भांगरभूंय | प्रतिनिधी
झुजपर्व 3
द्रोण-पर्वाचे पांच दीस
–
भीष्म घायाळ जावन सकयल पडलो ताच्या दुसऱ्या दिसा कौरव सैन्यांतले सगले मुखेल राजा जमले. भीष्मा उपरांत कौरव सैन्याचो मुखेल कोणाक करपाचो हें आतां थारावपाक जाय आशिल्लें. भीष्माक आतां आपल्या हातांत शस्त्र धरपाक जमचें ना, हें कळटकच कर्ण झुजा मळार येतलो हें सगल्यांक कळिल्लें. दुर्योधना वटेंतल्या तरणाट्या राजांनी, कर्णाक सैन्याचो मुखेल करचो अशें ताका सुचयलें. पूण कौरव सैन्यांतल्या जाण्ट्या- जाण्ट्या राजांक द्रोण मुखेल जावचो अशें दिसतालें. कर्णानूच हो प्रस्न सोडयलो. द्रोण हो आपलो गुरु आशिल्ल्या कारणान ताकाच सैन्याचें मुखेलपण दिवप योग्य जातलें अशें कर्णान आपणेंच दुर्योधनाक सांगलें. ते प्रमाण दुर्योधनान द्रोणाक कौरव सैन्याचो मुखेल म्हणून अभिशेक केलो. मुखेल जाल्या उपरांत द्रोणान, आपूण युधिश्टीराक बंदी करून तुजे मुखार उबो करता अशें दुर्योधनाक सांगलें. द्रोणान दिल्लें उतर आयकुन दुर्योधनाक खूब खोस जाली.
दुसरे दिसा म्हणल्यार झुजाच्या इकराव्या दिसा झुजा मळार कर्णाक पळोवन कौरव सैन्याक नवीन उमेद जाली. पांडव सैन्यात मात भिरांत पातळ्ळी. युधिश्टीराक जिवो धरपाचें वचन द्रोणान दुर्योधनाक दिलां ही गजाल पांडवांक कळिल्ली. तेन्ना कितेंय करून द्रोणाक युधिश्टीराच्या रथा मेरेन पावूंक दिवप ना अशें सगल्यांनी मेळून थारायिल्लें. लडाय सुरू जायना फुडें द्रोण आनी कर्णान व्हड नेटान पांडवाच्या सैन्याचो नाश करपाक सुरवात केली. द्रोण आपको रथ ल्हव- ल्हव युधिश्टीराच्या रथा वटेन व्हरूंक लागलो. तें लक्षांत येतकच विराट, द्रुपद, सात्यकी, व्याघ्रदत्त, सिंहसेन हांणी द्रोणाक आडावन ताचेर एकाच वेळार बाण सोडपाक सुरवात केली. तें पळोवन द्रोण खवदळलो आनी ताणें आपल्या बाणांनी व्याघ्रदत्त आनी सिंहसेन हांकां मारून उडयले. तांकां मारतकच द्रोण युधिश्टीराच्या रथा कडेन पावलो. द्रोण आनीक मागीर ओगी रावलो ना. ताणें बाणार बाण सोडून युधिश्टीराक घायाळ केलो. ताका बंदी करपाक द्रोण आपल्या रथांतल्यान देवपाचो विचार करता थंय आसा इतल्यांत ‘युधिश्टीराक धरता, युधिश्टीराक धरता’ अशो पांडव सैन्यातल्या कांय जाणांनी व्हडल्यान आड्ड्यो मारल्यो. त्यो आयकून अर्जुन आपलो रथ घेवन थंय आयलो. ताणें मागीर द्रोणाचेर एका फाटोफाट एक बाण सोडून ताका आपल्या धोणूक बाण लावपाक संदूच दिली ना. इतले म्हणसर कौरवांच्या सैन्यांतल्या कोणेतरी शंख वाजयलो आनी तितल्यान द्रोणाची अर्जुनाच्या चपक्यातल्यांन सुटका जाली. निरशेल्या मनांन द्रोण आपल्या शिबिरांत परतलो. अर्जुनान घायाळ युधिश्टीराक आपल्या रथांत घालून ताच्या शिबिरांत व्हरुन पायलो. झुजाचो इकरावो दीस द्रोण आनी अर्जुनान गाजयल्लो.
झुजाचो बारावो दीस उदेलो. आयज लेगीत द्रोणान युधिश्टीराक धरपाचे तयारेनूच लडाय करपाक सुरवात केली. त्रिगर्ताचो राजा सुशर्मा, प्रागज्योतिष राज्याचो राजा भगदत्त आनी शकुनी हांकां द्रोणान अर्जुनाक युधिश्टीरा कडेन रावूंक दीवं नाकात अशें सांगिल्लें ते प्रमाण आयची लडाय चलिल्ली.
युधिश्टीराच्या रथा वटेन वतना द्रोणान वाटेर मेळिल्ल्या द्रुपदाचो भाव सत्यजित आनी विराटाचे दोन पूत हांका सर्गार धाडले. ते वटेन अर्जुनान त्रिगर्ताचो राजा सुशर्मा हांकां ताच्या पांचूय भावां सयत मारलो. अर्जुनाक मागीर भगदत्तान आडायलो. भगदत्त हतीर बशिल्लो. अर्जुनान पयली त्या हतीक मारलो. हती मरना फुडें भगदत्त उडी मारून पळूंक सोदतालो. तेन्नाच अर्जुनान बाण सोडून जाण्टेल्या भगदत्ताचो जीव घेतलो. इतल्यांत शकुनी मामा अर्जुना आड लडाय करपाक फुडें सरलो. पूण अर्जुनाचे दोन-चार बाण ताका लागना फुडें तो आपलो रथ घेवन थंय सावन पळून गेलो. इतले म्हणसर सांज जाली, शंख वाजले आनी त्या दिसाची लडाय सोंपली.
अनिल नायक
९०४९०७९७८९
—————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.