुंवडायली. ताच्या तोंडाक सगले कडेन तांबडे गूंज रगत लागिल्ले. भीमाचो तो अवतार पळोवन लागीं आशिल्ले कौरव सैनिक भिवून पळत सुटले.
भीम आपल्या रथार परत चडलो आनी कर्ण लडाय करतालो थंय आपलो रथ घेवन आयलो. कर्ण तेन्ना सात्यकी आनी अर्जुना आड लडाय करतालो. ताका मदत करपाक कर्णाचे तिनूय पूत आपले रथ घेवन आयिल्ले. थंय पावना फुडें भीमान आपल्या बाणान कर्णाच्या सत्यसेन ह्या पुताक मारलो. ते म्हणसर सात्यकीन कर्णाचो दुसरो पूत सुसेन हाका मारलो. कर्णाचो तिसरो पूत वृषसेन, जाचेर कर्णाचो सगल्यांत चड जीव आशिल्लो ताका अर्जुनान मारलो. आपल्या दोळ्ळ्यां सामकारुच तिनूय पुतांक मरण आयले ते पळोवन कर्ण खचिल्ले भशेन जालो. भीम आनी सात्यकी मागीर थंय सावन दुसरे कडेन लडपाक गेले. ते उपरांत अर्जुन आनी कर्ण हांचे मदीं लडाय सुरू जाली. दोगांयनी एकामेकांचेर तरातरांचे बाण सोडले. दोगांयनी एकामेकांचीं धोणू तोडली. तांणी मागीर नवीन धोणू घेतलीं आनी परत बाण सोडपाक सुरवात केली.
कृष्ण आनी शल्य हांणी आपआपले रथ बरे तरेन हाताळून अर्जुन आनी कर्णाक तांचेपरीन मजत केली. कर्णाक मारपाक आपणाक जमचें ना हें अर्जुनाक ल्हवू ल्हवू कळ्ळें. इतल्यांत कर्णाचो रथ एके वटेन लवडंलो. रथाचे एक चाक झुजा मळार आशिल्ल्या एका खळग्यांत गेल्लें. शल्यान घोड्यांक आमडून रथ खळग्यांतल्यान भायर काडपाचो खूब यत्न केलो. पूण तें जालें ना. ते वटेन अर्जुन कर्णाचेर बाण सोडीत राविल्लो. कर्णाक आपल्या रथांत जाय तसो उबो रावूंक जायना जालें. कर्णान आपले धोणू रथांत दवरलें आनी सकयल देंवलो. आपल्या दोनूय हातांनी तो रथाचें चाक खळग्यांतल्यान वयर काडपाक लागलो. रथ वयर येवपाक जाय म्हणून शल्यूय घोड्यांक नेट दिवन तांकां आमडूंक लागलो. ती संद सादून कृष्णान अर्जुनाक म्हणलें, ‘अर्जुना, तुका हीच संद आसा. कर्णान परत धोणू हातात घेतलें जाल्यार तुका ताका मारपाक केन्नाच जमचें ना. तेन्ना बाण सोड.’ ते सरशी अर्जुनान चंद्रा सारकें तोंक आशिल्लो बाण कर्णाचेर सोडलो. बाण ज्युस्त कर्णाचे गोमटेक लागलो आनी कर्णाचो आकताक जीव गेलो.
कर्ण मेल्या उपरांत शल्यान कांय कौरव सैनिकांची मजत घेवन रथ खळग्यांतलो वयर काडलो. शल्य मागीर दुर्योधना कडेन आयलो आनी ताणें दुर्योधनाक कर्णाच्या मरणाची खबर सांगली. ती आयकना फुडें दुर्योधन मोट्या-मोट्यान रडूंक लागलो. तें पळोवन दुर्योधनाच्या सारथ्यान ताचो रथ ताच्या शिबिरा कडेन व्हेलो. ते वटेन कृष्णान अर्जुनाचो रथ युधिश्टीराच्या शिबिरा कडेन व्हरून युधिश्टीराक कर्णाच्या मरणाची वार्ता सांगली. ती कळना फुडें युधिश्टीरान व्हड खोशयेन अर्जुनाक आनी कृष्णाक वेंग मारली. मागीर ते सगळे मोटे उमेदीन झुजा मळार आयले आनी कौरव सैनिकांक मारीत सुटले. ते वटेन शल्य, अश्वत्थामा, कृपाचार्य आनी कृतवर्मा हांणीय नेट धरिल्लो. सांज मेरेन कौरवांच्या इकरा अक्षोहिणी सैन्यातले फकत एक अक्षोहिणी सैन्य उरिल्लें. पांडव सैन्याची तीच स्थिती आशिल्ली. तांच्याय सात अक्षौहिणी सैन्यातले एकूच अक्षोहिणी सैन्य जिवें आशिल्लें.
झुजाच्या सतराव्या दिसा दुःशासन आनी कर्णाक मरण आयिल्लें. कौरवांक जैत मेळचे ना हें आतां थारिल्ले वरींच जाल्लें. दुसरे दिसा संजयान हस्तिनापूरांत वचून झुजा मळार कितें घडलें तें सगळें धृतराष्ट्राक सांगलें. कर्णाक अर्जुनान मारलो आनी दुःशासनाक मारून भीमान आपली प्रतिज्ञा पुराय केली हें आयकतकच धृतराष्ट्र कांयच उलयलो ना. आपलेच भिरकेन तो आपल्या हांतरूणार वचून आड पडलो. ते वटेन पांडवांच्या शिबिरांत खोस पातळिल्ली. तांचो व्हडलो दुस्मान कर्ण आता ह्या जगांत नाशिल्लो.
दुसरे दिसा दुर्योधनान शल्याक आपल्या सैन्याचा मुखेल म्हणून अभिशेक केलो. आता पांडवांचोच मामा, मद्रदेशाचो राजा शल्य दुर्योधनाच्या सैन्याचो मुखेल म्हणून पांडवा आड झुजपाक वचपाचो आशिल्लो.
(फुडें चलता)
अनिल नायक
९०४९०७९७८९
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
