भांगरभूंय | प्रतिनिधी
(पूण झुजा वेळार हातांत शस्त्र ना घेवपाचें तुजें उतर तूं मोडूं नाका. चल, परत रथांत बस, अशें म्हणून अर्जुनान कृष्णाक ओडून हाडून रथांत बसयलो…. आतां मुखार…)
मागीर जे तरेन अर्जुनान भीष्माचेर आनी कौरव सैन्याचेर बाण सोडले ते खातीर भीष्माक आनी द्रोणाक आपले रथ ल्हवू- ल्हवू फाटल्यान घेवचें पडले. इतल्यांत सांज जाली आनी अर्जुनाच्या रागांतल्यान कौरव सैन्याची सुटका जाली. झुजाचो तिसरो दीस अर्जुनान गाजयल्लो. युधिश्टीराक खूब उमेद जाली. ते वटेन धृतराष्ट्राच्या मनांत भंयाची उत्पत्ती जाली.
चवथ्या दिसाचें झूज सुरू जायना फुडें भीष्म अर्जुनाक सोदूंक लागलो. पूण, अर्जुनाच्या रथा कडेन पावचें पयली ताका अभिमन्यू मेळ्ळो. दोगूय एकामेकांचेर बाण सोडपाक लागले. अभिमन्यू आनी अर्जुन हांच्या बाण सोडपाच्या तंत्रांत कांयच फरक भीष्माक दिसलो ना. अभिमन्यूची धोणूविद्येंतली कुशळटाय पळोवन भीष्माक खूब अजाप जालें. भीष्माक अर्जुना आड लडाय करपाची आशिल्ली तें खातीर ताणें अभिमन्यू आड लडाय करपाची थांबयली आनी तो अर्जुनाक सोदूंक गेलो. अर्जुन तेन्ना एकाच वेळार कृपाचार्य, कृतवर्मा, शल्य सुशर्मा, शाल्व राजाचो पूत ह्या सगल्यां आड लडतालो. तें पळोवन अर्जुनाक मजत करपाक धृष्टद्युम्न थंय गेलो. ताच्या चपक्यांत शाल्वाचो पूत मेळ्ळो. आपले गदेन धृष्टद्दुम्नान शाल्वाच्या पुताची तकलीच फोडली. तें पळयना फुडें शाल्व राजा, दुर्योधन आनी ताचे कांय भावूय थंय गेले. दुर्योधन धृष्टद्युम्ना वटेन वता तें पळोवन भीम आपली गदा उखलून थंय धावून गेलो. ताणें आपली गदा घुंवडावन मदीं आशिल्ल्या दुर्योधनाच्या सैनिकांक मारून उडयले.
दुर्योधनाच्या भोवतणी आशिल्लें सैनीक ल्हवू-ल्हवू उणे जावंक लागिल्यान हें लक्षांत येतकच दुर्योधनाक वांचोवपाक ताचे भाव फुडें आयले. तांका पळयना फुडें भीमाक आनीक नेट आयलो. ताणें आपल्या गदेच्या धपक्यांनी दुर्योधनाच्या आठ भावांचो जीव काडलो. भीष्मान तें पळयलें आनी ताणें प्रागज्योतिष राज्याचो राजा भगदत्ताक भीमा आड लडाय करपाक धाडलो. हतीर बशिल्ल्या भगदत्तान सोडिल्लो भालो भीमाक ज्युस्त लागलो आनी ताची सुद्द गेली. भीम बेसुद्द जालो तें घटोत्कचान पळयलें आनी तो पिसावल्ल्या भशेन जालो. ताणें भगदत्ताचेर आपले कडेन आशिल्ल्या सगल्या शस्त्रांचो मारो केलो. ताका लागून आतां भगदत्त आनीक जिवो उरना अशें जालें. ताका वांचोवपाक भीष्मान आनीक सैनीक धाडले. पूण, घटोत्कच कोणाकूच बदना जालो. ताणें लागीं आशिल्ले कौरव सैनीक कापून काडले. भीष्म भियेलो आनी ताणें सांज जाली अशें निमित्त करून शंख वाजोवन बेगीबेगीन लडाय थांबयली.
चवथो दीस भीम आनी घटोत्कचाचो आशिल्लो. युधिश्टीरान घटोत्कचाक वेंग मारुन ताची तोखणाय केली. दुसऱ्या दिया सकाळीं संजयान धृतराष्ट्राक भीमान आनी घटोत्कचान केल्लो पराक्रम सांगलो. आपलें आठ पूत भीमान मारले हें कळना फुडें धृतराष्ट्र व्हडल्या- व्हडल्यान रडूंक लागलो. आपल्या पुतांच्या मरणाक आपूणूच जापसालदार आसा अशें तो व्हडल्यान म्हणूक लागलो. विदूर कुशीकूच उबो आशिल्लो. पूण तो कांयच उलोयलो ना.
झुजाच्या पांचव्या दिसाचो सूर्य उदेलो तेन्ना कुरुक्षेत्राच्या झुजा मळार बारा अक्षौहिणी सैन्य त्या दिसाची लडाय करपाक उबे राविल्ले. झुजाच्या चार दिसांभितर स. अक्षौहिणी सैन्याचो नाश जाल्लो. दोनूय सैन्यातले मुखेल- मुखेल वीर अजून जिवे आशिल्लें. त्या दिसाची लडाय सुरू जायना फुडें भीष्म पांडवांचे सैन्य ल्हवू-ल्हवू नश्ट करीत रावलो. जाल्यार तेवटेन अभिमन्यू कौरवांचे सैन्य इल्ले इल्ले उणे करपाक लागलो. पूण पांचवो दीस सात्यकीचो आशिल्लो. ताणें कौरव सैन्याची दशा दशा केली. तें पळोवन भीष्मान भुरिश्रवाक सात्यकीआड लडपाक धाडलो. सात्यकी आनी भुरिश्रवा एकामेकां मुखार उबे रावून तरातरांचीं शस्त्रां सोडूंक लागले. शस्त्रां लागिल्ल्यान सात्यकी घायाळ जालो. ते सरशी सात्यकीचे धा पूत भूरिश्रवाच्या आंगार धांवून गेले. पूण, भूरिश्रवा मुखार तांकां तग धरूंक जमलें ना. भुरिश्रवान तांकां सगल्यांक मारून उडयले. आपल्या दोळ्यां मुखार आपल्या पुतांक मरण आयलें, तें पळोवन सात्यकी रागान फुल्लो आनी तो तसोच भूरिश्रवाचेर तुटून पडलो. पूण, सात्यकी आतां सामको थकिल्लो. भीमाच्या तें लक्षांत आयले आनी ताणें सात्यकीक ओडून आपल्या रथांत बसयलो आनी थंय सावन पयस व्हेलो. इतले म्हणसर सूर्य अस्ताक गेलो आनी त्या दिसाची लडाय सोंपली अशें सुचोवपी शंख वाजले. झुजाचो पांचवो दीस सात्यकीन गाजयल्लो, पूण ताचे धायूय पूत हें जग सोडून गेल्ले. पांडवांक खूब दूख्ख जालें आनी ते निरशेले. पूण हस्तिनापूरांतल्या धृतराष्ट्राच्या जिवाक मातशी थंडाय आयली.
(मुखार चलता)
अनील नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
